CNN
اقش پرەزيدەنتى سولتۇستىك كورەيا باسشىسىمەن كەزدەسۋدەن باس تارتتى
اق ءۇيدىڭ رەسمي سايتىندا جاريالانعان حاتىندا د.ترامپ سينگاپۋردا ءوتۋى ءتيىس سامميت كحدر ۇسىنىسىمەن باستالعانىن ەسكە سالىپ, اقش-تىڭ وعان قاتىسۋعا نيەتتى ەمەستىگىن جەتكىزگەن. سونىمەن قاتار ول كحدر-عا يادرولىق قارۋ كۇشتەرىمەن ماقتانباۋىن ەسكەرتە وتىرا, اقش-تىڭ ارسەنالى الدەقايدا مىقتى ەكەنىن ەسكە سالىپ ءوتتى. ايتسە دە, د.ترامپ كەلەشەكتە سولتۇستىك كورەيا باسشىسىمەن كەزدەسۋدەن ۇمىتتەنەتىنىن مالىمدەدى.
CNN ارناسىنىڭ حابارلاۋىنشا, اق ءۇي باسشىسىنىڭ بۇل شەشىمى اقش پەن كحدر اراسىنداعى ايلارعا سوزىلعان ديپلوماتيالىق ىلگەرىلەۋگە نۇقسان كەلتىرىپ وتىر. ەندىگى جەردە ۆاشينگتون مەن پحەنيان بايلانىسى قايتا ناشارلاپ كەتۋى ابدەن مۇمكىن.
د.ترامپتىڭ سامميتتەن باس تارتقانىنا قاراماستان, سولتۇستىك كورەيا يادرولىق باعدارلاماسىن توقتاتۋ جونىندەگى جۇمىستارىن جالعاستىرىپ جاتىر. تاياۋدا ەل بيلىگى يادرولىق تۋننەلدەردى جويۋ ءىسىن شەتەلدىك جۋرناليستەردىڭ تاماشالاۋىنا مۇمكىندىك بەردى.
وقيعا ورنىنان مالىمەت تاراتقان CNN ارناسىنىڭ ءتىلشىسى ۋيلل ءريپليدىڭ اقپاراتىنا سۇيەنسەك, شاراعا يادرولىق قارۋ جونىندەگى حالىقارالىق ماماندار مەن ساراپشىلار شاقىرىلماعان كورىنەدى.
ۋ.ءريپليدىڭ ايتۋىنشا, شاراعا قاتىسۋعا جۇزدەن استام جۋرناليست ءوتىنىش بىلدىرگەن. الايدا سولتۇستىك كورەيا بيلىگى ونشاقتى ءتىلشىنى عانا ىرىكتەپ العان كورىنەدى. اتاپ ايتقاندا, اقش, رەسەي, قىتاي, ۇلىبريتانيا جانە وڭتۇستىك كورەيادان ەكى-ەكىدەن جۋرناليسكە رۇقسات بەرىلگەن. ءبىر قىزىعى, شاراعا قاتىسۋعا تەلەۆيزيا تىلشىلەرى عانا الىنعان ەكەن.
ءوز كەزەگىندە سولتۇستىك كورەيا باسشىسى كيم چەن ىن كەز كەلگەن ۋاقىتتا د.ترامپپەن كەزدەسۋگە ءازىر ەكەنىن حابارلادى. بىراق كحدر سىرتقى ىستەر ءمينيسترىنىڭ وكىلى اقش پرەزيدەنتىنىڭ شەشىمى كورەي تۇبەگىندە بەيبىتشىلىك ورناتۋعا باعىتتالعان حالىقارالىق قوعامداستىق تالپىنىسىنا كەدەرگى كەلتىرىپ وتىر دەپ مالىمدەگەن.
CNN ارناسى تاراتقان مالىمەتكە ساي, ءسامميتتىڭ وتپەۋى تۋرالى شەشىم اقش-تىڭ ايماقتاعى جاقتاستارىن ءارى-ءسارى كۇيگە تۇسىرۋدە. ەكى ەل اراسىن تاتۋلاستىرۋشى رەتىندە ارەكەت ەتكەن وڭتۇستىك كورەيا پرەزيدەنتى مۋن چجە ين ءتۇن ىشىندە كەزەكتەن تىس جيىن وتكىزگەن.
كەيىننەن وڭتۇستىك كورەيا سىرتقى ىستەر ءمينيسترى اقش-تىڭ مەملەكەتتىك حاتشىسى مايك پومپەومەن سويلەسىپ, الداعى قادامدارى تۋرالى تالقىلاعان. ال جاپونيا تاراپى اقش پەن ونىڭ جاقتاستارى كحدر-عا سانكتسيا سالىپ, ديپلوماتيالىق قىسىم كورسەتۋدى جالعاستىرا بەرۋ كەرەك دەپ ەسەپتەيتىنىن جەتكىزدى.
THE GUARDIAN
يرلانديا ابورتقا قاتىستى رەفەرەندۋم وتكىزىپ جاتىر
يرلانديا تۇرعىندارى تۇسىك جاساتۋعا قاتىستى بۇكىلحالىقتىق رەفەرەندۋم وتكىزىپ جاتىر. داۋىس بەرۋ ۋچاسكەلەرى تاڭعى 7:00-دە اشىلدى. يرلانديا حالقى 22:00-گە دەيىن ءوز شەشىمىن ءبىلدىرۋى قاجەت.
The Guardian گازەتىنىڭ دەرەكتەرىنە سۇيەنسەك, ابورت جاساۋدى قولداۋشىلاردىڭ سانى باسىم. ايتسە دە, كوپشىلىك ء«يا» دەپ جاۋاپ بەرسە دە, تۇسىك جاساتۋعا بىردەن رۇقسات ەتىلمەيدى. اۋەلى كونستيتۋتسياعا وزگەرىس ەنگىزىلىپ, پارلامەنتتىڭ سوعان سايكەس زاڭ شىعارۋىنا مۇمكىندىك بەرىلەدى. جاڭا زاڭ جوباسىنا سايكەس, تۇسىك جاساتۋ جۇكتىلىكتىڭ 12 ايىنا دەيىن عانا رۇقسات ەتىلەدى.
قازىرگى تاڭدا يرلانديادا ابورت جاساتۋعا تىيىم سالىنعان. جۇكتىلىك ومىرگە قاۋىپتى بولعان جاعدايدا عانا بالانى الدىرىپ تاستاۋعا رۇقسات ەتىلەدى. جالپى, يرلانديا ءداستۇرلى كاتوليك ءدىنىن ۇستاناتىن ەل سانالادى. سوندىقتان شىعار, جۇكتىلىككە قارسى دارىلەرگە 1985 جىلى تىيىم سالىنعان.
ەلدەگى قازىرگى زاڭناماعا ساي, تۇسىك جاساتقاندار نە سوعان قاتىسى بارلار 14 جىلعا دەيىن باس بوستاندىعىنان ايىرىلادى. The Guardian باسىلىمىنىڭ دەرەكتەرىنە سۇيەنسەك, جىل سايىن ءتورت مىڭعا جۋىق ايەل بالاسىن الدىرىپ تاستاۋ ءۇشىن شەتەلگە شىعادى ەكەن. بۇدان بولەك ەكى مىڭنان استام قىز-كەلىنشەك ونلاين ساۋدا ارقىلى جۇكتىلىككە قارسى دارىلەر ساتىپ الاتىن كورىنەدى.
The Guardian باسىلىمىنىڭ پايىمداۋىنشا, داۋىستاردى ساناۋ سەنبى كۇنى جۇرگىزىلەتىنىنە قاراماستان, ناتيجەنىڭ قالاي بولاتىنىن انىقتاۋ قيىن ەمەس. ياعني رەفەرەندۋم قورىتىندىسى بويىنشا تۇسىك جاساتۋدى قولدايتىندار جەڭىسكە جەتۋى ىقتيمال. وقيعانىڭ ماڭىزدىلىعى سونشالىق, كەيبىر ازاماتتار شەتەلدەن ارنايى رەفەرەندۋم ءۇشىن كەلىپ, داۋىس بەرىپ جاتقان كورىنەدى.
جالپى, يرلانديا حالقىنىڭ 78 پايىزى كاتوليك ءدىنىن ۇستانادى. بىراق جاستاردىڭ اراسىندا ءدىن ۇستاناتىندار سيرەك. سونىمەن قاتار شىركەۋگە باراتىندار سانى 1972 جىلمەن سالىستىرعاندا 91 پايىزدان 30 پايىزعا دەيىن ازايىپ كەتكەن.
شولۋدى دايىنداعان
اباي اسانكەلدى ۇلى,
«ەگەمەن قازاقستان»
