كەشە وتانداسىمىز جۇلدە قورى 8 ميلليون دوللاردى قۇرايتىن جارىستىڭ ءتورتىنشى اينالىمىنا شىقتى. دياس ەكى ساعاتقا جالعاسقان ءۇشىنشى اينالىمدا گەرمانيالىق كارينا ۋيتحوفتى (الەمنىڭ 57-راكەتكاسى) جەڭدى. بۇل كەزدەسۋدە زارينا قارسىلاسىنا قاراعاندا ساۋاتتى ويىن كورسەتىپ, جەڭىسكە ابدەن لايىق ەكەنىن كورسەتتى.
كەزدەسۋدىڭ ءبىرىنشى سەتىندە قازاقستاندىق تەننيسشى گەرمانيالىق قارسىلاسىنان 4:6 ەسەبىمەن جەڭىلىپ قالدى. ەكىنشى سەتتە دە دياس كارينا ۋيتحوفقا 4:5 ناتيجەسىمەن ەسە جىبەرىپ جاتقان. الايدا اقىلى مەن كۇشىن ءبىر ارناعا توعىستىرا بىلگەن جەرلەسىمىز گەرمانيالىق تەننيسشىدەن جەڭىستى ج ۇلىپ الدى. ەسەپ – 7:5. ەكىنشى سەتتە زارينا وڭ اياعىنان جاراقات الىپ, مەديتسينالىق كومەك الۋعا ءماجبۇر بولدى. دەگەنمەن دارىگەرلەر وتانداسىمىزعا دەر كەزىندە قاجەتتى ەمدى قولدانىپ, وعان جارىستى جالعاستىرۋىنا بولاتىنىن ايتتى.
ال ءۇشىنشى سەتتە دياس ۋيتحوفقا ەش مۇمكىندىك قالدىرماي, 6:0 ەسەبىمەن ايقىن ۇتىپ, بۇل سەتتى دە ءوز پايداسىنا شەشتى. گەرمانيالىق تەننيسشى ءدال جانە انىق سوققى جاساعانىمەن, زارينا ونىڭ شابۋىلدارىنا تويتارىس بەرىپ وتىردى. ويىنداعى قورىتىندى ەسەپ – 4:6, 7:5, 6:0.
بۇل ەكى تەننيسشىنىڭ ءوزارا ەكىنشى رەت كەزدەسۋى. بۇعان دەيىن زارينا دياس پەن كارينا ۋيتحوف 2016 جىلدىڭ مامىر ايىندا فرانتسيادا وتكەن French Open ءتۋرنيرىنىڭ العاشقى كەزەڭىندە جولىققان. ول ويىندا دا وتانداسىمىز 2:6, 6:4, 6:2 ناتيجەسىمەن جەڭىسكە جەتكەن بولاتىن. ەكى تەننيسشى اراسىنداعى جەكە كەزدەسۋ بويىنشا زارينا دياس 2:0 ەسەبىمەن الدا تۇر.
زارينا دياس Miami Open ءتۋرنيرىنىڭ ەكىنشى اينالىمىندا «ۇلكەن دۋلىعا» ءتۋرنيرىنىڭ ەكى جارىسىن جەڭىپ العان (2004 جىلعى اقش اشىق چەمپيوناتى مەن 2009 جىلعى فرانتسيا اشىق چەمپيوناتى) رەسەيلىك تەننيسشى سۆەتلانا كۋزنەتسوۆانى جارىس جولىنان شىعارىپ جىبەردى. ەكى سەتكە سوزىلعان ويىندا زارينا دياس قارسىلاسىنان 6:1, 6:3 ەسەبىمەن باسىم تۇسكەن-ءدى. ايتا كەتەيىك, قازىرگى تاڭدا كۋزنەتسوۆا الەمنىڭ 37-راكەتكاسى. ال ءبىرىنشى اينالىمدا جەرلەسىمىز امەريكالىق دجەنيففەر برەديدەن (الەمنىڭ 80-راكەتكاسى) 7:5, 7:6 ەسەبىمەن باسىم تۇسكەن.
ەندى زارينا دياس بۇگىن Miami Open ءتۋرنيرىنىڭ شيرەك فينالىندا الەمنىڭ التىنشى راكەتكاسى چەحيالىق كارولينا پليشكوۆامەن وينايدى. جەڭىسكە جەتكەن تەننيسشى شيرەك فينالعا شىعادى. ماياميدەگى جارىس 1 ساۋىردە اياقتالادى.
ءالي بيتورە,
«ەگەمەن قازاقستان»
