بۇگىنگى ايتپاعىمىز «اربات» جايلى ەمەس, ون سەگىز جىلدان بەرى وسى «اربات» الاڭىندا وتىرىپ سۋرەت سالاتىن كاسىبي سۋرەتشىلەر – ەرلى-زايىپتى باقىت پەن گاۋھار نۇربەكوۆتەر تۋرالى بولماقشى.
باقىت پەن گاۋھار قازاق مەملەكەتتىك كوركەمسۋرەت اكادەمياسىن بىرگە ءبىتىردى. ونەر تابىستىرعان جانداردىڭ كوركەم دۇنيەگە دەگەن ىستىق ماحابباتى ءمولدىر سەزىمگە ۇلاسىپ, ەكى جاس وقۋ بىتىرىسىمەن وتاۋ قۇردى. «اربات» الاڭى ونەرىنەن ءناسىبىن ايىرىپ وتىرعان جانداردىڭ ەكىنشى ۇيىنە اينالعالى قاشان.
كەزىندە شىعارماشىلىق يەلەرىن قولداۋ ماقساتىندا الماتىلىق سۋرەتشىلەردىڭ «ارباتتا» تۇرىپ سۋرەت سالۋىنا, تۋىندىلارىن ساتۋىنا مۇمكىندىك جاسالعان ەدى. سول ءۇردىستى قازىرگى قالا باسشىلىعى دا جالعاستىرىپ وتىر. تۋىندىلارىن ساتقانى ءۇشىن سۋرەتشىلەر سالىق تولەمەيدى, قىلقالام شەبەرلەرىنىڭ ونەر ورتاسى ىسپەتتى بۇل الاڭقاي.
ادامدى ءا دەگەننەن باۋراپ الاتىن سۋرەتتەرىنە قىزىعىپ تۇرىپ «ارباتتىڭ» «تۇرعىنى» گاۋحاردى اڭگىمەگە تارتتىق.
«قۇدايعا تاۋبە, تابىسىمىز جامان ەمەس. سۋرەت ونەرى كوپ ەلدەردە وتە جوعارى باعالانادى. ەلىمىزدە دە سۋرەتشىلەرگە ايتارلىقتاي كوڭىل بولىنەدى, دەگەنمەن, قىلقالام يەلەرىنىڭ بارىنە ءبىردەي قولداۋ كورسەتىلە بەرمەيدى. جەكە كورمەڭدى وتكىزۋ ءۇشىن قىرۋار قارجى قاجەت. كۇندەلىكتى بالا-شاعامىزدىڭ شاي-پ ۇلىن تاۋىپ وتىرعان ءبىزدەر ءۇشىن بۇل قيىن شارۋا. سوندىقتان تۋىندىلارىمىزدى وسىندا اكەلىپ ساۋدالاۋعا ءماجبۇرمىز», دەيدى گاۋھار نۇربەكوۆا.
جۇمىس بارىسى كوز الدىندا ءوربىپ, ءوزىنىڭ بەينەسىن ءاپ-ساتتە اينىتپاي سالىپ بەرەتىندىكتەن بولار, جاز بەن كۇز ايلارىندا ءارى-بەرى وتكەن حالىقتىڭ پورترەت سالدىرۋعا قىزىعۋشىلىعى باسىم كورىنەدى.
– ستۋدەنتتىك كۇنىمدە ۇلتىمنىڭ اتىن ۇرانعا اينالدىراتىن الەمگە ايگىلى سۋرەتشى بولسام دەگەن ارمانىم بار ەدى. ول ارمانىمنان الىستاپ قالسام دا, ءوزىم سۇيگەن كيەلى ونەردىڭ شەتىندە ءجۇرمىن. ۇلىم دا سۋرەت سالادى. مەن جەتە الماعان شىڭعا سول جەتسە ەكەن دەپ ءتىلەيمىن, – دەيدى ول. گاۋھار نۇربەكوۆانىڭ بۇل سوزىنەن ءبىر نازىك ءۇمىتتىڭ ساۋلەسىن كوردىك. ءبىر عانا باقىت پەن گاۋھار ەمەس, وسىندا سالعان سۋرەتىن ساۋدالاپ تۇرعان ونەر يەلەرىمەن اڭگىمەلەسكەنىمىزدە, ولاردىڭ كوپشىلىگى جوعارى ءبىلىمدى كاسىبي سۋرەتشىلەر ەكەنىن بىلدىك. ونەر يەلەرىنىڭ ارمانىن «اربات» ايالاپ تۇر دەپ ايتۋعا بولادى.
ارمان وكتيابر,
«ەگەمەن قازاقستان»
الماتى
