«تاريحى ارىدەن باستالاتىن اسىق اتۋ ويىنىنان ەل بىرىنشىلىگى 1993 جىلدان بەرى وتكىزىلىپ كەلەدى. 2011 جىلى ەرەجە ءبىر جۇيەگە كەلتىرىلىپ, قارقىندى دامۋ الدى. 2017 جىلى يۋنەسكو-نىڭ ادامزاتتىڭ ماتەريالدىق ەمەس مادەني مۇرا تىزىمىنە ەنگىزىلدى. ۇلكەندەرمەن قاتار جاستاردىڭ دا قىزىعۋشىلىعى كۇرت ارتىپ وتىر», دەيدى اسىق اتۋ فەدەراتسياسىنىڭ اتقارۋشى ديرەكتورى جومارت سابىرجانوۆ.
ەكى كۇنگە سوزىلعان باسەكەدە ەرلەر اسىق اتىپ جارىسسا, ايەلدەر جاعى بەس اسىقتان كۇش سىناستى. ەرەجە بويىنشا ءار كوماندادان ءۇش ويىنشىدان قاتىسىپ, وزدەرىنىڭ ەپتىلىكتەرىن, كوز مەرگەندىگىن, دالدىگىن, جىلدامدىعىن تانىتۋعا ۇمتىلدى.
استانانىڭ نامىسىن قورعاۋعا كەلگەن 18 جاستاعى بويجەتكەن ۇلجالعاس قۇدايبەرديەۆا جاس تا بولسا تاجىريبەسى مول كورىنەدى. ءبىر جىلدارى رەسپۋبليكالىق دودادا كۇمىس جۇلدەگەر اتانىپتى. كوزدەگەنىن ءمۇلت جىبەرمەيتىن سۇرمەرگەن دەرسىڭ. «اسىق ويىنى كوزدى, قولدى شاپشاڭدىققا ۇيرەتەدى», دەيدى, ول. باتىس قازاقستان وبلىسى اقجايىق اۋدانىندا دەنە شىنىقتىرۋ ءپانىنىڭ مۇعالىمى بولىپ ىستەيتىن دينا بەكماعامبەتوۆا دا اسىقتى كىشكەنتايىنان ويناۋدى ادەت ەتىپتى.
جارىس قورىتىندىسىندا ەرلەر اراسىندا استانالىق سپورتشىلار جالپىكوماندالىق ەسەپتە ءبىرىنشى ورىندى جەڭىپ الدى. ەكىنشى, ءۇشىنشى ورىنداردى قوستاناي مەن وڭتۇستىك قازاقستان وبلىسى يەلەندى.
ايەلدەر اراسىندا تاعى دا استانالىقتاردىڭ مەرەيى ۇستەم بولدى. ەكىنشى ورىنعا الاڭ يەلەرى, ءۇشىنشى ورىنعا قوستاناي وبلىسى كوتەرىلدى.
ءومىر ەسقالي,
«ەگەمەن قازاقستان»
