بريفينگ بارىسىندا م.بايمۇحان پولشا قازاقستاننىڭ ورتالىق جانە شىعىس ەۋروپاداعى نەگىزگى سىرتقى ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. بۇل رەتتە پرەزيدەنت ن.نازارباەۆتىڭ 2016 جىلعى 22-23 تامىزدا ۆارشاۆاعا جاساعان ساپارى شەڭبەرىندە قابىلدانعان قازاقستان مەن پولشا اراسىنداعى ەكونوميكالىق ىنتىماقتاستىق تۋرالى دەكلاراتسيانىڭ ماڭىزى زور. جالپى, تاۋەلسىز قازاقستان مەن پولشا اراسىنداعى ديپلوماتيالىق قارىم-قاتىناستار 1992 جىلدان باستاۋ الادى. حالقىنىڭ سانى 38 ملن ادامدى قۇرايتىن بۇل ەل 2004 جىلدان بەرى ەۋروپالىق وداققا مۇشە بولىپ تابىلادى. پولشا – ەكونوميكاسى الەۋەتتى ءىجو-ءسى تەك ءوسىمدى كورسەتىپ كەلە جاتقان ەل. بۇل كورسەتكىش بويىنشا ەۋروپادا 6-ورىندا, ال الەم بويىنشا 24-ورىندا تۇر.
قازاقستانمەن پارلامەنتارالىق ارىپتەستىكتى نىعايتۋ ماقساتىندا قۇرىلعان توپ جۇمىسىنا پولشانىڭ جوعارعى زاڭ شىعارۋشى ورگاندارى بولىپ تابىلاتىن سەيم مەن سەناتتا قىزمەت ەتەتىن پولشالىق 56 دەپۋتات قاتىسادى. سونىمەن بىرگە تاعى ءبىر توپ ەكونوميكا, عىلىم جانە ازاماتتىق قوعام ماسەلەلەرىن قاراستىرادى. كەلەسى جىلدىڭ ماۋسىم ايىندا پولشانىڭ سەناتى مەن سەيمىنەن جاساقتالعان دەلەگاتسيا قازاقستان پارلامەنتىنە رەسمي ساپارمەن كەلمەك. ال قازاقستاندىق دەپۋتاتتار ۆارشاۆاعا كۇزدە قارىمتا ساپارمەن بارىپ قايتاتىن بولادى. ەلشىلىك جۇرگىزگەن جۇمىستار نەگىزىندە پولشانىڭ ءار ايماعىنان قازاقستاننىڭ ايماقتارىمەن جەكە-جەكە ارىپتەستىك ورناتۋ ماقساتىندا ەلىمىزدىڭ وبلىستارىنا دەلەگاتسيالار رەسمي ساپارمەن كەلۋدە. پولشانىڭ ايماقارالىق ارىپتەستىككە ۇمتىلۋى ولاردىڭ ۇلتتىق ەرەكشەلىگىنە ءتان. ماسەلەن, 3-6 ساۋىردە ليۋبلين اكىمدىگى مەن تالدىقورعان قالاسى اكىمدىگى اراسىندا مەموراندۋمعا قول قويىلدى. جۋىردا تاعى ءبىر پولياك دەلەگاتسياسى قوستاناي مەن پاۆلودار وبلىستارىنا ات باسىن تىرەمەك. ال ءار مەموراندۋم وبلىستىڭ وزىندىك ەرەكشەلىگىن نازارعا الا وتىرىپ, جاساقتالادى.
ەكى ەل اراسىنداعى تاۋار اينالىمىنىڭ كورسەتكىشى جىلدان-جىلعا ارتىپ كەلەدى. پولشانىڭ ستاتيستيكالىق مالىمەتى بويىنشا, 2018 جىلدىڭ العاشقى ءۇش ايىندا ەكىجاقتى تاۋار اينالىمى 459,9 ملن ەۋرونى قۇراعان. ونىڭ ىشىندە پولشادان قازاقستانعا اكەلىنەتىن ەكسپورت 86,3 ملن ەۋرونى قۇراسا, پولشاعا جەتكىزىلەتىن وتاندىق ءونىم قۇنى 373,6 ملن ەۋرونى قۇراپ وتىر. جالپى, قازاقستاننىڭ اتالمىش ەلگە ەكسپورتقا شىعاراتىن ونىمدەر تىزبەگىنىڭ كوشىندە مينەرالدى وتىن, مينەرالدى مايلار مەن ۆوسك, ولاردى تازالاۋدان وتكىزگەننەن كەيىنگى ونىمدەرى, بيتۋمينوزدى زاتتار, ءتۇرلى جەمىستەر, بەيورگانيكالىق حيميالىق زاتتار, قىمبات مەتالداردىڭ ورگانيكالىق نەمەسە بەيورگانيكالىق قوسىلىستارى, راديواكتيۆتى ەلەمەنتتەر مەن يزوتوپتار, مايلى داقىلدار, بالىق, تەڭىز, بيداي ونىمدەرى تۇر. ال قازاقستاندىق نارىققا پولشادان كەلەتىن يمپورتتىق ونىمدەر قاتارىندا ماشينا مەن مەحانيكالىق قوندىرعىلار (ولاردىڭ بولشەكتەرى), جەمىستەر, ەلەكتر قۇرىلعىلارى مەن جابدىقتارى, فارماتسەۆتىك ونىمدەر, ءسۇت ونىمدەرى, پلاستماسسا جانە ودان جاسالاتىن ونىمدەر, تەمىردەن نەمەسە بولاتتان جاسالاتىن بۇيىمدار بار.
«وسى ورايدا ەلشىلىك قازاقستاندىق ءونىمدى پولشا نارىعىندا ىلگەرىلەتۋگە بايلانىستى بارلىق مۇمكىندىكتەردى قاراستىرىپ, ەكسپورت بويىنشا ۇلكەن جۇمىستار اتقارۋدا. ماسەلەن, اككۋمۋلياتور, دارىلىك وسىمدىكتەر ساتۋ, فارماتسەۆتيكا, الكوگول ونىمدەرىن ساتاتىن كومپانيالارعا جان-جاقتى كونسۋلتاتسيا بەرىپ, ولارعا قولداۋ كورسەتىپ, وزدەرىنىڭ مۇمكىندىكتەرىن ديۆەرسيفيكاتسيالاۋعا بارىنشا مۇمكىندىك بەرۋدى كوزدەپ وتىرمىز. سونداي-اق الەمدە الما ەكسپورتىنان اقش پەن قىتايدان كەيىنگى ءۇشىنشى ورىندى الاتىن پولشا تەك الما ەكسپورتتاپ قويماي, بولاشاقتا الما سور-
تىن قازاقستانعا اكەلىپ ءوسىرۋى مۇمكىن. ءبىز وسى باعىتتا جۇمىس اتقارىپ جاتىرمىز», دەدى ەلشى بريفينگ بارىسىندا.
مادەنيەت, ءبىلىم جانە عىلىم سالالارىنداعى ىنتىماقتاستىق تا بەلسەندى تۇردە دامىپ كەلەدى. قازىرگى تاڭدا پولشادا 800-گە جۋىق قازاقستاندىق ستۋدەنت ءبىلىم الۋدا. ەلدە «رۋحاني جاڭعىرۋ» جانە «التىن ادامنىڭ الەم مۇراجايلارىنا شەرۋى» حالىقارالىق جوباسى اياسىندا « ۇلى دالا مۇراسى: زەرگەرلىك ونەردىڭ وزىق ۇلگىلەرى» مۇراجاي ەكسپوزيتسياسىن وتكىزۋ جوسپارلانۋدا. وسى ورايدا م.بايمۇحان ەلشىلىكتىڭ قولداۋىمەن «Kazakh Tourism» اق پولشانىڭ گدانسك قالاسىندا ەلىمىزدىڭ تۋريستىك الەۋەتىن تانىتۋ جانە پولياك تۋريستەرىن قازاقستانعا شاقىرۋ ماقساتىندا ۆارشاۆادا وتەتىن WorldTravelShow حالىقارالىق تۋريستىك كورمەگە قاتىسۋدى جوسپارلاپ وتىرعانىن جەتكىزدى. ەلشىنىڭ ايتۋىنشا, قازاقستاننىڭ تۋريستىك الەۋەتىن 38 ملن حالقى بار پولشاعا كەڭىرەك تانىستىرۋ ءۇشىن ەكى ەلدىڭ تۋريستىك كومپانيالارىمەن ارىپتەستىك ورناتۋ قاجەت ەكەن. سونىمەن قاتار بۇل سالادا اقساپ جاتقان تاعى ءبىر تۇس, ەلدىڭ قىزىقتى جەرلەرىنە ساياحاتتاۋعا ارنالعان تانىستىرۋ ماتەريالدارى وتە كەمشىن. تۋريستەردىڭ ەلگە از كەلۋى دە سودان بولۋى مۇمكىن. سوندىقتان ەلشىلىك وسى ولقىلىقتاردىڭ ورنىن تولتىرۋعا بارىنشا كۇش سالۋدا. «ونىڭ العاشقى قارلىعاشتارى رەتىندە «قىز جىبەك», «ەر توستىك» كىتاپتارى پولياك تىلىنە اۋدارىلىپ, قازاقستان تۋرالى سوڭعى اقپاراتتار جيناق تۇرىندە جارىققا شىقتى. ولار بيزنەس قاۋىم وكىلدەرىنە, مەملەكەتتىك ورگاندارعا تاراتىلدى. ەكى ەلدىڭ اراسىنداعى ديپلوماتيالىق قارىم-قاتىناستار تىكەلەي ەلشىلىك جۇمىستارىنا بايلانىس-
تى. سوندىقتان ءبىزدىڭ ىسىمىزدە «ۇساق-تۇيەك» دەگەن جوق», دەدى م.بايمۇحانوۆ.
ۆەنەرا تۇگەلباي,
«ەگەمەن قازاقستان»
