اتالمىش شارامەن ورايلاس قالامگەردىڭ قازاقستاننىڭ تۇركياداعى ەلشىلىگىنىڭ قولداۋىمەن تۇرىك تىلىندە جارىق كورگەن «اقبوز ءۇي» («Arasat Meydan») رومانى مەن ۇلكەن جازۋشى ءابىش كەكىلباەۆتىڭ فيلوسوفيالىق-پسيحولوگيالىق استارى تەرەڭ كەسەك تۋىندىسى «اڭىزدىڭ اقىرى» كىتابىنىڭ دا («End of the legend») اعىلشىن تىلىندە اۋدارىلعان نۇسقاسىنىڭ تۇساۋكەسەر ءراسىمى قاتار ۇيىمداستىرىلدى.
مەرەي جاسقا تولىپ وتىرعان قالامگەر سماعۇل ەلۋباي 1947 جىلى تۇرىكمەنستان جەرىندە دۇنيەگە كەلگەن. 1961 جىلى اۋلەتىمەن بىرگە اتاجۇرتىنا قونىس اۋدارىپ, الماتىداعى №12 ورتا مەكتەپتە وقىعان. 1971 جىلى قازمۋ-ءدىڭ جۋرناليستيكا فاكۋلتەتىن ءبىتىرىپ, شىعارماشىلىق جولعا تۇسكەن. جازۋشىنىڭ شىعارماسىنىڭ باستى ەرەكشەلىگى – ۇزاق جىلعا سوزىلعان وتارشىلىق بۇعاۋعا دەگەن قارسىلىق, سونىمەن قاتار قازاقتىڭ كونە تانىمىن بويىنا تەرەڭ سىڭىرگەن ادام رەتىندە شىعارمالارىنىڭ رۋحاني-ۇلتتىق بوياۋى قانىق, جازۋ ءستيلى قوسپاسىز قازاقى.
قالامگەردى قازاق ادەبيەتى اتتى شالقارعا اكەلىپ قوسقان تولقۇجاتى سياقتى تۋىندىسى, ارينە «اقبوز ءۇي» رومانى. بۇل تۋىندىدا نەگىزىنەن قۋعىن-سۇرگىن, اشارشىلىق جىلدارى قازاق اۋىلدارىنىڭ باستان كەشىرگەن قيىن تاعدىر-تالايى ءسوز بولادى. – وسى دۇنيەنى جازۋعا 30 جىل دايىندالدىم, – دەيدى جازۋشى. وقيعالار سورابى كوكەيدە ابدەن ءپىسىپ, تولىسقان شاقتا ءبىر شوپاننىڭ كيىز ۇيىندە جاتىپ الىپ جازىپ شىققان.
كەش ۇستىندە شىعارماشىلىق تۇلعا جايلى اقجارما تىلەك ايتقان قوعام قايراتكەرى مىرزاتاي جولداسبەكوۆ, «سماعۇل وتە ويشىل, باپپەن سويلەيتىن جانە كوپتىڭ كوكەيىندەگى دۇنيەنى تاۋىپ ايتاتىن سۇڭعىلا ادام» دەسە, مەملەكەتتىك سىيلىقتىڭ لاۋرەاتى جازۋشى انەس ساراي, جازۋشىنىڭ شىعارماسىن وقىعاندا ونداعى وقيعالار كوزگە ەلەستەپ وتىرادى, بۇل ەكىنىڭ بىرىندە كەزدەسە بەرمەيتىن شەبەرلىك, ونىڭ كينەماتوگرافياعا تەز بوي ۇرۋى وسى قابىلەتىنەن ەكەنىن ەرەكشەلەپ ايتتى.
اكادەميك عاريفوللا ەسىم جالپى قازاق ادەبيەتىنىڭ ۇلتتىق-يدەولوگيالىق ماڭىزى جايلى وي قوزعاپ, «قازاق سوۆەت ادەبيەتى» جانە «قازاق ادەبيەتى» اتتى ەكى ۇعىمنىڭ اراجىگىن انىقتايتىن ۋاقىت جەتكەنىن اتاپ ءوتتى. باسقوسۋدى تۇيىندەۋ ءۇشىن مىنبەگە كوتەرىلگەن فيلولوگيا عىلىمدارىنىڭ دوكتورى تۇرسىن سىدىقوۆ مىرزا كەش يەسىنىڭ جازۋشىلىق شەبەرلىگى مەن ونىڭ شىعارمالارىنداعى – كەلەلى ويلار, ءتۇيىندى تولعامدار, سالت-ءداستۇر, ۇلتتىق قۇندىلىقتارعا باي سيپاتى قالامگەردىڭ ادامي بۇلجىماس دىڭگەگى ەكەنىن, اسىرەسە, قازاق كينو ونەرى كينودراماتۋرگيادا اتقارعان ەڭبەكتەرى ەل مەن حالىق تارابىنان لايىقتى باعاسىن الۋى ءتيىس دەگەنگە توقتالدى.
بەكەن قايرات ۇلى,
«ەگەمەن قازاقستان»
