بۇل امبەباپ كىتاپحانا بولعاندىقتان, بارلىق سالا بويىنشا كىتاپتار بار. ياعني كوركەم ادەبيەتتەن بولەك عىلىمي-تانىمدىق ەڭبەكتەر, زاڭ مەن قۇقىق سالاسى, اۋىل شارۋاشىلىعى, تەحنيكالىق, مەديتسينالىق, ولكەتانۋ ادەبيەتتەرى جانە باسقا دا تاقىرىپتاعى ەڭبەكتەر ساقتالعان.
«تورايعىروۆ اتىنداعى وبلىستىق كىتاپحانانىڭ ءۇش ءبولىمى وقىرماندارمەن تۇراقتى جۇمىس ىستەيدى. سونىڭ ءبىرى – ابونەمەنت ءبولىمى. ول جەردە وقىرماندار كىتاپتى ۇيگە الىپ وقيدى. جاستار كوبىنە كوركەم ادەبيەت الادى. سوڭعى بىرنەشە ايدىڭ كورسەتكىشى بويىنشا پاۆلودارلىق جاستار تاريحي-تانىمدىق جانە موتيۆاتسيالىق ەڭبەكتەردى كوپ وقيتىنى بايقالىپ وتىر. اتاپ ايتساق, «وتباسى حرەستوماتياسى» باسپاسىنان شىققان «قانىش جانە عىلىمي مايدان», «وزبەكالى جانە مادەني مايدان» كىتاپتارىن ءجيى وقىپ, تالقىلاپ ءجۇر», دەيدى كىتاپحانا ديرەكتورى شولپان شاحمەتوۆا.
جاستار قازاق ادەبيەتى كلاسسيكتەرىنىڭ ەڭبەكتەرىن كوپ سۇرايتىنى دا بايقالعان. ولاردىڭ قاتارىندا مۇحتار اۋەزوۆ, ءابىش كەكىلباي ۇلى, تىنىمباي نۇرماعامبەتوۆ, ورالحان بوكەي, زەينوللا قابدولوۆ, ءسابيت مۇقانوۆ, ءازىلحان نۇرشايىقوۆ, گەرولد بەلگەر, تاحاۋي احتانوۆ, تولىمبەك ءابدىرايىم, پ.بۋل سىندى كلاسسيكتەردىڭ ەڭبەكتەرى بار.
جەرگىلىكتى جاستار كىتاپحاناعا وقۋمەن قاتار, ءتۇرلى تاقىرىپ بويىنشا عىلىمي زەرتتەۋلەر جازۋ, وزدەرىنىڭ تاڭداعان ماماندىقتارى بويىنشا ديپلومدىق جۇمىس, كۋرستىق جۇمىس جانە رەفەراتتار جازۋعا دا كەلەدى.
جاستاردى كىتاپ وقۋعا ىنتالاندىرۋ ماقساتىندا «كىتاپ جانە قالامگەر», «پاۆلودارلىقتار بالالارعا كىتاپ وقيدى», «وقيتىن پاۆلودار», «ەرتىس-بايان پەرزەنتتەرى», «قالامگەر», «برايل قارپىندەگى پاۆلودار كىتابى», «كىتاپحانا – اۋىل شامشىراعى» سياقتى جوبالار جولعا قويىلعان. بۇل ءىس-شارالار جاس بۋىننىڭ رۋحاني ءوسۋى مەن ۇلتتىق قۇندىلىقتارعا بەت بۇرۋىنا ىقپال ەتەدى.
پاۆلودار وبلىسى
