جيىن بارىسىندا اۋداندىق توتەنشە جاعدايلار جانە سانيتارلىق ەپيدەميولوگيالىق قاداعالاۋ بولىمدەرىنىڭ باسشىلارى بازارلارداعى بۇگىنگى حال-اقۋالدى بايانداپ بەردى. ولاردىڭ ايتۋىنشا, اۋدانداعى بىرقاتار بازارلاردا ورتكە قارسى شارالارعا دايىندىق جۇمىستارى جۇرگىزىلمەي وتىر. ماسەلەن, اۋداندىق توتەنشە جاعدايلار ءبولىمىنىڭ باسشىسى باحادىر بەكنازاروۆ ءورت كەزىندە سۋ جەتكىزەتىن گيدرانتتاردىڭ "كۇلپارشىن" بازارىندا عانا ورناتىلعاندىعىن, سونداي-اق بۇل قۇرىلعى "ساپار" بازارىندا ەندى عانا ورناتىلىپ جاتقاندىعىن ايتتى.
ءبولىم باسشىسى كوپتەگەن بازارلاردا ساۋدا قاتارلارىنىڭ ارا قاشىقتىعى جاقىن ورنالاسقاندىقتان, ءورت ءسوندىرۋ كولىكتەرى ءتىلسىز جاۋ شىققان جەرگە جەتە المايتىندىعىن العا تارتتى. وسى رەتتە, ءسوز العان اۋدان باسشىسى بازار باسشىلارىن ءورت قاۋىپسىزدىگىنىڭ تالاپتارىن ساقتاۋعا جانە جابايى ساۋدا نۇكتەلەرىن جابۋدى, سونداي-اق, اۆتوتۇراق ماسەلەسىن ەرتەرەك شەشۋگە شاقىردى. سونىمەن قاتار, مەملەكەت تاراپىنان بەرىلەتىن ءتۇرلى جەڭىلدىكتەردى ءتيىمدى پايدالانۋ ءۇشىن بارلىق قۇجاتتاردىڭ زاڭدى راسىمدەلۋىن تەز ارادا رەتتەۋ قاجەتتىگىن ەسكەرتتى.
"بۇگىندە اۋدانىمىزدا 12 بازار حالىققا قىزمەت ەتەدى. الايدا, بازارلاردىڭ ورتتەن قورعالۋى, سانيتارلىق جاعدايى, ساۋدا نۇكتەلەرىنىڭ رەتسىز ورناتىلۋى, اۆتوتۇراقتاردىڭ ازدىعى, جابايى ساۋدا سياقتى ماسەلەلەر جوق ەمەس. ال, گيدرانتتار مەن سۋ حاۋىزدارىن ورناتۋ بويىنشا ۇسىنىس بەرىلگەن, دەگەنمەن ناتيجە بولماي وتىر. ەڭ باستىسى, بازارعا كەلۋشىلەر مەن ساۋداگەرلەردىڭ كاسىپتەرىنە ەشقانداي قاۋىپ تونبەۋى كەرەك. تاۋار ساقتاۋ قويمالارى ءورت شىعا قالعان جاعدايدا جاۋاپكەرشىلىكتەن قاشپاۋى ءتيىس" - دەپ ەسكەرتتى اۋدان باسشىسى ج.قاناي ۇلى.
مۇنان سوڭ ءسوز العان اۋداندىق ساۋلەت, قالا قۇرىلىسى جانە قۇرىلىس ءبولىمىنىڭ باسشىسى سانسىزباي سەيداليەۆ بازارلاردىڭ باس جوسپارى قايتا جاسالۋى كەرەكتىگىن اتاپ ءوتتى. "ساۋدا قاتارلارى مەن نۇكتەلەرىنىڭ ورنالاسۋى, ونىڭ كىرىس-شىعىس قاقپاسى, اۆتوتۇراق ت.ب. وبەكتىلەرى باس جوسپار بويىنشا بەكىتىلىپ, جاسالىنۋى ءتيىس" - دەدى ءبولىم باسشىسى.
جيىندى قورىتقان اۋدان اكىمى الداعى ۋاقىتتا بازارلاردا اپتانىڭ 1 كۇنىن "سانيتارلىق كۇن" دەپ بەلگىلەۋدى ۇسىنىپ, ءتيىستى مەكەمەلەرگە زاڭدىلىعىن انىقتاۋدى تاپسىردى.
