قوناەۆ قالاسىندا كامەلەتكە تولماعان سپورتشى قىزدار مما باپكەرىن جىنىستىق سيپاتتاعى ارەكەتتەرگە باردى دەپ ايىپتاپ, بەينەۇندەۋ جاريالادى. ولاردىڭ بۇل ارەكەتىنە كىنالىنىڭ ءتيىستى تۇردە جاۋاپقا تارتىلماعانى سەبەپ بولعان, دەپ حابارلايدى Egemen.kz.
قىزدار ۆيدەوۇندەۋدە بولعان جاعدايدى ەگجەي-تەگجەيلى بايانداعان. وقيعادان كەمىندە ءتورت تاربيەلەنۋشى زارداپ شەككەن.
جابىرلەنۋشىلەردىڭ ايتۋىنشا, باپكەردىڭ ءوزى قىزداردى ۇيىنە جەكە شىعارىپ سالاتىن بولعان. جولاي كولىكتە جىنىستىق سيپاتتاعى ارەكەت جاساۋعا ۇمتىلعان. بۇدان بولەك ول جاتتىعۋ كەزىندە سالماق قۋ ءۇشىن ينگالياتورى بار ماسكانى قولدانعان. سونىڭ سالدارىنان قىزداردىڭ باسى اينالىپ, وزدەرىن ءجيى جايسىز سەزىنىپ جۇرگەن. بۇل جاعداي 2024 جىلدىڭ قاڭتارىنان 2025 جىلدىڭ قىركۇيەگىنە دەيىن جالعاسقان.
بۇعان دەيىن قىلمىستىق ءىس توقتاتىلىپ, كەيبىر زاتتاي دالەلدەمەلەر كۇدىكتىنىڭ وزىنە قايتارىلعان. سونىمەن قاتار اقپان ايىندا تەرگەۋ بابى وزگەرگەن. العاشىندا ءىس زورلىق ارەكەتتەرى بويىنشا قوزعالعان بولسا, كەيىن ول 16 جاسقا تولماعاندارعا قاتىستى جىنىستىق ءتيىسۋ بابىنا اۋىستىرىلعان.
باستاپقى باپ بويىنشا باپكەرگە 8 جىلعا دەيىن جازا قاراستىرىلسا, جاڭا باپ بويىنشا ەڭ جوعارى جازا 50 تاۋلىككە دەيىن قاماۋمەن شەكتەلەدى.
بۇعان دەيىن پروديۋسەرىمنەن زورلىق-زومبىلىق كوردىم دەگەن اكتەر نۇرعالي نۇعمان تۋرالى جازعان ەدىك. اتالعان جايتقا بايلانىستى ءىىم تەرگەۋ باستالعانىن مالىمدەگەن بولاتىن.