سۋرەت: sknews.kz
قۇجاتتا ارنايى ەكونوميكالىق ايماقتىڭ 2036 جىلعى 31 جەلتوقسانعا دەيىن جۇمىس ىستەيتىنى كورسەتىلگەن. جاڭا قۇرىلىم اتىراۋ-دوسسور تاس جولىنىڭ جانىنداعى جالپى اۋماعى 450 گەكتار جەر تەلىمىنە ورنالاسادى.
بۇل ايماقتى قۇرۋدىڭ بىرنەشە ماقساتى بار. بىرىنشىدەن, جوعارى تەحنولوگيالىق, باسەكەگە قابىلەتتى وندىرىستەردىڭ جەدەل دامۋىنا جاعداي جاسالادى. ەكىنشىدەن, جاڭا ينۆەستيتسيا تارتىلىپ, ونىڭ كولەمى 320 ملرد تەڭگەنى قۇرايدى. ونىڭ ىشىندە شەتەلدىك ينۆەستيتسيا – 120 ملرد تەڭگە, ال وتاندىق ينۆەستورلار قۇياتىن قارجى 200 ملرد تەڭگەنى قۇرايدى. ۇشىنشىدەن, زاماناۋي تەحنولوگيالاردى ەنگىزۋ, قىزمەت كورسەتۋ ساپاسىن ارتتىرۋ كوزدەلىپ وتىر. تورتىنشىدەن, جەرگىلىكتى تۇرعىنداردى جۇمىسپەن قامتۋ كورسەتكىشى ارتادى. بەسىنشىدەن, بىرنەشە ءونىمىن ءوندىرۋ مەن قىزمەت كورسەتۋ كورسەتكىشى 410 ملرد تەڭگەنى قۇراعالى وتىر. وسى ورايدا جاڭا ەكونوميكالىق ايماقتا وڭدەۋشى ونەركاسىپتىڭ حيميا, مۇناي-حيميا, مەتاللۋرگيا, بەيمەتالل مينەرالدىق ونىمدەرى, مەتالل وڭدەۋ, رەزەڭكە جانە پلاستماسسا بۇيىمدارى سەكىلدى باعىتتاردى دامىتۋعا باسىمدىق بەرىلەدى.
التىنشىدان, ارنايى ەكونوميكالىق ايماق اۋماعىندا ارنايى قۇقىقتىق رەجىم ەنگىزىلەدى. مۇندا ەركىن كەدەن ايماعىنىڭ كەدەندىك ءراسىمىن قولدانۋ كوزدەلىپ وتىر. قۇجاتقا سايكەس, ەركىن كەدەن ايماعى ارەكەت ەتەتىن ۋچاسكە كەدەندىك باقىلاۋ ايماعى سانالادى. سول سەبەپتەن كەدەندىك باقىلاۋدى قامتاماسىز ەتۋ ءۇشىن قاجەتتى جابدىقتارمەن قامتىلادى. وسىعان بايلانىستى كەدەن سالاسىنداعى ۋاكىلەتتى ورگان ايماقتىڭ پەريمەترىن قورشاۋ, بەينەباقىلاۋ جۇيەسىمەن جابدىقتاۋ سەكىلدى تالاپتاردى بەلگىلەيدى.
«اتىراۋ» ارنايى ەكونوميكالىق ايماعىنا 2036 جىلعا دەيىن 70 كومپانيانىڭ قاتىساتىنى ناقتىلانىپتى. وسى كەزەڭگە دەيىن مۇندا 2500 جۇمىس ورنىن اشۋ كوزدەلىپ وتىر. اشىلاتىن وندىرىستە وتاندىق ەڭبەككەرلەر
85 پايىزدى قۇرۋعا ءتيىس.
وبلىس اكىمى سەرىك شاپكەنوۆتىڭ ايتۋىنشا, بۇل – كومىرسۋتەگى شيكىزاتىنىڭ 65 پايىزى شوعىرلانعان ءوڭىردىڭ وندىرىستىك الەۋەتىن ارتتىراتىن جوبا. ويتكەنى اتالعان ايماقتا تەك مۇناي-گاز حيمياسىنا عانا ەمەس, بارلىق سالاعا سەرپىن بەرەتىن ءونىم شىعارىلادى.
ء«بىزدىڭ ماقساتىمىز – تەك شيكىزاتتى ءوندىرۋ ەمەس, ونى وڭدەۋ, ونەركاسىپتى دامىتۋ ءارى ساپالى جۇمىس ورىندارىن قۇرۋ. بۇل ءوڭىردىڭ تۇراقتى دامۋى مەن ينۆەستيتسيالىق تارتىمدىلىعىن قامتاماسىز ەتەدى», دەيدى س.شاپكەنوۆ.
اتىراۋ وبلىسى
