دەمالىس ورنى ءوز جۇمىسىن 12 ماۋسىمنان باستادى. جوسپار بويىنشا, ارقايسىسىندا 200 بالا دەمالاتىن ءتورت اۋىسىمدا جاز بويى 800 جەتكىنشەك قامتىلماق. ءار اۋىسىمنىڭ ۇزاقتىعى – 15 كۇن. لاگەرگە از قامتىلعان, كوپ بالالى, اسىراۋشىسىنان ايىرىلعان وتباسىلاردىڭ بالالارى جانە ۇزدىك وقۋشىلار تارتىلۋدا.
– توعىز اي ۋاقىتىن مەكتەپتە وتكىزگەن وقۋشىلار ءۇشىن جازعى دەمالىس مەزگىلى بيىل ەرەكشە بولماق, – دەيدى دەمالىس ورنىنىڭ اشىلۋ سالتاناتىندا ءسوز العان اۋدان اكىمى س.ابەۋوۆا. – دەمالىس ۋاقىتىنىڭ ءتيىمدى ءوتۋى, ەڭ الدىمەن, ونىڭ جۇمىسىنىڭ جۇيەلىلىگىنە بايلانىستى. بالالاردىڭ جازعى دەمالىس ۋاقىتىندا جاقسى ساۋىعىپ قايتۋىنا لاگەردە بارلىق جاعداي جاسالعان. «فاكەل» جازعى لاگەرىندە بالالار دەمالىپ قانا قويماي, كۇن سايىن ساياحاتتار جاساپ, ترەنينگتەر مەن ويىندار, ءارتۇرلى كەشتەر مەن سايىستار وتكىزەدى.
بيىل لاگەردە اقتوعاي اۋدانىنا قاراستى 17 ەلدى مەكەننىڭ 7-15 جاس ارالىعىنداعى بالالارى تىنىعادى. وسى يگى باستامانى قولعا العان وبلىستىق ءماسليحات دەپۋتاتى ايمان بەكبولاتقىزىنا جانە شاشۋباي كەنتى «مەكتەپ-بالاباقشا كەشەنى» ۇجىمىنا, اۋداندىق ءبىلىم بولىمىنە كوپشىلىكتىڭ ريزاشىلىعى زور.
– بىرنەشە جىل بۇرىن بالقاش كەن-مەتاللۋرگيا كومبيناتىنىڭ وندىرىستىك جۇمىس باعىتى حالىقارالىق ستاندارتقا كوشكەن ەدى. ستاندارتقا ساي كاسىپورىن تەك قانا ءوندىرىس باعىتىندا جۇمىس جاساي باستادى. سوندىقتان بۇرىن «قازاقمىس» كورپوراتسياسى اينالىسىپ كەلگەن الەۋمەتتىك قولداۋ باعىتىنداعى جۇمىستار مەن نىسانداردىڭ بارلىعى مەملەكەتكە, ياعني جەرگىلىكتى باسقارۋ ورگاندارىنىڭ قۇزىرىنا وتكەن بولاتىن, – دەيدى وبلىستىق ءماسليحاتتىڭ دەپۋتاتى ايمان بەكبولاتقىزى. – ولاردىڭ قاتارىندا وسى «فاكەل» ساۋىقتىرۋ لاگەرى دە بار. ءتورت جىل بۇرىن وبلىستىق ءماسليحاتتىڭ كوميسسيا وتىرىسىندا اتالعان عيماراتتاردى ساقتاپ قالۋ ماسەلەسىن كوتەرىپ, دەپۋتاتتىق جۇمىسىمنىڭ بارىسىندا باقىلاۋعا العان بولاتىنمىن. قولىمىزعا تيگەن لاگەردى قايتا قالپىنا كەلتىرۋدە قيىندىقتار بولدى. قاجەتتى قارجى كوزىن وبلىس اكىمىنەن سۇرادىق. ەڭبەگىمىز ەش كەتكەن جوق.
ميراس اسان,
«ەگەمەن قازاقستان»
قاراعاندى وبلىسى,
اقتوعاي اۋدانى
