مەرەكەلىك بايقاۋدىڭ باستى ۇيىمداستىرۋشىسى مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى مەن ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى ساراپشىلارىنىڭ ايتۋىنشا, كونكۋرسقا ۇسىنىلعان ەڭبەكتەردى ەلىمىزگە بەلگىلى جۋرناليستەردەن قۇرىلعان ارنايى ماماندار «ۇزدىك ماقالا», «ۇزدىك تەلەباعدارلاما», «ۇزدىك راديو باعدارلاما», «ۇزدىك سايت ماقالاسى» اتالىمدارى بويىنشا ساراپتادى. كەلىپ تۇسكەن 200-گە جۋىق ماتەريال بايقاۋ ەرەجەسىنە ساي ىرىكتەلىپ, قازىلار قورىتىندىسى بويىنشا باس جۇلدەگە تىگىلگەن 1 ميلليون تەڭگە سىيلىققا تانىمال پۋبليتسيست, شوقانتانۋشى جارىلقاپ بەيسەنباي ۇلىنىڭ ەڭبەگى لايىق دەپ تابىلدى. كورنەكتى قالامگەرگە ارنايى سەرتيفيكاتتى مادەنيەت جانە سپورت ءمينيسترى ارىستانبەك مۇحامەدي ۇلى تابىس ەتتى.
سونداي-اق «ۇزدىك ماقالا» اتالىمى بويىنشا I ورىندى «جاس الاش» گازەتىنىڭ قىزمەتكەرى نۇرلىبەك سافين يەلەنسە, II ورىن «ەگەمەن قازاقستان» گازەتىنىڭ شىعىس قازاقستان وبلىسى بويىنشا مەنشىكتى ءتىلشىسى ازامات قاسىمعا بۇيىرىپ, III ورىندى تارازدىق قالامگەر ءازىمحان ىبىرايىم ەنشىلەدى.
«ۇزدىك تەلەباعدارلاما» اتالىمى بويىنشا I ورىندى «تاڭشولپان» باعدارلاماسىنىڭ ءجۋرناليسى سەرىكبەك جۇمابەك يەلەنسە, II ورىن «ماسەلە» باعدارلاماسىنىڭ جەتەكشىسى نارتاي ارالباي ۇلىنا بەرىلىپ, III ورىندى «سارىارقا» تەلەارناسى جاڭالىقتار ءبولىمىنىڭ شەف-رەداكتورى گۇلباقشا اقاجانوۆا ەنشىلەدى.
«ۇزدىك راديو باعدارلاما» اتالىمى بويىنشا I ورىندى جاس جۋرناليست ەربول الشىنباي يەلەنسە, II ورىن «حابار» راديوسىنىڭ جۇرگىزۋشىسى اسەمگۇل امانجولوۆاعا, III ورىن «شالقار» راديوسىنىڭ ءجۋرناليسى تالانت ارعىنعاليعا بۇيىردى.
«ۇزدىك سايت ماقالاسى» اتالىمى بويىنشا I ورىن «سپورتپورتال.كز» سايتىنىڭ ءتىلشىسى ماديار ارىستانباەۆقا, II ورىن رەسپۋبليكالىق «پوليتسيا.كز» جۋرنالىنىڭ قىزمەتكەرى ەركەعالي بەيسەنوۆكە بۇيىردى, III ورىندى «باق.كز» اقپارات اگەنتتىگىنىڭ ءتىلشىسى قىمبات ەلتايقىزى ەنشىلەدى.
سونىمەن قاتار «قازاقستان تاريحى» جانە «ادەبيەت» پورتالدارىنىڭ باس رەداكتورى ولجاس بەركىنباەۆ باستاعان ءتورت جۋرناليست قۇرمەت گراموتاسىمەن ماراپاتتالسا, 30-دان استام جۋرناليسكە مينيسترلىكتىڭ العىس حاتى تابىستالدى.
بەكەن قايرات ۇلى,
«ەگەمەن قازاقستان»
