«قالا تۇرعىندارى مەن قوناقتارىنا ەكى كۇننەن بەرى تەگىن دونەر تاراتىلىپ جاتىر» دەگەندى ەستىپ مۇراتباەۆ پەن گوگول كوشەسىنىڭ قيىلىسىنداعى شاعىن دامحاناعا باس سۇقتىق. بارساق, ايتقانداي-اق تەگىن تاعامنان ءدام تاتساق دەپ كەلگەندەردىڭ سانىندا ەسەپ جوق. ۇزىن-سونار كەزەك. كۇنى كەشە عانا اشىلعان «دياديا دونەر» تاماقتانۋ ورتالىعىنىڭ قىزمەتكەرلەرىنىڭ ايتۋلارىنشا, بۇل شارا ەڭ الدىمەن ناۋرىز مەرەكەسىنىڭ قۇرمەتىنە, سونداي-اق ورتالىقتىڭ اشىلۋىنا وراي ۇيىمداستىرىلىپ وتىرعان كورىنەدى. بىرەر كۇننىڭ ىشىندە ەكى مىڭعا تارتا تۇرعىن ءتىل ۇيىرەتىن تۇرىك تاعامىمەن تەگىن تاماقتانعان. كەلۋشىلەردىڭ باسىم بولىگى ستۋدەنت جاستار.
«تاعامنىڭ ءدامى ەرەكشە. وسىمەن ەكىنشى مارتە كەلىپ تەگىن تاماقتاندىم. ناعىز مەرەكە ەكەنى سەزىلەدى. وسىنداي شارالار ءجيى ۇيىمداستىرىلىپ تۇرسا, اسىرەسە, ءبىز سياقتى ستۋدەنتتەرگە ۇلكەن ولجا بولار ەدى», دەيدى ەۋرازيا تەحنولوگيالىق كوللەدجىنىڭ ستۋدەنتى اسحات ۇسەنوۆ.
ورتالىقتىڭ باسشىسى جاس كاسىپكەر البەرت ەرنازاروۆ: «بابالارىمىزدان كەلە جاتقان ۇلىستىڭ ۇلى كۇنى – ناۋرىز مەرەكەسىندە الماتىلىقتارعا توسىن سىي جاساۋدى ۇيعاردىم. ويتكەنى ناۋرىز بارلىق بەرەكە مەن مولشىلىقتىڭ باستاۋى. ناۋقان ءۇش كۇن بويى جالعاسپاق. كەلەم دەۋشى كەز كەلگەن جانعا ەسىگىمىز اشىق. باستى ماقساتىمىز حالىقتىڭ ريزاشىلىعىن الىپ, ءتول مەرەكەمىزدى اسپەتتەۋ» دەيدى.
بۇگىنگى تاڭدا ءبىر عانا الماتىنىڭ وزىندە بەس مىڭنان استام تاماقتانۋ ورتالىعى بار. ولاردىڭ ءبىرازى البەرت سياقتى كاسىپكەرلەردەن ۇلگى السا قايىرىمدىلىق شارالارى كەڭگە قانات جايىپ, ناۋرىز مەيرامىنىڭ داڭقى ودان بەتەر اسپانداي تۇسەتىن ەدى...
ارمان وكتيابر,
«ەگەمەن قازاقستان»
الماتى
