سۋرەت: facebook.com/MinzdravRK
جيىنعا دەنساۋلىق ساقتاۋ ءمينيسترى اقمارال ءالنازاروۆا, جەرگىلىكتى اتقارۋشى ورگانداردىڭ وكىلدەرى, مينيسترلىككە قاراستى ۇيىمداردىڭ باسشىلارى, مەديتسينالىق مەكەمەلەردىڭ جەتەكشىلەرى مەن سالالىق ساراپشىلار قاتىستى.
وتىرىستا پرەمەر-ءمينيستردىڭ ورىنباسارى ەلىمىزدىڭ جاڭا تاريحي كەزەڭگە قادام باسقانىن اتاپ ءوتتى. ونىڭ ايتۋىنشا, جاڭا كونستيتۋتسيانىڭ قابىلدانۋى ساپالى ءارى قولجەتىمدى مەديتسينالىق كومەككە ءاربىر ازاماتتىڭ قۇقىعىن بۇلجىماس مەملەكەتتىك كەپىلدىك رەتىندە بەكىتىپ, دەنساۋلىق ساقتاۋ جۇيەسىنىڭ ورنىقتى ينستيتۋتسيونالدىق نەگىزىن قالىپتاستىرادى.
سونداي-اق ايدا بالاەۆا دارىگەرلەر مەن ورتا بۋىن مەديتسينا قىزمەتكەرلەرىن الەۋمەتتىك جانە كاسىبي تۇرعىدان قولداۋ مەملەكەتتىك ساياساتتىڭ تۇراقتى باسىمدىقتارىنىڭ ءبىرى بولىپ قالا بەرەتىنىنە ەرەكشە توقتالدى.
پرەمەر-ءمينيستردىڭ ورىنباسارى دەنساۋلىق ساقتاۋ جۇيەسىن تسيفرلىق ترانسفورماتسيالاۋ ماسەلەسىنە ارنايى نازار اۋداردى. ول مەملەكەت باسشىسىنىڭ قولدانىستاعى بارلىق اقپاراتتىق پلاتفورمالاردى بىرىكتىرەتىن بىرىڭعاي دەرەكقور قۇرۋ جونىندەگى تاپسىرماسىن ساپالى ءارى تولىققاندى ىسكە اسىرۋدىڭ ماڭىزىن اتاپ ءوتتى.
بۇعان قوسا ايدا بالاەۆا باستاپقى مەديتسينالىق-سانيتارلىق كومەك دەڭگەيىندە پروفيلاكتيكالىق جۇمىستى كۇشەيتۋ قاجەتتىگىنە باسا نازار اۋداردى. پرەمەر-ءمينيستردىڭ ورىنباسارى بمسك جۇيەسىن دامىتۋ بويىنشا تۇبەگەيلى شارالار قابىلداۋدى, پروفيلاكتيكالىق تەكسەرۋلەردىڭ تيىمدىلىگىنە باقىلاۋدى كۇشەيتۋدى, بالالار دەنساۋلىعىن دامىتۋعا ارنالعان كەشەندى جوسپار ازىرلەۋدى تاپسىردى. بۇل جوسپار گيگيەنا مەن دۇرىس تاماقتانۋ مادەنيەتىن قالىپتاستىرۋدان باستاپ, اۋرۋلاردى ەرتە دياگنوستيكالاۋعا دەيىنگى بارلىق باعىتتاردى قامتۋعا ءتيىس.
وتىرىس بارىسىندا قوعامدىق دەنساۋلىق ماسەلەلەرى دە جەكە قارالدى. اتاپ ايتقاندا, زياندى ونىمدەر مەن فاستفۋدتى جارنامالاۋدى شەكتەۋ, سونداي-اق ۆاكتسيناتسيا بويىنشا اقپاراتتىق-ءتۇسىندىرۋ جۇمىستارىن كۇشەيتۋ قاجەتتىگى اتاپ ءوتىلدى.
انا مەن بالا دەنساۋلىعىن قورعاۋ ماسەلەلەرىنە توقتالعان ايدا بالاەۆا ءاربىر انا ءولىمى دەرەگى بويىنشا جان-جاقتى ساراپتاما جۇرگىزىلىپ, لاۋازىمدى تۇلعالاردىڭ جەكە جاۋاپكەرشىلىگى ناقتى ايقىندالۋعا ءتيىس ەكەنىنە نازار اۋدارتتى.
ۇكىمەت باسشىسىنىڭ ورىنباسارى بالالار دەنساۋلىعى ماسەلەسى مەملەكەتتىك ساياساتتىڭ باسىم باعىتىنا اينالۋى كەرەكتىگىن ايتىپ, ونى ودان ءارى دامىتۋعا ارنالعان كەشەندى جوسپار ازىرلەۋدى تاپسىردى.
القا جيىنىندا جان-جاقتى تالقىلانعان تاقىرىپتىڭ ءبىرى ءدارى-دارمەكپەن قامتاماسىز ەتۋ ماسەلەسى بولدى. ايدا بالاەۆا ومىرلىك ماڭىزى بار پرەپاراتتاردىڭ ەمحانالار مەن اۋرۋحانالارعا, اسىرەسە اۋىلدىق جانە شالعاي ەلدى مەكەندەرگە, ۋاقتىلى جەتكىزىلۋىن قامتاماسىز ەتۋدى تاپسىردى. سونداي-اق دارىحانالارداعى باعا قالىپتاستىرۋ تەتىكتەرىنە ءتيىمدى باقىلاۋ ورناتۋ, ۇستەماقىلاردىڭ اشىقتىعىن قامتاماسىز ەتۋ مەن دارىلىك زاتتار قۇنىنىڭ نەگىزسىز وسۋىنە جول بەرمەۋ مىندەتى قويىلدى.
جيىن بارىسىندا دەنساۋلىق ساقتاۋ ءمينيسترىنىڭ ەسەبى تىڭدالدى. اقمارال ءالنازاروۆا 2026 جىلعا جۇكتەلگەن مىندەتتەردى ىسكە اسىرۋعا باعىتتالعان وپەراتسيالىق شارالار جوسپارىن تانىستىردى.
