كىتاپ فەستيۆالى استانا قالاسى اكىمدىگىنىڭ, قر پرەزيدەنتىنىڭ حالىقارالىق «بولاشاق» ستيپەندياسى ستيپەندياتتارى قاۋىمداستىعىنىڭ, «استانا جاستارى» جاستار رەسۋرستىق ورتالىعى جانە استانا قالاسىنىڭ ورتالىقتاندىرىلعان كىتاپحانالار جۇيەسىنىڭ ۇيىمداستىرۋىمەن ءوتتى.
ەلورداداعى العاشقى «Astana Kitap Fest» فەستيۆالىنىڭ ماقساتى – حالىق اراسىندا كىتاپ وقۋدى دارىپتەۋ, قالالىقتاردىڭ كىتاپ مادەنيەتى دەڭگەيىن جوعارىلاتۋ. اتالمىش شارا اياسىندا ەلوردانىڭ «ارباتىندا» كىتاپ الماسۋ ۇيىمداستىرىلدى. تۇرعىنداردىڭ ءبىرى وزىنە ۇناعان كىتاپتى ەشقانداي اقى تولەمەي ۇيىنە السا, ەندى ءبىرى كەرىسىنشە وقىپ شىققان كىتابىن قوعامدىق سورەدە قالدىرعان بولاتىن.
«بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىنوۆانىڭ ايتۋىنا قاراعاندا, مۇنداي سورەلەر قالالىقتار ءۇشىن تاڭسىق دۇنيە ەمەس. استانانىڭ كوپتەگەن ساۋدا ورتالىقتارىندا جۇمىس ىستەيتىن قوعامدىق كىتاپ سورەلەرى بۇگىن حالىقتىڭ جاقسى باعاسىن الىپ ۇلگەرگەن.
ء«بىزدىڭ قاۋىمداستىقتىڭ باستاماسىمەن استانادا بىلتىردان «ۆolashak books» جوباسى ىسكە اسىرىلىپ كەلەدى. بۇل – الەۋمەتتىك ءبىلىم بەرۋ جوباسى. بۇگىنگى تاڭدا قوعامدىق كىتاپ سورەلەرى «سارىارقا», «حانشاتىر», «اجارMall», «ازيا پارك», «كەرۋەن» سياقتى ساۋدا ورتالىقتارىندا بار. جوبامىز, اسىرەسە, وسكەلەڭ ۇرپاق وكىلدەرىنىڭ اراسىندا كەڭىنەن تانىمال, سۇرانىسقا يە. كىتاپتار قاشاندا قولجەتىمدى بولا بەرمەيدى عوي؟! ءبىز جاستاردىڭ تەگىن وقۋ, دامۋ, جاڭاشىلدىقتاردى تانۋ مۇمكىندىگىنىڭ بار ەكەندىگىن كورسىن دەيمىز. تابىستى تۇردە جۇزەگە اسىپ جاتقان جوبا بولاشاقتا دا ءوز جالعاسىن تابادى», - دەپ العا تارتتى لاۋرا دەمەسىنوۆا.
سونىمەن قاتار, «Astana Kitap Fest» كىتاپ فەستيۆالىنىڭ اياسىندا قالا تۇرعىندارى مەن قوناقتارى ءتۇرلى سالادا زور جەتىستىكتەرگە قول جەتكىزگەن اتاقتى استانالىق تۇلعالارمەن كەزدەستى. «تالاپ» قولدانبالى زەرتتەۋ ورتالىعىنىڭ ديرەكتورى راحىم وشاقباەۆ, «دارىن» اكادەمياسى مەن «جاستار» فۋتبول كلۋبىنىڭ نەگىزىن قالاۋشى ءادىل يگەمبەرديەۆ پەن «توميريس» فيلمىندە باستى ءرولدى سومداعان اكتريسا الميرا تۇرسىن Bookdating الاڭىندا جينالعاندارعا وزدەرى تامسانا وقىعان كىتاپتارى, سۇيىكتى اۆتورلارى جايلى ايتىپ بەردى.
ايتا كەتەيىك, Book Dating اياسىنداعى مۇنداي كەشتەر ەلوردادا ءۇش جىل قاتارىنان اي سايىن وتكىزىلىپ كەلەدى.
