ۇكىمەت وتىرىسىندا پرەمەر-مينيستر ولجاس بەكتەنوۆ اۆياتسيا سالاسىن دامىتۋ مەن حالىقارالىق اۋە قاتىناسىن كەڭەيتۋ ەلدىڭ ەكونوميكالىق ءوسۋى ءۇشىن ماڭىزدى باعىت ەكەنىن اتاپ ءوتتى. استانادان توكيو مەن نيۋ-يورككە تىكەلەي رەيستەردى جىل سوڭىنا دەيىن ىسكە قوسۋدى تاپسىردى, دەپ حابارلايدى Egemen.kz.
ولجاس بەكتەنوۆتىڭ ايتۋىنشا, حالىقارالىق ازاماتتىق اۆياتسيا ۇيىمى ستراتەگيالىق جوسپارىنا سايكەس, 2050 جىلعا قاراي جولاۋشىلار سانى جىلىنا 12 ملرد-تان اسادى, ال الەمدىك كوممەرتسيالىق اۋە پاركى 2034 جىلعا قاراي ەكى ەسەگە ۇلعايادى. وسى جاعدايدا قازاقستان جاھاندىق اۆياتسيالىق جۇيەدە ءوز ورنىن نىعايتۋى ءتيىس.
«جاڭا حالىقارالىق باعىتتاردى, اتاپ ايتقاندا ەۋروپالىق وداق ەلدەرى مەن اقش-قا رەيستەر اشۋ جۇمىسىن جەدەلدەتۋ قاجەت. بۇل رەتتە بيلەت باعاسى باسەكەگە قابىلەتتى بولۋعا ءتيىس. اسىرەسە, استانادان ۇشاتىن حالىقارالىق اۋە باعىتتارىنا ەرەكشە نازار اۋدارعان ءجون», دەدى ولجاس بەكتەنوۆ.
استانادان توكيو مەن نيۋ-يورككە تىكەلەي رەيستەر قاشان اشىلادى؟
سونىمەن قاتار ۇكىمەت حالىقارالىق مارشرۋتتىق جەلىنى كەڭەيتۋگە باسىمدىق بەرىپ وتىر.
وسىعان بايلانىستى كولىك مينيسترلىگىنە Air Astana كومپانياسىمەن بىرلەسىپ, استانادان توكيو مەن نيۋ-يورككە تىكەلەي رەيستەردى 2026 جىلدىڭ سوڭىنا دەيىن اشۋ تاپسىرىلدى. ال 2027 جىلى لوندون, پاريج, ريم, ۆەنا سياقتى ەۋروپا قالالارىنا جاڭا باعىتتار ىسكە قوسىلماق.
«ينۆەستورلار مەن تۋريستەردى تارتامىز دەسەك, بۇل – وتە ماڭىزدى ماسەلە», دەدى پرەمەر-مينيستر.
بۇعان دەيىن قازاقستان اۋەجايلارىندا جولاۋشىلاردى بەت-الپەت ارقىلى تىركەۋ ەنگىزىلەتىنى تۋرالى حابارلاعانبىز.