فوتو: اقوردا
ء«بىز وزىق تەحنولوگيالاردى ءتۇرلى سالاعا ەنگىزۋ جۇمىسىنا ەرەكشە ءمان بەرىپ وتىرمىز. قازاقستان ناعىز تسيفرلىق ەل بولۋ ءۇشىن ناقتى قادامدار جاساۋدا. ەلىمىزدە جاساندى ينتەللەكت جانە تسيفرلىق دامۋ مينيسترلىگى قۇرىلدى. ءبىز ەكى ءىرى سۋپەركومپيۋتەردى ىسكە قوستىق. استانادا Alem.ai حالىقارالىق جاساندى ينتەللەكت ورتالىعى اشىلدى. ءبىز ەلىمىزدەگى ورتا ءبىلىم بەرۋ جۇيەسىنە جاساندى ينتەللەكتىنى ەنگىزۋ ءۇشىن اۋقىمدى شارالاردى جۇزەگە اسىرا باستادىق. وسىدان ەكى كۇن بۇرىن مەن ءتيىستى جارلىققا قول قويدىم. اتاپ ايتقاندا, قازىر ەلىمىزدىڭ الدىندا ءبىلىم بەرۋ جۇيەسىن ءاربىر وقۋشىنىڭ قارىم-قابىلەتىنە ساي بەيىمدەۋ, دەربەس دەرەكتەردى قورعاۋ, تسيفرلىق ينفراقۇرىلىمدى دامىتۋ, تەحنولوگيانى مەڭگەرگەن پەداگوگتەردى دايارلاۋ مىندەتى تۇر. بۇدان بولەك, ءبىز الاتاۋ قالاسىن كوركەيتۋگە ايرىقشا نازار اۋدارىپ وتىرمىز. جاڭا كونستيتۋتسيادا بۇل شاھارعا «قارقىندى داميتىن قالا» قۇقىقتىق مارتەبەسى بەرىلدى. بۇل جوبا كريپتويندۋستريانىڭ, يننوۆاتسيا مەن تەحنولوگيالىق بيزنەستىڭ وركەن جايۋىنا زور مۇمكىندىك بەرەدى. سوڭعى جىلدارى تۇرىك بيزنەسىنىڭ قازاق ماركەتپلەيستەرىمەن بايلانىسى نىعايا ءتۇستى. مىسالى, Kaspikz Hepsiburada كومپانياسىن ساتىپ الدى. Freedom Holding تۇركيادا تسيفرلىق ەكوجۇيەسىن قۇرىپ, بروكەرلىك قىزمەتىن جانداندىرا باستادى. ءبىز تۇرىك كومپانيالارىمەن جاساندى ينتەللەكت, فينتەح, كيبەرقاۋىپسىزدىك, ونلاين قىزمەت سالالارىندا ناقتى جوبالاردى بىرلەسە جۇزەگە اسىرۋعا قاشاندا دايىنبىز», دەدى مەملەكەت باسشىسى.
مەملەكەت باسشىسى: ونەركاسىپ سالاسىنداعى ىنتىماقتاستىقتى ودان ءارى دامىتۋ قاجەت
تۇركيا پرەزيدەنتى قازاق جانە تۇرىك كاسىپكەرلەرىنىڭ ۇلەس قوسۋىنىڭ ارقاسىندا قازاقستانمەن ەكونوميكالىق قارىم-قاتىناس نىعايىپ كەلە جاتقانىنا قۋانىشتى ەكەنىن جەتكىزدى.
«قۇرمەتتى قاسىم-جومارت توقاەۆتىڭ كورەگەن باسشىلىعىمەن قازاقستاننىڭ ەكونوميكا سالاسىندا جەتكەن جەتىستىكتەرىن ءجىتى باقىلاپ وتىرامىز. 2025 جىلى ەلدىڭ ىشكى جالپى ءونىمى 6,5 پايىزعا جەتىپ, جان باسىنا شاققاندا 15 مىڭ دوللارعا جاقىندادى. بۇگىندە قازاقستاندى سىرتقى ساۋدا اينالىمى 145 ميلليارد دوللارعا جەتكەن ورتالىق ازياداعى ەكونوميكاسى ەڭ اۋقىمدى ەل رەتىندە بىلەمىز. وسى ءوسىمنىڭ ناتيجەسىندە قازاق ەلى 2025 جىلى تۇركى الەمىندەگى ەڭ ءىرى ساۋدا-ەكونوميكالىق سەرىكتەسىمىزگە اينالدى. ارينە, ءبىز مۇنىمەن شەكتەلمەيمىز. ماقساتىمىز – 15 ميلليارد دوللارلىق مەجەگە جەتۋ», دەدى رەجەپ تايپ ەردوعان.
قاسىم-جومارت توقاەۆ پەن رەجەپ تايپ ەردوعان قازاقستان-تۇركيا بيزنەس فورۋمىنا قاتىستى
