سۋرەتتەردى تۇسىرگەن ەرلان ومار, "ەگەمەن قازاقستان"
25 مامىردا بارلىق مەكتەپتە سالتاناتتى جيىن ءوتىپ, وقۋ جىلىن قورتىندىلادى. بيىل 7 مىڭعا جۋىق تۇلەك «التىن بەلگىگە» ۇمىتكەر اتاندى. ايتا كەتكەن ءلازىم, اعىمداعى جىلى «التىن بەلگى» يەگەرلەرىنە ۇبت كەزىندە جيناعان بالى تەڭ بولعان جاعدايدا عانا باسىمدىق بەرىلەدى. ال الداعى ۇبت سىناعىنا 102 442 مەكتەپ ءبىتىرۋشى قاتىسۋعا نيەت ەتىپ وتىر. ولاردىڭ 75 پايىزى تەستىلەۋدى قازاق تىلىندە, ال 25 پايىزى ورىس تىلىندە تاپسىرماق. ۇلتتىق تەستىلەۋ ورتالىعىنىڭ ديرەكتورى رامازان الىمقۇلوۆتىڭ ايتۋىنشا, بۇگىندە 1,5 مىڭ اۋديتوريا ۇبت تاپسىرۋ ناۋقانىن وتكىزۋگە ازىرلەنۋدە. ونىڭ ىشىندە 500-دەن اسا اۋديتوريا ءالى دە ءموبيلدى بايلانىستى شەكتەيتىن قۇرىلعىلارمەن جابدىقتالماعان ەكەن. وسى ورايدا ءبىلىم جانە عىلىم ءمينيسترى ەرلان ساعاديەۆ جەرگىلىكتى اكىمدىكتەردى ۇبت وتكىزۋ پۋنكتەرىن مەتالل ىزدەۋىشتەرمەن, كامەرالارمەن جانە بايلانىستى شەكتەيتىن قۇرىلعىلارمەن جابدىقتاۋعا شاقىرعان بولاتىن.
ارينە, مەكتەپ بىتىرۋشىلەردىڭ كەشى دە, تۇلەكتەردىڭ تاڭ شاپاعىن قارسى الۋى دا اتا-انالاردى, وقۋشىلار مەن مۇعالىمدەردى اجەپتاۋىر ابىگەرگە سالعانىمەن ءاپ-ساتتە وتە شىعادى. ەڭ باستىسى, اياۋلى التىن ۇيادان قاناتتانىپ شىققان جاس تۇلەكتىڭ ءومىردىڭ ءوز قازانىندا قايناپ, ەل مەن جەرگە قىزمەت ەتەر تاس تۇلەككە اينالۋى بولسا كەرەك!
اباي حاكىم ايتقانداي, «سەن دە ءبىر كىرپىش دۇنيەگە, كەتىگىن تاپ تا, بار, قالان!..»
دۋمان اناش,
«ەگەمەن قازاقستان»
