جيىندا ونەركاسىپ جانە قۇرىلىس ءمينيسترى ەرسايىن ناعاسپاەۆ سالانىڭ قازىرگى جاعدايى مەن دامۋ پەرسپەكتيۆالارى تۋرالى بايانداما جاسادى. مالىمەتكە سايكەس, 2025 جىلدىڭ قورىتىندىسىندا ونەركاسىپ ءوندىرىسىنىڭ كولەمى 260 ملرد تەڭگەگە جەتكەن. جىل باسىنان بەرى وڭدەۋشى سەكتوردىڭ ءوسىمى 9,9%-دى قۇراپ, جەڭىل ونەركاسىپ ءوندىرىسى 2,2 ەسەگە ارتقان. الايدا سالادا يمپورتقا تاۋەلدىلىك ءالى دە ساقتالىپ وتىر.
كەزدەسۋدە وتاندىق ءونىم ءوندىرۋدى ارتتىرۋ, وندىرىستەردى جاڭعىرتۋ, قايتا وڭدەۋ قۋاتىن كەڭەيتۋ جانە لوكاليزاتسيا دەڭگەيىن كوتەرۋ ماسەلەلەرى تالقىلاندى. پرەمەر-مينيستر ولجاس بەكتەنوۆ جاۋاپتىلارعا كادر دايارلاۋ مەن وتاندىق تاۋار وندىرۋشىلەردىڭ باسەكەگە قابىلەتتىلىگىن ارتتىرۋ قاجەتتىگىن ايتتى.
«قاسىم-جومارت توقاەۆ ەكونوميكالىق الەۋەتتى نىعايتۋ مىندەتىن قويدى. جاڭا كونستيتۋتسيانىڭ قابىلدانۋىمەن ۇكىمەت وڭدەۋ سەكتورىن دامىتۋ جۇمىستارىن كۇشەيتە ءتۇستى. بيىلعى ءتورت ايدىڭ قورىتىندىسى بويىنشا وڭدەۋ سالاسى تۇراقتى ءوسىم كورسەتىپ وتىر. ونىڭ ىشىندە جەڭىل ونەركاسىپتىڭ الەۋمەتتىك ماڭىزى زور. ءبىز وتاندىق تاۋار وندىرۋشىلەردى قولداۋ شارالارىن كەڭەيتۋىمىز قاجەت», دەدى ولجاس بەكتەنوۆ.
كەڭەس قورىتىندىسى بويىنشا پرەمەر-مينيستر وتاندىق وندىرۋشىلەرگە وتكىزۋ نارىقتارىنا شىعۋعا كەپىلدىك بەرە وتىرىپ, ءوندىرىستى ۇلعايتۋ ءۇشىن قوسىمشا ىنتالاندىراتىن مودەل قالىپتاستىرۋ قاجەتتىگىنە نازار اۋداردى.
ەسكە سالا كەتەيىك, بۇعان دەيىن پرەمەر-مينيستر ۇلتتىق پاركتەردەگى باياۋ جۇمىستى قاتاڭ سىناعان بولاتىن.
