قۇرىلىسى بىلتىر باستالعان زاماناۋي كوپفۋنكتسيونالدى كەشەنگە 4,9 ملرد تەڭگە جۇمسالىپتى. باس مەردىگەر «Alem Qurylys AQ» جشس جىلعا جەتپەيتىن ۋاقىتتا ەكولوگيالىق مادەنيەتتى قالىپتاستىراتىن نىساندى سالىپ ءبىتىردى.
اشىلۋ راسىمىندە وبلىس اكىمى مۇرات ەرگەشباەۆ بالالاردى مەرەكەمەن قۇتتىقتاپ, بوتانيكالىق باق جۇمىسى جەتكىنشەكتەردىڭ ءتيىمدى دەمالىسىن ۇيىمداستىرۋعا جانە تىڭ جوبالاردى جۇزەگە اسىرۋعا باعىتتالعانىن اتاپ ءوتتى.
«پرەزيدەنت ساياباعىنىڭ اۋماعىنان اشىلعان بوتانيكالىق باق – وسى اۋقىمدى باستامانىڭ ايماعىمىزداعى ناقتى ءارى جەمىستى كورىنىسى. باق ىشىنە قىتاي, وڭتۇستىك افريكا, جاپونيا, وڭتۇستىك جانە ورتالىق امەريكادا وسەتىن جاسىل جەلەك ەگىلدى. وسى ارقىلى جاس جەتكىنشەكتەر وسىمدىكتەردىڭ ەكوجۇيەدەگى ماڭىزى تۋرالى اقپارات الادى. كوپفۋنكتسيونالدى كەشەندە بالالارىمىز تابيعاتپەن تىلدەسىپ, ەڭبەكتىڭ باعاسىن ءبىلىپ, ەكولوگيالىق جاۋاپكەرشىلىكتىڭ سالماعىن سەزىنە تۇسەدى. وسى باقتان ەل ەكولوگياسىن زەرتتەيتىن بولاشاق عالىمدار, بيولوگتەر مەن اگرونومدار شىعارىنا سەنەمىز», دەدى وبلىس باسشىسى.
باقتا ۆەەرلى پالما, كانار قۇرماسى, كاكتۋس پەن الوە, ۆاشينگتونيا پالماسى, سترەليتسيا, جاكاراندا, الىپ يۋككا, ماقتا اعاشى, بامبۋك, ساندىك وسىمدىكتەر, كاريوتا جايقالىپ تۇر. باق ميكروكليماتتى اۆتوماتتى باسقارۋ, سۋارۋ جانە سۋ دايىنداۋدىڭ زاماناۋي ينجەنەرلىك جۇيەلەرىمەن جابدىقتالعان. ەرەكشە اتموسفەراسى كەلۋشىلەرگە جايلىلىق سىيلايتىن نىساندا ستۋدەنتتەردىڭ, مەكتەپ وقۋشىلارىنىڭ, تابيعات جاناشىرلارىنىڭ تانىمىن كەڭەيتۋگە بارلىق جاعداي جاسالعانى بايقالادى. جالپى, سىر وڭىرىندە كەيىنگى ءتورت جىلدا 46 زاماناۋي ءبىلىم نىسانى تابىستالدى. «كەلەشەك مەكتەپتەرى» ۇلتتىق جوباسى اياسىندا 10 جاڭا مەكتەپ سالىنىپ, فيزيكا-ماتەماتيكا باعىتىنداعى ء«بىلىم-يننوۆاتسيا» ليتسەي-ينتەرناتى, مۋزىكالىق كوللەدجدىڭ جاڭا وقۋ عيماراتى مەن جاتاقحاناسى پايدالانۋعا بەرىلدى. «وقۋشىلار سارايى», «سىر جۇلدىزدارى» اكادەمياسى, جالاعاش, جاڭاقورعان, شيەلى اۋداندارىنداعى وقۋشىلار ءۇيى مەن ونەر مەكتەپتەرى جاس جەتكىنشەكتەردىڭ شىعارماشىلىق, زياتكەرلىك الەۋەتىن ارتتىرۋعا قىزمەت ەتىپ جاتىر.
جاقىندا عانا وسى نىساندار قاتارى تولىعىپ, جىل بويى ۇزدىكسىز قىزمەت كورسەتەتىن «AI-KERIM» وقۋ-ساۋىقتىرۋ ورتالىعى بالالار يگىلىگىنە اينالدى.
قىزىلوردا
