تاراز. 3 مامىر. كەشە ساعات 14.20-دا تاراز قالالىق ىشكى ىستەر باسقارماسى جبو-نىڭ «102» تەتىگىنە بەلگىسىز ايەلدەن ءوز ءۇيىنىڭ ماڭىندا قاراقشىلىق شابۋىل جاسالعانى تۋرالى حابارلاما تۇسكەن. بۇل تۋرالى جامبىل وبلىسىنىڭ ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
ونىڭ ايتۋى بويىنشا, بەلگىسىز ەكى ادام قارۋمەن قاۋىپ ءتوندىرىپ, ونىڭ تۋىستارىنا الىپ بارا جاتقان 2,5 ميلليون تەڭگەدەن استام اقشاسى بار سومكەسىن تارتىپ العان. وقيعا ورنىنا شۇعىل تۇردە «قايسار» جەدەل قيمىلدايتىن توبى مەن تاراز قالالىق ءىىب 2-پب جتت جىبەرىلدى. جابىرلەنۋشى پوليتسياعا حابارلاسقانعا دەيىن بەلگىسىز ادامداردى ۇستاۋعا تىرىسقان 22 جاستاعى ەر ادام وقيعانىڭ كۋاگەرى بولعان. قاراقشىلاردى قۋ بارىسىندا ول اياعىنا اتىلعان وقتان جاراقات العان.
قىلمىستى جاساعان كۇدىكتىلەر وقيعا ورنىنا جاقىن جەردەن ۇستالدى. ولاردى ىزدەستىرۋ جانە ۇستاۋعا 10 مينۋتقا جۋىق ۋاقىت كەتكەن.
اتالعان دەرەك بويىنشا قر قك-نىڭ 192-بابى 3-ب. 2-ت. (قاراقشىلىق شابۋىل) جانە 287-بابى 1-ب. (قارۋدى زاڭسىز ساقتاۋ) بويىنشا قىلمىستىق ءىس قوزعالدى. بىرقاتار ساراپتامالار تاعايىندالىپ, سوتقا دەيىنگى تەرگەۋ امالدارى جۇرگىزىلۋدە. كۇدىكتىلەر ۋاقىتشا ۇستاۋ يزولياتورىنا قاماققا الىندى.
وقيعا كۋاگەرى بولعان ازامات دەر كەزىندە مەديتسينالىق كومەك الدى, ونىڭ ومىرىنە ەشقانداي قاۋىپ ءتونىپ تۇرعان جوق, قازىرگى ۋاقىتتا ەم الۋدا.
بۇگىن جامبىل وبلىسى ءىىد باستىعىنىڭ كادر جۇمىستارى جونىندەگى ورىنباسارى قاليجان شوڭعارباەۆ جاراقات العان جاس جىگىتكە بارىپ, ونىڭ جاعدايىن سۇراپ قايتتى. وعان بەلسەندى ازاماتتىق ۇستانىمى مەن نەمقۇرايلىلىق تانىتپاعانى ءۇشىن, سونداي-اق ونىڭ اناسىنا وسىنداي ۇلدى تاربيەلەگەنى ءۇشىن العىسىن ءبىلدىردى.
«ونىڭ جاساعان ارەكەتى ۇلگى تۇتارلىق قادام بولىپ تابىلادى. قىلمىسكەرلەردى قولعا ءتۇسىرۋ بويىنشا ارەكەتتەستىك تانىتقانى ءۇشىن ءبىز ونى ىشكى ىستەر مينيسترلىگىنىڭ ارنايى ماراپاتىنا ۇسىناتىن بولامىز», دەدى قاليجان شوڭعارباەۆ.
ورالحان ءداۋىت.
دەرەك, فوتو: egemen.kz