الماتى مەن استانادا, سونداي-اق اقمولا وبلىسى اۋماعىندا جۇرگىزۋشىسىز تاكسي جوباسىن پيلوتتىق فورماتتا ىسكە قوسۋ جوسپارلانىپ وتىر. بۇل تۋرالى جاساندى ينتەللەكت جانە تسيفرلىق دامۋ مينيسترلىگى حابارلادى. مينيسترلىك وكىلدەرىنىڭ ايتۋىنشا, باستاما قالالىق موبيلدىك پەن لوگيستيكا سالاسىن جاڭعىرتۋعا باعىتتالعان. ۇزاق مەرزىمدى پەرسپەكتيۆادا جوبا تسيفرلىق ەكونوميكانىڭ جاڭا باعىتىن قالىپتاستىرىپ, بيۋدجەت كىرىسىن ارتتىرۋى مۇمكىن, دەپ حابارلايدى Egemen.kz.
قازىرگى ۋاقىتتا اۆتونومدى تاكسي نارىعىندا اقش پەن قىتاي الدىڭعى ورىندا تۇر.
ساراپشىلاردىڭ بولجامىنشا, 2030 جىلعا قاراي اۆتونومدى كولىك نارىعى جۇزدەگەن ميلليارد دوللارلىق يندۋسترياعا اينالۋى ىقتيمال. كەي ەلدەردە روبوتاكسي قىزمەتى ءداستۇرلى تاكسيدەن 20-30%-عا ارزان.
ورتالىق ازيادا تولىققاندى روبوتاكسي قىزمەتى ءالى كەڭ تارالماعان. دەگەنمەن وزبەكستان مەن قىرعىزستاندا «اقىلدى قالا» جانە ينتەللەكتۋالدى كولىك جۇيەلەرى باعىتىندا باستامالار تالقىلانىپ جاتىر.
تەحنولوگيالىق الپاۋىتتار جاساندى ينتەللەكتىگە 700 ملرد دوللار ينۆەستيتسيا سالدى
قازاقستان وسى تەحنولوگيانى ەنگىزۋدە العاشقىلاردىڭ ءبىرى بولۋعا نيەتتى. ەگەر پيلوتتىق كەزەڭ ءساتتى وتسە, ەلدىڭ وڭىرلىك دەڭگەيدە تەحنولوگيالىق كوشباسشىلىققا ۇمتىلۋىنا مۇمكىندىك تۋادى.
الەمدەگى جول-كولىك وقيعالارىنىڭ 90%-دان استامى ادام فاكتورىنان بولادى. شارشاۋ, زەيىننىڭ ءبولىنۋى, جىلدامدىقتى اسىرۋ نەمەسە ماس كۇيدە كولىك جۇرگىزۋ – باستى سەبەپتەردىڭ قاتارىندا.
ال جۇرگىزۋشىسىز كولىكتەر شارشامايدى, ەموتسياعا بەرىلمەيدى, تەلەفونعا الاڭدامايدى جانە جول جاعدايىن دەرەكتەر نەگىزىندە تالدايدى.
ولار LIDAR سەنسورلارى, رادارلار, كامەرالار جانە جاساندى ينتەللەكت الگوريتمدەرى ارقىلى اينالانى 360 گرادۋس باقىلاپ, ءبىر سەكۋندتا مىڭداعان دەرەكتى وڭدەي الادى.
تەحنولوگيا كۇزەتتە: ورال پوليتسەيلەرى تسيفرلى جۇيەنىڭ كومەگىمەن كۇدىكتىنى ۇستادى
قازاقستاندا جول اپاتتارى ءجيى تىركەلەتىنىن ەسكەرسەك, قاۋىپسىزدىك فاكتورى بۇل جوبانىڭ نەگىزگى ارتىقشىلىقتارىنىڭ ءبىرى بولماق.
ۇزاق مەرزىمدە روبوتاكسي جەكە اۆتوكولىككە سۇرانىستى ازايتىپ, قالالارداعى تۇراق ورىندارىنىڭ قىسقارۋىنا ىقپال ەتۋى مۇمكىن. ساراپشىلاردىڭ پىكىرىنشە, بولاشاقتا كولىك يەلەنۋ مادەنيەتى وزگەرىپ, ادامدار جەكە كولىك ساتىپ الۋدان گورى, سۇرانىس بويىنشا كولىك شاقىرۋدى تاڭداۋى ىقتيمال.
سوڭعى جىلدارى قازاقستان تسيفرلىق ترانسفورماتسيانى مەملەكەتتىك ساياساتتىڭ باسىم باعىتى رەتىندە ايقىنداپ كەلەدى. ەلەكتروندى ۇكىمەت پەن جاساندى ينتەللەكتتى ءارتۇرلى سالالارعا ەنگىزۋ – سونىڭ دالەلى. روبوتاكسي جوباسى وسى ستراتەگيالىق باعىتتىڭ زاڭدى جالعاسى سانالادى.
يننوۆاتسيالىق تەحنولوگيالار پاركىندە ۇلتتىق كرەمني كلاستەرى داميدى
جوبا جۇزەگە اسقان جاعدايدا, ەلدىڭ يننوۆاتسيالىق ءيميدجى نىعايىپ, ءىت سالاسى مەن ستارتاپ ەكوجۇيەسىنە سەرپىن بەرىلۋى مۇمكىن. سونىمەن قاتار قازاقستان ورتالىق ازيادا تەحنولوگيالىق باستامالار بويىنشا الدىڭعى قاتارعا شىعۋعا مۇمكىندىك الادى.