وبلىستا اتالعان باعدارلامانى جۇزەگە اسىرۋ ءۇشىن بيىلعا 6,4 ميلليارد تەڭگە قاراستىرىلعان. بۇل وتكەن جىلمەن سالىستىرعاندا 1,6 ميلليارد تەڭگەگە ارتىق. ارينە مۇنىڭ ءوزى قاناعات تۇتۋعا تۇراتىنداي ءارى قولعا الىنعان ءىستى اياعىنا دەيىن جەتكىزۋگە بولاتىنداي سوما. سوندىقتان دا قازىرگى كەزدە ىلكىمدى ءىستىڭ باسى-قاسىنداعىلار بولىنگەن قاراجاتتى ۋاقىتىندا يگەرۋدى ءارى ونى ءتيىمدى تۇردە جۇمساۋدى باستى ماقسات ەتكەن. وسى ورايدا وڭىردە جۇمىسسىزدىقتى 4,8 پايىزدىق كورسەتكىشتەن جوعارىلاتپاۋ كەرەكتىگى باستى نازارعا الىنعان.
بۇگىنگى كۇنى باعدارلامانىڭ جۇزەگە اسۋ بارىسى جونىندە نە دەۋگە بولادى؟ بۇعان دەيىنگى تالداۋلار ءدال قازىرگى كەزدە بۇل ماسەلەدە ايتا قالارلىقتاي قىزۋ قارقىن تۋعىزىلا قويماعانىن كورسەتەدى. ءبىرىنشى ناۋرىزداعى دەرەككە قاراعاندا, جىلدىق ءىس-جوسپاردىڭ 10,3 پايىزى عانا ورىندالعان. ارينە تاپسىرمانى ورىنداپ ۇلگەرۋگە ۋاقىت بار. ەگەر الداعى ۋاقىتتا ءوزىن-ءوزى جۇمىسپەن قامتۋدى بەلگىلى ءبىر ناتيجەگە قول جەتكىزە الماي جۇرگەن ازاماتتارعا كورسەتىلەتىن قولداۋ دەڭگەيى ودان ءارى كوتەرىلسە, بۇل جاعداي نەگىزگى كورسەتكىشتىڭ وسۋىنە دە سەپتىگىن تيگىزە الاتىنى ايقىن. ءدال وسىنداي ءتۇيىندى مۇلدەم جۇمىسسىز جۇرگەندەر مەن تۇرمىسى تومەن تۇرعىندارعا قاتىستى دا ايتۋعا ابدەن بولادى.
اقتوبە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قايرات وتاروۆتىڭ ايتۋىنشا, اتالعان باعدارلاما شەڭبەرىندە بيىل 1000-نان استام ادام تەگىن كاسىپتىك-تەحنيكالىق بىلىممەن قامتىلماق. بۇل باعىتتا ەڭبەك نارىعىندا سۇرانىسقا يە ماماندىقتاردى وقىتۋعا باسىمدىق بەرىلۋدە. ونى رەتتەۋ ءۇشىن ايماقتا دۋالدى وقىتۋدىڭ قىسقا مەرزىمدى كۋرستارى ۇيىمداستىرىلعان. بۇعان 2300-گە جۋىق ادام تارتىلماق. ارينە بۇل ارادا باستى ماقسات تەك سەرتيفيكات تابىستاۋ ەمەس, اتالعان كۋرستاردى اياقتاعان سوڭ ازاماتتاردىڭ تۇراقتى قىزمەتكە ورنالاسۋى بولماق. وتكەن جىلى مۇنداي كۋرستاردان وتكەن تۇرعىنداردىڭ 93 پايىزى جۇمىسقا كىرگەنىن ەسكەرسەك, مۇنى تومەن كورسەتكىش دەي المايمىز.
تۇرعىنداردى جۇمىسپەن قامتۋ جونىندەگى ءىس-قيمىل جوسپارىنىڭ بيىلعى تاعى ءبىر ەرەكشەلىگى وبلىستاعى بارلىق اۋداننىڭ تۇرعىندارىن كاسىپكەرلىك باستاۋلارى مەن نەگىزدەرىنە باۋلۋ مەن داعدىلاندىرۋ بولىپ وتىر. وسىعان وراي «باستاۋ بيزنەس» دەپ اتالعان ارنايى كۋرستار اشىلعان. وتكەن جىلى ونىڭ قامتۋ دەڭگەيى 6 اۋداننان اسپاسا, بيىل بۇل كورسەتكىش اۋداندار بويىنشا ءجۇز پايىزعا جەتكىزىلۋى ءتيىس. وسى ارقىلى وبلىستىڭ شالعاي وڭىرلەرىندە ورنالاسقان تۇرعىندار كاسىپكەرلىكتىڭ قىر-سىرىنا قانىعىپ, قارجىلىق ساۋاتتىلىقتىڭ العاشقى الىپپەسىن بويلارىنا سىڭىرمەك. ولاردىڭ باسىم بولىگى شاعىن نەسيەلەرمەن قامتۋعا ارنالعان كۋرستاردا وقيدى دەپ كۇتىلۋدە. بۇل باعدارلامانىڭ تۇرعىندارعا تيگىزەتىن تاعى ءبىر شاپاعاتى رەتىندە شاعىن بيزنەس پەن كاسىپكەرلىكتى دامىتۋ ءۇشىن ارنايى گرانتتار بولىنەتىندىگىن ايتۋعا بولادى. مۇنىڭ ءوزى مەملەكەت باسشىسى نۇرسۇلتان نازارباەۆتىڭ شاعىن نەسيە بەرۋدى كوبەيتۋ جونىندەگى ءتورتىنشى باستاماسىمەن ۇندەسە الاتىن يگى قادام.
ارينە بۇل مىسالعا قاراپ وڭىردە شاعىن نەسيە بەرۋدى كوبەيتۋ ءىسى تۇبەگەيلى شەشىمىن تاۋىپ ۇلگەرگەن ەكەن دەپ ءتۇيىن جاساۋعا بولمايدى. بۇل باعىتتاعى جۇمىستاردى الداعى ۋاقىتتا بۇعان دەيىنگى كەزدەگىدەن دە بەلسەندىرەك جۇرگىزۋى كەرەكتىگى ەشقانداي تالاس تۋعىزبايدى. سونىڭ ءبىر تارماعى شاعىن بيزنەستى دامىتۋعا گرانتتار بولەتىن دامۋ ينستيتۋتتارىمەن ارىپتەستىك بايلانىستاردى ودان ءارى تەرەڭدەتۋدە جاتىر.
تاعى ءبىر ايتا كەتەرلىك ماسەلە وتكەن جىلى وبلىستا شاعىن نەسيەلەر ءۇشىن 2,5 ميلليارد تەڭگە جۇمسالعان بولسا, بيىل مەملەكەت باسشىسىنىڭ باستاماسىنا بايلانىستى ونىڭ مولشەرىن ءوسىرۋ كوزدەلگەن. سونداي-اق قازىرگى ۋاقىتتا وبلىستا ەكونوميكالىق بەلسەندى حالىقتىڭ 31 پايىزى شاعىن جانە ورتا بيزنەسپەن اينالىسىپ ءجۇر. بۇگىنگى كۇنى وبلىستا جۇمىسپەن قامتۋعا ىقپال ەتۋ جونىندەگى ءىس-شارالار كەشەنى ەتەك-جەڭىن جيناقتاپ كەلەدى. ءسوز جوق, بۇل يگى قادام, ىلكىمدى ءىس.
تەمىر قۇسايىن,
«ەگەمەن قازاقستان»
اقتوبە وبلىسى
