«بيىلعى جىلدىڭ 2 ساۋىرىندە «استانا-1» اقپاراتتىق جۇيەسى مەن «ە-ليتسەنزيالاۋ مەملەكەتتىك دەرەكتەر قورىن» ىقپالداستىرۋ جۇزەگە اسىرىلدى. وسى جۇمىس اياسىندا ەكسپورت جانە يمپورت سالاسىنداعى ليتسەنزيا مەن رۇقسات قۇجاتتارى بويىنشا 42 مالىمەت بەرىلەدى. بۇل جوبا ىسكە قوسىلعاننان كەيىن ازىن-اۋلاق قاتەلەر كەزدەستى. الايدا, قازىر بۇل قاتەلەر «ە-ليتسەنزيالاۋ مەملەكەتتىك دەرەكتەر قورىنان» جانە «استانا-1» اقپاراتتىق جۇيەسى تاراپىنان تولىق جويىلدى», - دەپ مالىمدەدى د.اباەۆ ۇكىمەتتىڭ بۇگىنگى وتىرىسىندا.
مينيستر مەملەكەت اۋماعىنا راديوەلەكتروندىق جانە جوعارى جيىلىكتەگى قۇرالداردى اكەلۋگە قورىتىندى جانە يمپورتقا ليتسەنزيا بەرۋگە ىڭعايلى ەتۋ ماقساتىندا جول كارتاسى بەكىتىلگەنىن اتاپ ءوتتى. جول كارتاسى قىزمەت كورسەتۋ مەرزىمىن 26 جۇمىس كۇنىنەن 8 جۇمىس كۇنىنە دەيىن قىسقارتۋعا, تالاپ ەتىلگەن قۇجاتتار سانىن ازايتۋعا جانە اتقارىلاتىن جۇمىستى تولىق اۆتوماتتاندىرۋعا مۇمكىندىك بەرەدى.
سونداي-اق, مينيستر 2017 جىلدىڭ سوڭىندا مەملەكەتتىك كىرىستەر كوميتەتىنىڭ «استانا-1» اقپاراتتىق جۇيەسىنىڭ ەلەكتروندىق قىزمەتىن تولىق ەنگىزۋگە بايلانىستى ارنايى سۇرانىس جولداعانىن ەسكە سالدى. وندا بايلانىس ارنالارىنىڭ ىشكى جانە سىرتقى پۋنكتتارىنىڭ وتكىزۋ قابىلەتىن ۇلعايتۋ تۋرالى ايتىلعان.
«وسىلايشا, «استانا-1» اقپاراتتىق جۇيەسىنىڭ جۇمىس ىستەۋى ءۇشىن 119 نىسانعا IP VPN بايلانىس كانالدارى قولدانىلادى. ولاردىڭ 48-ءىن اكىمشىلىك, 71-ءىن كەدەن بەكەتتەرى پايدالانادى. ياعني, 63 كەدەن بەكەتى جەردەگى بايلانىس كانالى ارقىلى, 8 كەدەن بەكەتى - سپۋتنيكتىك بايلانىس ارقىلى قوسىلعان», - دەدى مينيستر.
قازىرگى ۋاقىتتا مينيسترلىك «ۇلتتىق اقپاراتتىق تەحنولوگيالار» اق جانە بايلانىس وپەراتورلارىمەن بىرلەسىپ, كەدەن بەكەتتەرىنە بايلانىس كانالدارىن وتكىزۋ قابىلەتتەرىن ۇلعايتۋ بويىنشا جۇمىستاردى جۇرگىزىپ جاتىر. 2018 جىلدىڭ العاشقى جارتىسىندا 12 كەدەن بەكەتىندەگى بايلانىس جىلدامدىعى ۇلعايعان.
«ال وسى جىلدىڭ ەكىنشى توقسانىندا 52 بەكەتتەگى بايلانىس جىلدامدىعىن ارتتىرۋ جوسپارلانعان. قوسىمشا 7 بەكەت بويىنشا تەحنيكالىق مۇمكىندىكتەر قاراستىرىلىپ جاتىر. اتالعان 7 كەدەن بەكەتىنە قاتىستى بايلانىس وپەراتورلارىنا قولجەتىمدىلىك جىلدامدىعىن ارتتىرۋ تۋرالى سۇرانىس جولداندى. بىراق, وپەراتورلاردىڭ بەرگەن اقپاراتى بويىنشا, قازىرگى ۋاقىتتا تەحنيكالىق مۇمكىندىكتەر جوق. دەگەنمەن, شقو مايقاپشاعاي كەدەن بەكەتىن كەڭ جولاقتى ينتەرنەتپەن قامتاماسىز ەتۋ ءۇشىن «كار-تەل» بايلانىس وپەراتورىمەن تالشىقتى-وپتيكالىق جەلىلەردى سالۋ جوسپارلانىپ وتىر», - دەدى د. اباەۆ.
ايتا كەتەيىك, قارجى ءمينيسترى باقىت سۇلتانوۆ قر پرەمەر-ءمينيسترى باقىتجان ساعىنتاەۆقا قازاقستانداعى كەدەن بەكەتتەرىندە جىلدامدىعى جوعارى بايلانىس ارنالارىنىڭ جوقتىعىن جانە ۆيرتۋالدى قۋات رەسۋرستارىنىڭ جاقىندا سارقىلاتىنىن ايتىپ, وسى ماسەلەنى تەزدەتىپ قاراۋدى سۇرادى.
