قاراعاندىدا «سارىارقا بارىسى» وب­لىس­تىق ءتۋرنيرى ءوتتى

بوز كىلەم ۇستىندە وبلىستىڭ بارلىق قالالارى مەن اۋداندارىنان كەلگەن  200-گە جۋىق بالۋان باق سىنادى.

– «سارىارقا بارىسى» تۋرنيرىندە قازاق كۇرەسىندەگى ەرەجەلەردە قاراستىرىلعان بارلىق سالماق دارەجەلەرى بويىنشا بالۋاندار كۇرەستى. ال «قازاقستان بارىسى» رەسپۋبليكالىق ءتۋرنيرىنىڭ ىرىكتەۋ بەلدەسۋلەرىنە قاتىسۋعا 16 سپورتشى ءوتىنىم بەردى, – دەدى سايىستىڭ باس تورەشىسى نۇرمۇحامبەت جايلاۋباي. – قازىر قازاق كۇرەسىنە دەگەن زور قىزىعۋشىلىق بار. بۇعان  «قازاقستان بارىسى», «الەم بارىسى» جانە «ەۋرازيا بارىسى» سىندى جارىستاردىڭ ءداستۇرلى تۇردە وتكىزىلۋى ايرىقشا ىقپال ەتىپ وتىر.

جارىس قورىتىندىسىندا 55 كيلو سالماقتا قاراعاندىلىق ناريمان تۇتقۇش قارسىلاس شاق كەلتىرمەدى. نۇرا اۋدانىنان كەلگەن ءدىناسىل ىسقاق 60 كيلوعا دەيىنگىلەردىڭ دوداسىندا الدىنا جان سالمادى. قاراعاندىلىق ەلامان قۋانباي 66 كيلو بويىنشا جانە 74 كيلو سالماقتا تولەپبەرگەن قايىرعالي چەمپيون اتاندى. 82 كيلو سالماق دارەجەسىندە مارلەن جانعاباي, 90 كيلو سىنىندا ەرقانات مولداعۇلوۆ (بۇقار جىراۋ) ۇزدىك شىقسا, 100 كيلوعا دەيىنگى سالماق دارەجەسىندە شاحتينسك قالاسىنىڭ اتىنان كۇرەسكەن ءادىلحان قايىرجان ۇلى التىن مەدالعا يە بولدى. اسا اۋىر سالماقتا ەرنازار بەناشەۆتىڭ باعى جاندى.

ال «قازاقستان بارىسى» ءتۋرنيرىنىڭ ىرىكتەۋ سىنىندا ونەر كورسەتكەندەر اراسىنداعى دودادا قاراعاندىلىق بالۋان ەرجان شىنكەەۆ بۇل جولى دا قارسىلاس شىداتپادى. 2018 جىلدىڭ «سارىارقا بارىسى» اتانعان ول ەندى اباي اۋدانىنىڭ بالۋانى ەرسىن مۇحامەتجانوۆپەن بىرگە «قازاقستان بارىسى» تۋرنيرىندە قاراعاندى وبلىسىنىڭ نامىسىن قورعايتىن بولادى.

قايرات ءابىلدا,
«ەگەمەن قازاقستان»

قاراعاندى