باۆارلىق باس اسپاز «SES» حالىقارالىق ىنتىماقتاستىق باعدارلاماسى اياسىندا پەتروپاۆل قالاسىنا ارنايى كەلىپ, تەگىن شەبەرلىك ساعاتتارىن وتكىزدى. نەشە ءتۇرلى تاعامداردىڭ وزىنە عانا ءمالىم دايىنداۋ قۇپيالارىمەن ءبولىستى. «SES» جوباسىنىڭ رەسمي وكىلى يرينا ۆاسيلەۆانىڭ ايتۋىنشا, قازاقستان مەن گەرمانيا اراسىنداعى ەرىكتىلەردىڭ ءوزارا تاجىريبە الماسۋلارى 2004 جىلدان بەرى جالعاسىپ كەلەدى. وسى ارالىقتا كوپتەگەن كاسىپ يەلەرى حالىقارالىق سەرتيفيكات الىپ شىققان. بۇگىندە بىرلەستىكتىڭ قۇرامىندا 10 مىڭعا جۋىق شەبەرلىگى جوعارى ماماندار بار.
– جاراتقاننىڭ بەرە سالعان قاسيەتى مە ەكەن, بالا كەزىمنەن اس قامداۋعا وتە ەپتى, بەيىم بولدىم. بىراق اتا-انام اسپاز ەمەس, باسقا ماماندىق يەسى بولۋىمدى قالادى. گيمنازيادا وقىپ جۇرگەندە كونە گرەك, لاتىن تىلدەرىن مەڭگەرىپ, كەيىن اعىلشىن, حورۆات, ورىس تىلدەرىن ۇيرەندىم. ات جالىن تارتىپ مىنەر شاققا جەتكەندە ءوز ۇيعارىمىم بويىنشا 3,5 جىل وقىپ, داياشى جانە اسپاز ماماندىقتارىن الىپ شىقتىم. اسپازدىقتىڭ تىلسىم سىرلارىن يگەرۋدىڭ ەش قيىندىعى جوق. ەڭ باستىسى ىنتا, جىگەر, تالاپ بولسىن, دەيدى جارتى عاسىرعا جۋىق جۇمىس ءوتىلى بار ءوز ءىسىنىڭ بىلگىرى.
ايتۋىنشا, قازاقستاندا ەكولوگيا تازا. تابيعي ونىمدەردەن جاسالعان ازىق-ت ۇلىك قۇنارلى, اعزاعا ءسىڭىمدى. قازىر كوپتەگەن ەلدەر ادام دەنساۋلىعىن ويلاعاننان گورى تەزىرەك تابىس تاۋىپ, بايىعىسى كەلەدى. جاساندى دامدەۋىشتەر كۇرت كوبەيىپ كەتتى. سونىڭ سالدارىنان جاستار ءتۇرلى كەسەلدەرگە تەز شالدىققىش. ويتكەنى اعزادا اۋرۋعا قارسى تۇرۋ يممۋنيتەتى ءالسىز. شامادان تىس سەمىرۋ دە بەلەڭ الىپ بارادى.
ول شەبەرلىك ساعاتتارىنىڭ بىرىندە يتاليالىق «فيتتۋچچيني» تاعامىن ازىرلەۋدىڭ وزىندىك تاجىريبەسىمەن تانىستىردى. جەتپىستى ەڭسەرسە دە قيمىلىنا كوز ىلەسپەيدى, قولى-قولىنا جۇقپايدى. ونىڭ اس ازىرلەۋ ماشىعىن تاپجىلماي باقىلىپ تۇرعان «Beer-Grad» مەيرامحاناسىنىڭ اعا اسپازى الەكساندر ميحەەۆ مىنا اقساقالعا ىلەسۋ قايدا دەگەندەي باسىن شايقاپ قويادى. باۆارلىق برەتسەل, نان توقاشتارى مەن دەسەرتتەردى زاماتتا دايىنداپ بەردى. كارتوپ سالاتىنىڭ ونعا جۋىق ءتۇرىن جاساعان ونىڭ شەبەرلىگى شىنىندا دا قايران قالدىرماي قويمايدى.
«باسقا جاقتى قايدام, گەرمانيادا اسپازدىق ونەر رەتىندە باعالانادى. كۋلينارلىق ءدارىس ساباقتارىنىڭ باعاسى 3,5 مىڭ ەۋروعا دەيىن بارادى. سوندىقتان ۋاقىتتى بوسقا جىبەرمەي تەگىن اقىل-كەڭەس الىپ قالىڭىزدار», دەپ ارا-اراسىندا قالجىڭداپ تا قويادى.
ەڭبەك جولىن 20 جاسىندا ميۋنحەندەگى ەليتالىق مەيرامحانالاردىڭ بىرىنەن باستاپ, كوپ جىل بويى اعا, باس اسپاز بولىپ جۇمىس ىستەپتى. 44 جاسىندا ەكونوميست-مەنەدجەر ماماندىعىن الىپتى. ارالاماعان مەملەكەتى, جەڭىپ الماعان جۇلدەسى جوق سەكىلدى. زەينەتكە شىقسا دا, لەكتسيالار وقۋعا, كونكۋرستارعا جەتەكشىلىك ەتۋگە, شەبەرلىك ساعاتتارىن وتكىزۋگە شاقىرعان وتىنىشتەر از ەمەس.
قازاقتىڭ ۇلتتىق تاعامدارىنا قالاي قارايسىز, قايسىسىن ۇناتاسىز دەگەن سۇراققا «ەت اسۋ» دەگەندەي باس بارماعىن كورسەتتى. قازاق – ەرەكشە جاراتىلعان جاۋىنگەر حالىق, ەشكىمگە ۇقسامايدى. مىنەزى كەڭ, قۇشاعى اشىق, كوڭىلى جومارت. الايدا مايلى تاعامعا قۇمارلىق, داستارقان باسىندا كوپ وتىرۋ جارامايدى. ەتتى نەگىزگى تاعام رەتىندە تۇتىنۋعا بولمايدى دەگەنى ەسكەرتۋدەي ەستىلدى. داستارقانعا جەمىس-جيدەكتىڭ كوبىرەك قويىلۋىن قالايدى. قازاقتار سەكىلدى سۇتتەن جاسالعان ءمازىردى ۇناتامىن, تاماقتى تالعاپ جەگەنگە نە جەتسىن, دەپ قوسىپ قويدى.
قىزىلجار جەرىندە ءالى بولامىن. ناۋرىز مەيرامىنا قاتىسىپ, قازاقتىڭ سالت-داستۇرلەرىمەن, تاعامدارىمەن كەڭىرەك تانىسقاننان كەيىن ۇلتتىق شەبەرلىك ساعاتتارىن وتكىزۋدەن باس تارتپاس ەدىم. وسى كۇندى تاعاتسىزدانا كۇتىپ ءجۇرمىن, دەگەن سوزدەرى ادام جانىنا جىلىلىق ۇيالاتادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
