ەلوردا اكىمدىگىنىڭ قولداۋىمەن وتكەن تۋرنير استانانىڭ 20 جىلدىعىنا جانە «شەلل»كومپانياسىنىڭ قازاقستانداعى 25 جىلدىعىنا ارنالدى. ءىس-شارانىڭ ۇيىمداستىرۋشىلارى – «شەلل قازاقستان» كومپانياسى جانە «Elorda Aqparat» مەدياكومپانياسى.
جارىستىڭ اشىلۋ سالتاناتىنا استانا اكىمىنىڭ ورىنباسارى ەرمەك امانشاەۆ جانە قر ەنەرگەتيكا ۆيتسە-مينيسترى ماعزۇم مىرزاعاليەۆ قاتىسىپ, فۋتبول مەرەكەسىن ۇيىمداستىرۋشىلارعا العىسىن ايتىپ, بارلىق قاتىسۋشى كوماندالارعا ساتتىلىك تىلەدى.
«بۇگىن ءبىز وتانىمىزدىڭ جۇرەگىنە, تاۋەلسىزدىگىمىزدىڭ تىرەگىنە اينالعان استانامىزدىڭ 20 جىلدىق مەرەيتويىنا ارنالعان جانە «شەلل»كومپانياسىنىڭ قازاقستاندا جۇمىس جۇرگىزە باستاعانىنا 25 جىل تولۋىنا ءوراي وتىپ جاتقانشاراعا قاتىسىپ وتىرمىز. اۋەسقوي سپورتشىلار اراسىنداعى وسى تۋرنير الدىمەن سالاۋاتتى ءومىر سالتىن ناسيحاتتاسا, ەكىنشىدەن, مۇناي-گاز سالاسى مەن جۋرناليستەر قاۋىمى اراسىندا ىنتىماققا دانەكەر بولادى دەپ ويلايمىز. جانە بۇل جارىس استانامىزدا ءداستۇرلى تۇردە ءوتىپ تۇراتىن تۋرنيرگە اينالادى دەپ سەنەمىز» دەدى ەرمەك امانشاەۆ.
جارىسقا 16 كوماندا قاتىستى. اتاپ ايتساق,استانا قالاسى اكىمدىگى, قر ەنەرگەتيكا مينيسترلىگى, «شەلل قازاقستان», «قازمۇنايگاز ۇق» اق, «ەني», «توتال», «نكوك ن.ۆ.», «كپو ب.ۆ.», «PSA» جشس, «Qazaqstan», «حابار», «ەگەمەن قازاقستان», «Astana TV», «Qazaq radiosy», «قازينفورم» جانە «ەlorda اqparat» كوماندالارى بار.
دوپ دوداسىنىڭ فينالىندا «حابار» جانە «قازمۇنايگاز» كوماندالارى كەزدەسىپ, نەگىزگى ۋاقىتتا ەسەپ اشىلماي, ويىن تاعدىرى پەنالتي سەرياسىندا شەشىلدى. ناتيجەسىندە 2:1 ەسەبىمەن «قازمۇنايگاز» جەڭىپ, تۋرنيردىڭ جەڭىمپازىاتاندى.
ال ءۇشىنشى ورىن ءۇشىن بولعان ويىندا قر ەنەرگەتيكا مينيسترلىگىنىڭ كومانداسى «نكوك ن.ۆ.» كومانداسىنان 2:1 ەسەبىمەن باسىم ءتۇستى.
سونىمەن قاتار, «ۇزدىك شابۋىلشى» اتالىمىمەن استانا اكىمدىگى كومانداسىنىڭ ويىنشىسى الەكساندر سەمەنتسەۆ ماراپاتتالسا, «حابارلىق» ايبەك قابىلشا «ۇزدىك قاقپاشى» اتاندى. ال «قازمۇنايگاز» كومانداسىنىڭ نامىسىن قورعاعان تامەرلان اسانوۆ ءتۋرنيردىڭ «ۇزدىك ويىنشىسى» رەتىندە تانىلدى.
مۇناي-گاز سالاسى كوماندالارىنان جينالعان جارنا – 2 ملن تەڭگە «سپەشيال وليمپيكس قازاقستان» ۇيىمىنا اۋدارىلدى. بۇل قاراجات 2019 جىلى ناۋرىزدا ءباا-دە وتەتىن دۇنيەجۇزىلىك جازعى وليمپيادا ويىندارىنا مۇمكىندىگى شەكتەۋلى جاسوسپىرىمدەردەن قۇرالعان شاعىن فۋتبولدان قازاقستان جاستار قۇراماسىنىڭ دايىندىعىنا جۇمسالادى.
بۇعان قوسا, چەمپيون بولعان «قازمۇنايگاز» كومانداسى دا جەڭىپ العان باس جۇلدەسى – 150 مىڭ تەڭگەنى قايىرىمدىلىققا اۋداردى.
