بايراقتى باسەكەدە ەل نامىسىن ابىرويمەن ارقالاعان وتانداسىمىزدى قۇتتىقتاۋعا الماتى اۋەجايىنا جينالعانداردىڭ ساپىندا سپورت جانكۇيەرلەرى, جۋرناليستەر مەن قالا تۇرعىندارى بولدى. گولىشەۆادان بولەك وليمپيادا ويىندارىنا قاتىسقان پاۆەل كولماكوۆ, دەنيس تەن, فريستايل موگۋلدان قازاقستان ۇلتتىق قۇراما كومانداسىنىڭ جاتتىقتىرۋشىلارى, سونداي-اق شاڭعى اكروباتيكاسىنان ۇلتتىق قۇراما مۇشەلەرى دە ەلگە ورالدى.
– بۇل مەن ءۇشىن زور قۋانىش. جاۋاپتى ساتتە ماعان تەك كوماندالاستارىم عانا ەمەس, بۇكىل ەلىم قولداۋ كورسەتكەنىنە قاتتى قۋاندىم – دەگەن يۋليا گالىشەۆا وليمپيادادان العان اسەرىمەن ءبولىستى: «وڭتۇستىك كورەياعا ارنايى كەلىپ, «العا, قازاقستان» دەپ بىزگە جاڭكۇيەر بولعان جاندارعا العىس ايتقىم كەلەدى, ولاردىڭ قولداۋى بىزگە كوپ كومەكتەستى. العان اسەرىم وتە كەرەمەت, باسقا جارىستارعا قاراعاندا, بۇل جارىستىڭ ارتقان جاۋاپكەرشىلىگى دە, سىيلاعان اسەرى دە ەرەكشە. ارينە, التىن الامىز دەپ ۇمىتتەنگەن ەدىك, دەگەنمەن ۇزدىك ۇشتىككە ىلىكتىك. مەن ءۇشىن بۇل قولا مەدال – التىنمەن پارا-پار» دەيدى ول.
تورتكۇل دۇنيە كوز تىككەن دودادا جۇلدەگە يە بولۋ يۋليا ءۇشىن وڭاي بولماعانى انىق. وليمپيادا ويىندارىن كوگىلدىر ەكراننان تاماشالاعان كوزى قاراقتى كورەرمەن جەرلەسىمىزدىڭ جارىس جولىنداعى قارسىلاستارىنىڭ وسال بولماعانىن جاقسى بىلەدى. ەشتەڭەگە قاراماستان, بار مۇمكىندىگىن پايدالانىپ ەل قورجىنىنا العاشقى ءارى ازىرگە جالعىز مەدال سالعان سپورتشى قىزعا بارشا وتانداستارىمىزدىڭ اتىنان العىس ءبىلدىرىپ, تولايىم تابىستار تىلەيمىز.
ارمان وكتيابر,
«ەگەمەن قازاقستان»
