ەلوردا تۇرعىندارى «بەلسەندى ازامات» اكتسياسىنا قاتىستى

بۇگىن ەلوردا اكىمدىگىنىڭ باستاماسىمەن قالا تۇرعىندارى ءۇشىن «استانا» كونتسەرت زالىندا اشىق ەسىك كۇنى ءوتىپ, وعان قالانىڭ بارلىق باسقارمالارىنىڭ باسشىلارى مەن وكىلدەرى قاتىستى, دەپ حابارلادى ەلوردا اكىمدىگىنىڭ ءباسپاسوز قىزمەتى. «بەلسەندى ازامات» اكتسياسىنىڭ شەڭبەرىندە «ءوز قالاڭدى دامىتۋعا ۇلەسىڭدى قوس» ۇرانىمەن وتكەن شاراعا ەلوردا تۇرعىندارى كەلدى. ازاماتتار سۇراقتارىن قويىپ, مامانداردان كەڭەس الدى جانە ەلوردادا ءومىر ءسۇرۋ ساپاسىن جاقسارتۋ بويىنشا ءوز ۇسىنىستارىن جەتكىزدى. «ءبىز ءۇشىن شەشىم قابىلداعاندا نەمەسە بەلگىلى ءبىر جۇمىستارىمىزدى جوسپارلاعان كەزدە قالا تۇرعىندارىنىڭ پىكىرلەرىن ەسكەرۋ ماڭىزدى. سوندىقتان بۇل شارا جەمىستى وتەدى دەپ ويلايمىن, تۇرعىندار تاڭەرتەڭنەن بەرى بەلسەندىلىك تانىتۋدا, سول سەبەپتى ازاماتتاردان تۇسكەن سۇراقتاردى بۇگىنگى كۇننىڭ قورىتىندىسى بويىنشا جۇيەلەندىرىپ, الداعى ۋاقىتقا جۇمىس جوسپارىن قۇراتىن بولامىز»,- دەپ اتاپ كورسەتتى استانا قالاسىنىڭ ىشكى ساياسات باسقارماسىنىڭ باسشىسى ەرلان كاناليموۆ. شارا بارىسىندا قالا تۇرعىندارى ءوز سۇراقتارىن اۋىزشا جانە جازباشا تۇردە قويا الدى. قالالىق باسقارمالاردىڭ باسشىلارى ولاردىڭ سۇراقتارىنا جاۋاپ بەرىپ, كەڭەس ايتىپ قانا قويماي, وتكەن جىلدىڭ قورىتىندىسىن شىعاردى. استانالىقتار نەگىزىنەن تۇرعىن ءۇي قۇرىلىسىنىڭ كەزەگى, جۇمىسقا تۇرۋ, پيك قىزمەتى, كولىك قىزمەتى جانە دەنساۋلىق ساقتاۋ سالاسى بويىنشا سۇراقتار قويدى. «بىزگە ادامدار كوپتەگەن ماسەلەلەرىن ايتىپ كەلەدى, جاقىندا جۇمىستان شىعىپ قالعان جۇمىسسىزدار كوپ, ولار جۇمىس ىزدەپ كەلەدى نەمەسە ماماندىعىن اۋىستىرۋدى قالايدى. ءبىز بارلىق ماسەلەلەردى شەشۋگە تىرىسامىز, وسى جەردە شەشىلمەسە, باسقارمادا جەكە جانە زاڭدى تۇلعالاردىڭ وتىنىشتەرىن قاراۋ تارتىبىمەن شەشەتىن بولامىز», - دەپ ءمالىم ەتتى استانا قالاسىنىڭ جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى قاۋىپسىزدىكتى باقىلاۋ جانە ەڭبەك قورعاۋ ءبولىمىنىڭ باسشىسى نۇرلان يسەكەەۆ. ءبىر ايتا كەتەرلىگى, ەلوردالىقتارعا باسقارمالاردىڭ باسشىلارىنا سۇراقتارىن تىكەلەي قويۋعا مۇمكىندىك بەرەتىن «بەلسەندى ازامات» اكتسياسى ەكى جىلدان بەرى وتكىزىلىپ كەلەدى. شارا جىلىنا ەكى رەت - قاڭتار جانە اقپان ايلارىندا ۇيىمداستىرىلادى. كەلەسى مۇنداي شارا 8 اقپانعا جوسپارلانعان.