بىلتىر ەلىمىزدىڭ سىرتقى ساۋدا اينالىمى جالپى كولەم جاعىنان تۇراقتىلىق ساقتاعانىمەن, ونىڭ ىشكى قۇرىلىمى ايتارلىقتاي وزگەردى. ەكسپورت ازايىپ, يمپورت كوبەيگەن سايىن ساۋدا بالانسىنىڭ ارتىقشىلىعى قىسقارىپ, ەكونوميكاداعى سىرتقى تىرەك السىرەي ءتۇستى, دەپ جازادى Egemen.kz.
وتكەن جىلى ەلدىڭ سىرتقى ساۋدا اينالىمى 143,9 ملرد دوللارعا جەتتى. ەكسپورت كولەمى 79,0 ملرد دوللاردى قۇراپ, الدىڭعى جىلمەن سالىستىرعاندا كەمىدى. ال يمپورت, كەرىسىنشە, 64,8 ملرد دوللارعا دەيىن ءوستى. سونىڭ سالدارىنان ساۋدا بالانسىنىڭ وڭ ايىرماسى ءبىر جىلدا 21,3 ملرد دوللاردان 14,2 ملرد دوللارعا دەيىن ازايدى. جالپى ىشكى ونىمگە شاققاندا بۇل كورسەتكىش 7,3%-دان 4,6%-عا ءتۇستى.
ەكونوميكاعا $58 ملرد-تان استام قارجى تارتىلدى
ەكسپورتتاعى تومەندەۋگە ەڭ الدىمەن مينەرالدى سەكتور اسەر ەتتى. بۇل باعىتتاعى ءتۇسىم 3,3 ملرد دوللارعا ازايدى. مۇنىڭ باستى سەبەبى – الەمدىك نارىقتاعى باعانىڭ قۇلدىراۋى. 2025 جىلى Brent ماركالى مۇناي شامامەن بەستەن ءبىر بولىككە ارزاندادى. سونىمەن بىرگە كولىك قۇرالدارىنىڭ ەكسپورتى دا ايتارلىقتاي قىسقاردى. بۇل سىرتقى سۇرانىستىڭ باسەڭدەگەنىن ءارى قازاقستاندىق ونىمدەردىڭ باسەكەلەستىك قىسىمعا تاپ بولعانىن اڭعارتادى.
شيكىزات ەكسپورتىنىڭ السىرەۋى سالدارىنان ەكسپورت قۇرىلىمىندا شيكىزاتتىق ەمەس تاۋارلاردىڭ ۇلەسى قاعاز جۇزىندە عانا ءوستى. بۇل ءوسىم ءوندىرىستىڭ ناقتى ۇلعايۋىن ەمەس, قۇرىلىمدىق وزگەرىستى كورسەتەدى.
سوعان قاراماستان اۋىل شارۋاشىلىعى ونىمدەرىنىڭ ەكسپورتى ءوسىم كورسەتتى. استىق, مايلى داقىلدار, جەم-ءشوپ پەن دارىلىك وسىمدىكتەردىڭ جەتكىزىلىمى ارتتى. بۇل ۇردىسكە الەمدىك ازىق-ت ۇلىك باعاسىنىڭ ءوسۋى مەن ەكسپورت كولەمىنىڭ كەڭەيۋى ىقپال ەتتى.
يمپورتتاعى ءوسىم نەگىزىنەن كولىك قۇرالدارىنا تيەسىلى بولدى. اۆتوكولىك باعاسىنىڭ تومەندەۋى ىشكى سۇرانىستى جانداندىرىپ, سىرتتان اكەلىنەتىن تەحنيكانىڭ كولەمىن كوبەيتتى. سونىمەن بىرگە ازىق-ت ۇلىك پەن حيميا ونەركاسىبىنىڭ ونىمدەرىنىڭ دە تاسىمالى ۇدەي تۇسكەن. بۇل وتاندىق وڭدەۋشى سالالاردىڭ ىشكى سۇرانىستى تولىق وتەي الماي وتىرعانىن كورسەتەدى.
مەملەكەت باسشىسى ەكونوميكانى قولجەتىمدى كرەديتپەن قامتاماسىز ەتۋدىڭ جولىن ايتتى
جەكەلەگەن تاۋارلار بويىنشا باعالار دا قىمباتتادى. اسىرەسە شوكولاد پەن كاكاو ونىمدەرى, تۇرمىستىق جيھاز جانە توڭازىتقىش جابدىقتار بويىنشا باعا ءوستى. ساۋدا ارىپتەستەرىندەگى ينفلياتسيا دەڭگەيى تومەن بولعانىمەن, ناقتى تاۋارلار قىمباتتاۋى ىشكى نارىققا يمپورت ارقىلى اسەر ەتتى.
ناتيجەسىندە تازا ەكسپورت 2025 جىلى ەكونوميكالىق وسىمگە تەجەۋ بولدى. ۆاليۋتا ءتۇسىمى ازايىپ, سىرتقى نارىققا تاۋەلدىلىك كۇشەيە ءتۇستى. بۇل تەڭگە باعامىنا قاتىستى كۇتۋلەردىڭ دە سىرتقى جاعدايعا بايلانا تۇسۋىنە ىقپال ەتتى.
ساراپشىلاردىڭ پايىمداۋىنشا, ەكونوميكالىق ءوسىم بىرتىندەپ ىشكى سۇرانىس پەن ينۆەستيتسياعا سۇيەنگەن ۇلگىگە اۋىسىپ كەلەدى. الايدا ەكسپورتتىڭ شيكىزاتقا تاۋەلدىلىگى مەن كەي سالالاردىڭ يمپورتقا بايلانۋى ەكونوميكانى سىرتقى كۇيزەلىستەرگە وسال ەتەدى.
جاڭا كونستيتۋتسيا – ورنىقتى ەكونوميكالىق ءوسىمنىڭ ىرگەتاسى: ولجاس بەكتەنوۆ ينۆەستيتسيالىق احۋال جونىندەگى كەڭەس وتكىزدى
ۇكىمەتتىڭ بولجامىنا سايكەس, 2026 جىلى ەكسپورت 77,1 ملرد دوللارعا دەيىن قىسقارۋى مۇمكىن. ال يمپورت, كەرىسىنشە, 67,7 ملرد دوللارعا جەتۋى ىقتيمال. مۇنداي جاعدايدا ساۋدا بالانسىنىڭ ارتىقشىلىعى 9,4 ملرد دوللارعا دەيىن ازايادى. بۇل سىرتقى تىرەكتىڭ ودان ءارى السىرەيتىنىن جانە ۆاليۋتا نارىعىنداعى تۇراقتىلىققا تۇسەتىن سالماقتىڭ كۇشەيەتىنىن كورسەتەدى.