قازىرگى تاڭدا قازاقستاننىڭ وليمپيالىق قۇراما كومانداسىنىڭ ساپىندا قاراعاندى وبلىسىنىڭ ءتورت سپورتشىسى بار. ولار – كونكيمەن جۇگىرۋشىلەر ەكاتەرينا ايدوۆا, ستانيسلاۆ پالكين جانە ارتەم كريكۋنوۆ, سونداي-اق شاڭعىشى سەرگەي مالىشەۆ.
تورتجىلدىقتىڭ باستى جارىسىنا دايىندىق باياعىدا باستالىپ كەتكەنىمەن, ءبىزدىڭ سپورتتىق فەدەراتسيالار وڭتۇستىك كورەيادا ەل نامىسىن قورعايتىن سپورتشىلاردىڭ ەسىمدەرىن ەندى اتاي باستادى. مىسالى, كونكيمەن جۇگىرۋ سپورتى بويىنشا ۇلتتىق قۇرامانىڭ جاتتىقتىرۋشىلار شتابى وليمپيالىق كۆوتانى بىلايشا بولىسكە سالدى. قۇرامادا ءبىر عانا سپورتشى قىز بولادى. ول – قاراعاندىلىق جەلاياق كونكيشى ەكاتەرينا ايدوۆا. حالىقارالىق دارەجەدەگى سپورت شەبەرى, جاسوسپىرىمدەر اراسىنداعى الەم كۋبوگىنىڭ ەكى دۇركىن جەڭىمپازى, ازيا چەمپيونى ءۇش بىردەي قاشىقتىقتا – 500, 1000 جانە 1500 مەتر ارالىعىندا باق سىنايدى. ايتا كەتۋ كەرەك, ايدوۆا ءۇشىن بۇل ءۇشىنشى سىناق: بۇدان بۇرىن ول ۆانكۋۆەر جانە سوچي وليمپيادالارىندا ونەر كورسەتىپ, وكىنىشكە قاراي جۇلدەسىز قايتقان بولاتىن.
ەرلەر اراسىندا وليمپيادا ليتسەنزياسىن قۇراما كوماندانىڭ ەڭ جاس كونكيشىلەرى – قاراعاندىلىقتار ارتەم كريكۋنوۆ پەن ستانيسلاۆ پالكين جەڭىپ العان. الدىڭعىسى 500 مەتردە سىنعا تۇسسە, سوڭعىسى 1000 جانە 1500 مەتر قاشىقتىقتاردا جۇلدەگە تالاساتىن بولادى. بۇل ەكەۋى دە حالىقارالىق دارەجەدەگى سپورت شەبەرى, ۋنيۆەرسيادا مەن ازيا ويىندارى دوداسىنا قاتىسقان تاجىريبەلى سپورتشىلار. ءبىر وكىنىشتىسى, باپكەرلەر ستانيسلاۆ پالكيندى ازىرگە قوسىمشا قۇرامدا ۇستاپ وتىر.
سونىمەن قاتار وليمپيادا دوداسىنا تاعى ءبىر قاراعاندىلىق سپورتشى – شاڭعىدان حالىقارالىق دارەجەدەگى سپورت شەبەرى سەرگەي مالىشەۆ تۇسپەك. جاستىعىنا قاراماستان مالىشەۆ اجەپتاۋىر تاجىريبە جيناقتاعان سپورتشى. ول – جاسوسپىرىمدەر اراسىنداعى بەس, جاستار اراسىنداعى ەكى جانە ەرەسەكتەر اراسىنداعى ءبىر الەم چەمپيوناتىنا قاتىسقان. امبەباپ شاڭعىشى ەستافەتا, سپرينت, جاپپاي ستارت جانە كوماندالىق جارىس سياقتى بىرنەشە سىن بويىنشا ونەر كورسەتەدى.
تاياۋ ارادا قاراعاندىلىق تاعى ءبىر شاڭعىشى, حالىقارالىق دارەجەدەگى سپورت شەبەرى اننا ستوياننىڭ وليمپياداعا قاتىسۋ ماسەلەسى شەشىلۋگە ءتيىس. جاس سپورتشى ءۇش بىردەي قىسقى ۋنيۆەرسياداعا قاتىسقان, جاسوسپىرىمدەر اراسىنداعى ءتورت, جاستار اراسىنداعى ءۇش الەم چەمپيوناتىندا ونەر كورسەتكەن. ەگەر دە ستويان الداعى سىناقتان ءساتتى وتەر بولسا, وندا بەس بىردەي قاراعاندىلىق قىسقى وليمپيادادا ەل نامىسىن قورعايتىن بولادى.
قايرات ءابىلدا,
«ەگەمەن قازاقستان»
