23 اقپان كۇنى اقتاۋ قالاسىنداعى «حالىق ارەنا» سپورت كەشەنىندە جاڭا كونستيتۋتسيانى قولداۋعا ارنالعان فورۋم ءوتتى. اۋقىمدى ءىس-شاراعا شامامەن 4000 ادام – قوعام وكىلدەرى, ءماسليحات دەپۋتاتتارى, قوعامدىق بىرلەستىكتەردىڭ مۇشەلەرى, جاستار جانە ءوڭىر تۇرعىندارى قاتىستى, دەپ جازادى Egemen.kz.
فورۋمنىڭ حەدلاينەرى – «مۋزارت» توبى تانىمال اندەرىن ورىنداپ, زالداعى ءار بۋىن وكىلدەرىن بىرىكتىرىپ, بىرلىك پەن پاتريوتتىق رۋحقا تولى ەرەكشە اتموسفەرا جاسادى.
ايتا كەتەيىك, ءىس-شارا كونستيتۋتسيالىق رەفورمالار, قوعامدىق دامۋ جانە ازاماتتىق جاۋاپكەرشىلىك ماسەلەلەرىنە ارنالدى.
رەفەرەندۋم جانە جاڭا كونستيتۋتسيا: حالىق كوپ جينالاتىن ورىنداردا اقپاراتتىق جۇمىس جانداندى
كونستيتۋتسيالىق رەفورما جونىندەگى كوميسسياسىنىڭ مۇشەسى, ماڭعىستاۋ وبلىستىق ءماسليحاتىنىڭ توراعاسى جاڭبىرباي ماتاەۆ قاتىسۋشىلار الدىندا ءسوز سويلەپ, قازاقستاننىڭ بولاشاعى قوعامنىڭ بەلسەندى ازاماتتىق ۇستانىمىنا جانە جاستاردىڭ مەملەكەتتى دامىتۋداعى رولىنە تىكەلەي بايلانىستى ەكەنىن اتاپ ءوتتى.
«جاستار – ەلدىڭ قوزعاۋشى كۇشى ءارى ستراتەگيالىق رەسۋرسى. بولاشاقتا قۋاتتى, ادىلەتتى ءارى وركەندەگەن قازاقستاندى قۇرۋ – سىزدەردىڭ قولدارىڭىزدا. كونستيتۋتسيالىق رەفورمالار ازاماتتاردىڭ قۇقىقتارى مەن مۇمكىندىكتەرىن نىعايتۋعا باعىتتالعان, ال رەفەرەندۋمعا قاتىسۋ – ازاماتتىق جاۋاپكەرشىلىكتىڭ ماڭىزدى كورىنىسى», دەپ اتاپ ءوتتى جاڭبىرباي ماتاەۆ.
سونداي-اق ماڭعىستاۋ وبلىستىق ءماسليحاتىنىڭ دەپۋتاتى, ۇلتتىق قۇرىلتاي مۇشەسى ۋايس ەرسايىن ۇلى ازاماتتاردىڭ قوعامدىق-ساياسي ۇدەرىستەرگە قاتىسۋى مەن قوعام بىرلىگىنىڭ ماڭىزدىلىعىن اتاپ ءوتتى.
ءىس-شارادا جاستاردىڭ ءرولى ەرەكشە اتاپ ءوتىلدى. اقتاۋ قالاسىنداعى مەكتەپ-گيمنازياسىنىڭ پەداگوگى مادينا اليەۆا جانە Yessenov University ستۋدەنتى, بولاشاق زاڭگەر بەكزات قادىرباەۆ جاڭا كونستيتۋتسيانىڭ ماڭىزى مەن ازاماتتىق بەلسەندىلىك تۋرالى ويلارىن ءبولىستى. قاتىسۋشىلار اتا زاڭنىڭ تەڭ قۇقىقتاردى, ءبىلىم الۋ مەن كاسىبي دامۋعا جانە ەل ومىرىنە قاتىسۋعا كەڭ مۇمكىندىكتەر بەرەتىنىن اتاپ ءوتتى.
ساراپشىلار كونستيتۋتسيا جوباسىن ءتۇسىندىردى
فورۋم ءارى قاراي م. وسكىنباەۆ اتىنداعى ماڭعىستاۋ وبلىستىق فيلارمونياسىنىڭ ونەرپازدارىنىڭ كونتسەرتىمەن جالعاستى. ايدا بايگەلوۆا, اسقار كوشەروۆ, ءاسانالى كوشەروۆ, نار-ۇلت توبى, اقمارال ارعىنقىزى جانە وزگە دە ونەرپازدار ونەر كورسەتتى. كەشتىڭ ەڭ اسەرلى ءساتىنىڭ ءبىرى – زالداعى كورەرمەندەرمەن بىرگە ورىندالعان ء«وز ەلىم» ءانى بولدى.
ماڭعىستاۋ جۇرتشىلىعى جاڭا كونستيتۋتسيانى تولىق قولدايتىنىن جانە ەل تاعدىرىنا بەيجاي قارامايتىنىن ناقتى ىسپەن كورسەتتى. بۇل فورۋم تەك مەرەكەلىك شارا ەمەس, مەملەكەتىمىزدى ءارى قاراي دامىتۋعا باعىتتالعان ورتاق جاۋاپكەرشىلىكتىڭ ايقىن كورىنىسى بولدى.