تاياۋدا وتاندىق ءونىمدى رەسەي نارىعىندا ىلگەرىلەتۋ ءۇشىن اۋىل شارۋاشىلىعى ۆيتسە-ءمينيسترى ە.نىسانباەۆ باستاعان قازاقستاندىق دەلەگاتسيا ومبى قالاسىنا (رەسەي فەدەراتسياسى) ىسكەرلىك ساپارمەن باردى.
ساپار بارىسىندا قازاقستاندىق اگروونەركاسىپ كەشەنى, ازىق-ت ۇلىك, قۇرىلىس, حيميا ونەركاسىپتەرىنىڭ جانە قاپتاۋ سالاسىنىڭ 20 شاقتى وندىرۋشىلەرى رەسەيلىك تۇتىنۋشى كومپانيالاردى ءوز مۇمكىندىكتەرىمەن تانىستىردى.
ساپار شەڭبەرىندە اۋىل شارۋاشىلىعىنىڭ ۆيتسە-ءمينيسترى باستاعان قازاقستاندىق دەلەگاتسيا ومبى قالاسىنىڭ گۋبەرناتورى, ۇكىمەتىنىڭ توراعاسى ۆ.نازاروۆپەن كەزدەسۋ وتكىزدى.
ە.نىسانباەۆتىڭ ايتۋىنشا, ەكى تاراپ ءوزارا ساۋدا-ەكونوميكالىق بايلانىستاردى تەرەڭدەتۋگە, ونىڭ ىشىندە, ەڭ باستىسى, اۋىل شارۋاشىلىعى سالاسىنداعى بيزنەستىڭ دامۋىنا جاردەم ەتۋ قاجەتتىلىگىن ءبىراۋىزدان مالىمدەدى.
«قازاقستان ءىرى اگرارلىق مەملەكەت بولىپ تابىلادى. نارىقتىق ەكونوميكا تالاپتارىنا ساي قالىپتاسىپ ۇلگىرگەن بۇل سالامىز ينۆەستورلاردىڭ قىزىعۋشىلىعىن تۋدىرۋدا. بۇل باعىتتاعى جاقسى باستامالار ىسكە اسىرىلىپ جاتقانىنا قاراماستان, ەۋرازيالىق ەكونوميكالىق وداق اياسىندا وسى بايلانىستارىمىزدى ودان ءارى بەلسەندەتۋگە جاۋاپتىمىز. كەزدەسۋلەردىڭ ءتۇرلى فورماتتارى مەن الاڭدارىن دامىتۋدى جوسپارلايمىز», دەدى دەلەگاتسيا باسشىسى.
ومبى وبلىسىنىڭ گۋبەرناتورى ۆ.نازاروۆ, ءوز كەزەگىندە قازاقستانمەن تاۋار اينالىمىنىڭ كولەمى تۇراقتى تۇردە ءوسىپ جاتقانىن ايتىپ, ونىڭ نەگىزى اۋىل شارۋاشىلىعى مەن وڭدەۋ ونەركاسىبى ونىمدەرىنەن قالىپتاسىپ وتىرعانىن ەسكەردى.
«ءبىز جاڭا بىرلەسكەن كاسىپورىندار قۇرۋدى جانە ساۋدا قارىم-قاتىناستار دامىتۋدى قالايمىز. وبلىس ارقىلى ءىرى كولىكتىك-ترانزيتتىك دالىزدەر وتۋدە, سوندىقتان بىرلەسكەن ساۋدانى كەڭەيتۋ ءۇشىن شەكاراعا شەكتەس ايماعىندا بىرىڭعاي لوگيستيكالىق ورتالىق قۇرۋ ەرەكشە ماڭىزدى ءارى قاجەتتى. ومبى وبلىسىنىڭ ترانزيتتىك الەۋەتىن يگەرۋ ءبىزدىڭ باستى ماقساتتارىمىزدىڭ ءبىرى», دەدى ۆ.نازاروۆ.
وبلىس گۋبەرناتورى قازاقستاندىق تاۋارلاردىڭ جەكەلەگەن ءجارمەڭكەسىن اعىمداعى جىلعى شىلدە ايىنىڭ سوڭىندا ومبى قالاسىندا ۇيىمداستىرۋدى ۇسىندى.
ىسكەرلىك ساپار بارىسىندا وتاندىق كاسىپورىندار ومبى وبلىسىنىڭ ىسكەرلىك ورتالارىمەن, اۋىل شارۋاشىلىعى, ازىق-ت ۇلىك, ەكونوميكا, قۇرىلىس مينيسترلىكتەرىمەن, سونداي-اق دامۋ جانە ينۆەستيتسيا اگەنتتىگىمەن كەلىسسوزدەر وتكىزدى.
سونىمەن قاتار, دەلەگاتسيا مۇشەلەرى قازاق ءتىلى جانە مادەنيەتى ورتالىعىنىڭ قىزمەتىمەن تانىستى جانە ومبى قالاسىنداعى قازاقستان كونسۋلدىعى عيماراتىندا قازاق دياسپوراسىنىڭ زيالى وكىلدەرىمەن كەزدەسۋ وتكىزدى.
«ەگەمەن-اقپارات»