كەشە پرەمەر-مينيستر كارىم ءماسىموۆ سەلەكتورلىق رەجىمدەگى كەزەكتى ۇكىمەت وتىرىسىن وتكىزدى.
وندا م ۇلىكتى جاريا ەتۋ بويىنشا ناۋقان وتكىزۋ بارىسى تۋرالى قارجى ءمينيسترى باقىت سۇلتانوۆ مالىمدەدى.
ونىڭ مالىمەتىنشە, قازىرگى ءساتتە مالىمدەلگەن م ۇلىك سوماسى ەلىمىز بويىنشا 1,4 ترلن. تەڭگەگە جەتتى, ونىڭ 1,2 ترلن. تەڭگەگە جۋىعى جاريا ەتىلدى.
زاڭنىڭ جاڭا شارتتارىنداعى جۇمىستىڭ بەس ايىندا, ياعني 2015 جىلدىڭ 1 جەلتوقسانىنان كەيىن 794 ملرد. تەڭگە جاريا ەتىلدى, بۇل ناۋقاننىڭ بارلىق كەزەڭىندەگى جالپى سومانىڭ ۇشتەن ەكى بولىگىن قۇرايدى, دەپ اتاپ ءوتتى ب.سۇلتانوۆ.
«تۇزەتۋلەر جاريا ەتۋ بارىسىنا جاقسى سەرپىن بەرگەنى كورىنىپ تۇر. كەزەڭ بويى ناۋقاننىڭ ءمۇمكىندىكتەرىن 86 مىڭعا جۋىق ازامات پايدالاندى. وتىنىشتەر سانىنىڭ ارتۋى حالىق تاراپىنان قىزىعۋشىلىقتىڭ ارتقانىن بىلدىرەدى», – دەدى قارجى ءمينيسترى.
ۇلتتىق بانك توراعاسى دانيار اقىشەۆ ناۋقاننىڭ ارەكەت ەتۋ كەزەڭىندە بانكتەر 910 شوت اشىپ, ولارعا 590,3 ملرد. تەڭگە سالىنعانىن ايتتى. «وعان قوسا, ارنايى شوتتارداعى بارلىق اقشانىڭ 83%-ى اعىمداعى جىلدىڭ ءتورت ايىندا جاريا ەتىلدى. وسىنداي شوتتارعا اي سايىنعى اقشا اعىمى وسى جىلعى ورتا ەسەپپەن العاندا 148 ملرد. تەڭگەنى قۇرادى, بۇل زاڭناماعا ەنگىزىلگەن وزگەرىستەردىڭ دۇرىستىعىن تاعى دا راستايدى», دەدى ناۋقانعا 30 بانك پەن «قازپوشتا» اق قاتىساتىنىن ەسكە سالىپ وتكەن د.اقىشەۆ.
ورمان جانە دالا ورتتەرىنىڭ الدىن الۋ ماسەلەلەرى بويىنشا ىشكى ىستەر ءمينيسترى قالمۇحانبەت قاسىموۆ باياندادى.
ءمينيستردىڭ مالىمەتىنشە, جىل سايىن ەلىمىزدە 4000-عا دەيىن ورمان-دالا ورتتەرى ورىن الادى, ولار 180 مىڭ گا.-عا جۋىق اۋداندى قامتيدى, زالال 230 ملن. تەڭگەدەن اسادى.
«اعىمداعى جىلدىڭ باسىنان باستاپ ورمان قورى اۋماعىندا جالپى اۋدانى 285 گا بولاتىن 16 ءورت تىركەلدى, زالال سوماسى 1,7 ملن. تەڭگەنى قۇرايدى. دالا الاپتارىندا 2 180 گا كولەمدى الاتىن 410 ءورت تىركەلدى. قۇرباندار مەن زالالدار جوق», دەپ مالىمدەدى ءىىم باسشىسى.
«اعىمداعى جىلى قازگيدرومەتتىڭ مالىمەتىنشە, شىلدە-تامىزدا اۋانىڭ ورتاشا تەمپەراتۋراسى +30 گرادۋسقا دەيىن جەتەتىندىگى بولجانىپ وتىر. وعان قوسا, باتىس جانە وڭتۇستىك وبلىستاردا جاۋىن-شاشىن تاپشىلىعى كۇتىلۋدە, سوندىقتان ەلدىڭ بىرقاتار وڭىرلەرىندە دالا-ورمان ورتتەرىنىڭ شىعۋ قاۋپى بار», دەپ مالىمدەدى ق.قاسىموۆ.
وسىعان بايلانىستى ءىىم ءورت قاۋپى بار ماۋسىمدا ورمان جانە دالا ورتتەرىنىڭ الدىن الۋ جانە جويۋ بويىنشا ارنايى جوسپار جاسادى. قازىرگى ۋاقىتتا ەلىمىز بويىنشا ورمان-دالا ورتتەرىن جويۋ ءۇشىن 4779 اۆتوكولىك, سۋاعار قۇرىلعىلارى بار 11 تىكۇشاق, 47 ءورت پويىزى جانە 34 مىڭنان استام ادام بولىنگەن. شەكارا ماڭىنداعى اۋماقتاردا ءوزارا ءىس-قيمىلدى پىسىقتاۋ ءۇشىن رەسەي جانە كورشى ەلدەردىڭ تجم ءبولىمشەلەرىمەن تاكتيكالىق وقۋلار وتكىزۋ جوسپارلانعان.
ق.قاسىموۆ 90% جاعدايدا ورماندار ادامداردىڭ كەسىرىنەن جاناتىنىن ەسكە سالىپ, حالىق اراسىندا پروفيلاكتيكالىق ءىس-شارالاردى كۇشەيتۋگە, ازاماتتاردى ءورت قاۋىپسىزدىگى ەرەجەلەرى تۋرالى بەلسەندى اقپاراتتاندىرۋعا شاقىردى.
وتىرىس قورىتىندىسى بويىنشا كارىم ءماسىموۆ مۇددەلى مەملەكەتتىك ورگاندارعا بىرقاتار تاپسىرمالار بەردى.
«ەگەمەن-اقپارات»