مەنىڭ انام دىلداقىز يسمايلوۆا جاسى ۇلعايعاندا جۇرەگى سىر بەرە باستادى. ونىڭ ۇستىنە پوليارتريت دەگەن كەسەل جابىسىپ, ساۋساقتارىن قيمىلداتا الماي قالىپ ەدى. ول كەزدە مەن الماتىدامىن. شەشەمدى ەمدەتۋ ءۇشىن اۋىلدان الىپ كەلىپ, قالاداعى كارديولوگيا ينستيتۋتى جانىنداعى ەمxاناعا جايعاستىردىق. ەمدەۋ مەكەمەسىنىڭ ۇجىمى باتىر انا كەلدى دەپ ونى جاقسى قابىلدادى.
ەمدەۋشى دارىگەر رەتىندە زەينەتكەرلىك جاسقا كەلسە دە, قىزمەتىن جالعاستىرىپ كەلە جاتقان اننا اندرەەۆنا بەلوۋسوۆا دەگەن كىسى تاعايىندالدى. شەشەمىزدىڭ جاعدايى ءۇشىن ول كىسىگە جالپاقتاپ, ءارتۇرلى جاقسىلىق جاساعىمىز كەلەدى, بىراق ول ءوزىن وتە مادەنيەتتى, بورىشىنا ادال ادام رەتىندە كورسەتتى. كەرىسىنشە, ول كەزدە تابىلا بەرمەيتىن دارىلەردى ىزدەۋگە ءوزى كومەكتەسىپ, باسقا دا اقىل-كەڭەستەرىن ايتىپ وتىراتىن. شىنىن ايتۋ كەرەك, سىرت قاراعاندا ەشقانداي جاقىندىعى جوق, باسقا ۇلت وكىلىنىڭ مۇنداي بيىك ادامگەرشىلىك قاسيەتى ءبىزدى تاڭعالدىردى. ونىڭ ۇستىنە دارىگەر انامىزعا ەرەكشە كوزقاراسپەن قاراپ, كەيبىر اسا جاۋاپتى ەمشارالاردى مەدبيكەلەرگە جۇكتەمەي, ءوزى جاسايتىن. ويتكەنى ەكى دەرتتىڭ ەمدىك شارالارىن ءبىر-بىرىنە ۇيلەستىرۋ قيىندىق تۋعىزدى.
جۇمىستان كەش قايتاتىندىقتان اۋرۋxاناعا تۇسكى ءۇزىلىستى پايدالانىپ, كۇندەلىكتى بارىپ تۇراتىنمىن. سونداي ءبىر كەزەكتى كەلگەنىمدە اننا اندرەەۆنا پالاتادا شەشەمە ارنايى ەلەكتر اپپاراتىمەن ەمشارا جاساپ وتىر ەكەن. ۇلكەن پالاتادا بەس-التى ادام جاتادى. مەن ولارمەن امانداسىپ, جانىندا اڭگىمەمدى ايتىپ وتىرعانمىن. ءبىر كەزدە اۋرۋxانانىڭ ءبىر قىزمەتكەرى ەسىكتەن جۇگىرىپ كەلىپ: – اننا اندرەەۆنا, ءسىزدىڭ ءۇيىڭىز ورتەنىپ جاتىر, – دەپ xابارلادى. ول كىسى ەستىدىم دەگەندەي باسىن ءبىر شۇلعىپ, جۇمىسىن جالعاستىرا بەردى. حاباردى ەستىپ وتىرىپ مەنىڭ مازام كەتتى. سالدەن كەيىن جاڭاعى كىسى تاعى كەلىپ: – ماما, سەنىڭ ءۇيىڭ ورتەنىپ جاتىر (سويتسەم ءوزىنىڭ تۋعان قىزى دا سوندا دارىگەر ەكەن), نەگە جايباراقات وتىرسىڭ؟ – دەپ, شەگەلەپ ايتتى. دارىگەرىمىز سابىرلى قالىپپەن: – ءيا, ەستىدىم. كورىپ وتىرسىڭ عوي, مىنا ەمشارانى توقتاتۋعا بولمايدى, – دەپ جاۋاپ بەردى.
ول كىسىنىڭ ۇستامدىلىعىنا تاڭعالىپ, ونىڭ ورنىندا مەن بولسام قايتەر ەدىم دەگەن ويمەن, ءىستىڭ اقىرىن كۇتەيىن دەپ شەشتىم. ون ساۋساققا جەكە-جەكە جاسالاتىن ەمشارا بىتكەسىن, اپپاراتىن جيناستىرىپ, اننا اندرەەۆنا ماعان: – ال بايانباي, ەندى ءوزىڭ اناڭمەن وڭاشا سويلەسە بەر, مەن تاكسيمەن بارىپ ءۇيىمدى كورەيىن, نە بولدى ەكەن؟ – دەپ, شىعىپ بارا جاتىر. – توقتاڭىز, مەن ءسىزدى ادەيى كۇتىپ وتىرمىن, ءوزىم اپارامىن كولىكپەن, – دەپ ارتىنان ەردىم.
ول كىسى قازىرگى قوناەۆ كوشەسىندە, ەسكى كىرپىش ءۇيدىڭ ءبىرىنشى قاباتىنداعى پاتەردە تۇرادى ەكەن. ۇيدە جالعىز وتىرعان كۇيەۋى گاز پليتادا قايناپ تۇرعان شايدى ۇمىتىپ, ءوز شارۋالارىمەن كوشەگە شىعىپ كەتىپتى, سول كەزدە تەرەزەنىڭ پەردەسىنە وت ءتيىپ, جالىنى اشىق تۇرعان فورتوچكادان سىرتقا لاۋلاپتى. مۇنى كورگەن كورشى جىگىتتەر ءبىز كەلگەنشە ۇزىن تاياقپەن گاز پليتانىڭ قۇلاعىن جاۋىپ, وتتى ءسوندىرىپ ۇلگەرگەن ەكەن.
بۇل وقيعاعا قازىر جيىرما جىل بولىپتى. قانشا ۋاقىت وتكەنمەن جوعارى ساناتتى دارىگەر, قاراپايىم ازامات اننا اندرەەۆنا بەلوۋسوۆانىڭ ءۇيى ورتەنىپ جاتىر دەگەن xاباردى ەستي وتىرىپ, سالقىنقاندىلىقپەن ءوز مىندەتىن ابىرويمەن اتقارىپ شىعۋىن ۇلكەن كاسىبي ەرلىك دەپ باعالاپ, بۇگىنگى جاستارعا ۇلگى ەتكىم كەلەدى.
بايانباي يسرايلوۆ
استانا
