ءىس-شاراعا ەلىمىزدە اككرەديتتەلگەن ديپلوماتيالىق كورپۋس پەن حالىقارالىق ۇيىمداردىڭ 80-گە جۋىق وكىلى, سونداي-اق ساراپشىلار قاتىستى. كونستيتۋتسيالىق سوت, كوميسسيا توراعاسى ەلۆيرا ءازىموۆا, ادىلەت ءمينيسترى ەرلان سارسەمباەۆ, كونستيتۋتسيالىق سوت توراعاسىنىڭ ورىنباسارى باقىت نۇرمۇحانوۆ, ادام قۇقىقتارى جونىندەگى ۋاكىل ارتۋر لاستاەۆ, سىرتقى ىستەر ءمينيسترىنىڭ ورىنباسارى ارمان يcەتوۆ, سونداي-اق رەسپۋبليكالىق ادۆوكاتتار القاسىنىڭ توراعاسى ءمادي مىرزاعاراەۆ جاڭا اتا زاڭ جوباسىنىڭ نەگىزگى وزگەرىستەرىنە, پرەزيدەنت باستاماسىمەن ىسكە اسىرىلىپ جاتقان رەفورمانىڭ تۇجىرىمدامالىق نەگىزدەرىنە توقتالدى.
«كونستيتۋتسيا جوباسىندا ەلىمىزدىڭ ەگەمەندىگى, تاۋەلسىزدىگى, ۋنيتارلىعى جانە اۋماقتىق تۇتاستىعى وزگەرىسسىز قالادى. كونستيتۋتسياعا وزگەرىستەر تەك جالپىۇلتتىق رەفەرەندۋم ناتيجەلەرى بويىنشا ەنگىزىلەدى. وسى جىلدىڭ 15 ناۋرىزىندا رەسپۋبليكالىق رەفەرەندۋم وتانداستارىمىزدىڭ ەلدىڭ ودان ءارى دامۋ جولىن ايقىندايتىن جاۋاپتى تاڭداۋ كۇنى بولادى», دەدى ە.ءازىموۆا.
كوميسسيا توراعاسىنىڭ ايتۋىنشا, كونستيتۋتسيا بيلىكتىڭ تەڭگەرىمدى ءارى ەسەپ بەرەتىن مودەلىن قالىپتاستىرادى, ءبىر پالاتالى قۇرىلتايعا كوشۋدى كوزدەيدى, سونىمەن قاتار قۇرىلتايدا زاڭ شىعارۋ باستاماسى قۇقىعىنا يە ازاماتتاردىڭ وكىلدى ورگانى رەتىندە حالىق كەڭەسى ءۇشىن قۇقىقتىق نەگىزدى بەكىتەدى. ونىڭ قۇرىلۋى مەن قىزمەت ءتارتىبى جەكە كونستيتۋتسيالىق زاڭمەن ايقىندالادى.
«كونستيتۋتسيالىق جاڭاشىلدىقتار مەملەكەتىمىزدىڭ حالىقارالىق قۇقىقتىڭ ىرگەلى قاعيداتتارىنا جانە ەل دامۋىنىڭ جاڭا كەزەڭىنە كوشۋ جاعدايىنداعى ۇلتتىق باسىمدىقتارعا بەرىك بەيىلدىلىگىن جان-جاقتى كورسەتەدى. قازاقستاننىڭ حالىقارالىق ىنتىماقتاستىق مودەلىنىڭ نەگىزىنە بۇۇ جارعىسىنىڭ نەگىزگى قاعيداتتارى جانە قابىلدانعان بارلىق حالىقارالىق مىندەتتەمەلەردى ادال ورىنداۋ قاعيداتى قالانعان», دەدى سىرتقى ىستەر ءمينيسترىنىڭ ورىنباسارى ا.يcەتوۆ.
ونىڭ ايتۋىنشا, حالىقارالىق شارتتار ەلدىڭ قۇقىقتىق جۇيەسىنىڭ ءبىر بولىگى بولىپ قالا بەرەدى, سونداي-اق مىندەتتى تۇردە ورىندالادى.
بۇعان قوسا ساياساتتانۋشى قازبەك مايگەلدينوۆ ەلدەگى كونستيتۋتسيالىق رەفورما تەك ىشكى ەمەس, حالىقارالىق ماڭىزى بار ۇدەرىس ەكەنىن ايتادى.
«جاڭا كونستيتۋتسيانىڭ ادامدى باستى قۇندىلىق رەتىندە ناقتى بەكىتۋى اسا ماڭىزدى. جەكە ءومىردى قورعاۋ, تۇرعىن ۇيگە قول سۇقپاۋ, دەربەس دەرەكتەر قاۋىپسىزدىگى, تسيفرلىق قۇقىقتار – بارلىعى بۇگىنگى زاماننىڭ ناقتى سۇرانىستارى. سونىمەن قاتار مەملەكەت تاراپىنان زاڭسىز ارەكەتتەر ءۇشىن كونستيتۋتسيالىق جاۋاپكەرشىلىكتىڭ ەنگىزىلۋى – بيلىك پەن قوعام اراسىنداعى جاڭا قاتىناس مادەنيەتىنىڭ بەلگىسى», دەپ ءتۇسىندىردى ساياساتتانۋشى.
كەزدەسۋ قورىتىندىسىندا ديپلوماتيالىق كورپۋس پەن حالىقارالىق ۇيىمداردىڭ وكىلدەرى ەلدەگى كونستيتۋتسيالىق رەفورمالار ۇدەرىسى اشىق ءارى ايقىن دەگەن پىكىر ءبىلدىردى.
سونداي-اق قازاقستاننىڭ سولتۇستىك ماكەدونياداعى ەلشىسى ساتىبالدى بۇرشاقوۆ سولتۇستىك ماكەدونيا پارلامەنتتىك توبىنىڭ توراعاسى نيكولا كونيانوۆسكي باستاعان قازاقستانمەن ىنتىماقتاستىق جونىندەگى مۇشەلەرىمەن كەزدەسۋدە ەلىمىزدىڭ جاڭا كونستيتۋتسياسىن تانىستىردى.
ەلشى دەپۋتاتتاردى بيىل 15 ناۋرىزدا قازاقستاندا ساياسي جۇيەنى ودان ءارى دەموكراتيالاندىرۋ مەن جاڭعىرتۋدى, پرەزيدەنتتەن پارلامەنتكە بىرقاتار بيلىك وكىلەتتىكتەرىن قايتا ءبولۋدى جانە جەرگىلىكتى وكىلدى ورگانداردىڭ ءرولىن كۇشەيتۋدى كوزدەيتىن جاڭا كونستيتۋتسيا جوباسىن قابىلداۋ بويىنشا جالپىۇلتتىق رەفەرەندۋم وتەتىنىن حابارلادى.
ديپلومات جاڭا كونستيتۋتسيا «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى بويىنشا بيلىك تارماقتارى اراسىنداعى وكىلەتتىكتەردى ايقىنداۋ ارقىلى تەجەۋ مەن تەپە-تەڭدىك جۇيەسىن جەتىلدىرۋگە ارنالعانىن اتاپ ءوتتى.
«نەگىزگى زاڭدى جاڭارتۋدىڭ ماقساتى – مەملەكەتتىك باسقارۋدى تسيفرلىق ترانسفورماتسيا مەن جاھاندىق تۇراقسىزدىقتى قوسا العاندا, قازىرگى الەمنىڭ سىن-قاتەرلەرىنە بەيىمدەۋ. رەفورمانىڭ وزەگىندە ازاماتتاردىڭ قۇقىقتارى مەن بوستاندىقتارىن قورعاۋدى كۇشەيتۋ, سونداي-اق رەسۋرستىق دامۋ مودەلىنەن ادام كاپيتالىن, عىلىم مەن يننوۆاتسيالارعا نەگىزدەلگەن ەكونوميكاعا كوشۋ ماسەلەلەرى تۇر», دەدى س.بۇرشاقوۆ.
سولتۇستىك ماكەدونيا پارلامەنتشىلەرى بيلىكتىڭ زاڭ شىعارۋشى تارماعىنىڭ وكىلەتتىكتەرىن كەڭەيتۋگە, ازاماتتاردىڭ قۇقىقتارىن قورعاۋ تەتىكتەرىن جەتىلدىرۋگە باعىتتالعان كونستيتۋتسيالىق رەفورمانىڭ قازاقستاندىق تاجىريبەسىن زەردەلەۋگە قىزىعۋشىلىق تانىتتى.
