استانا. 1 مامىر. بۇگىن فۋتبولدان قازاقستان پرەمەر-ليگاسىنىڭ 8-تۋرى ويىندارى وينالدى. ورتالىق كەزدەسۋ سانالعان «استانا» – «قايرات» ماتچىندا ەلوردالىقتار 1:0 ەسەبىمەن جەڭىسكە جەتتى. بۇل تۋرالى egemen.kz ءتىلشىسى حابارلادى.
«استانا ارەنا» ستاديونىندا بولعان ويىندا ەسەپ 8-مينۋتتا اشىلدى. الاڭ يەلەرىنىڭ جارتىلاي قورعاۋشىسى سەرىكجان مۇجىقوۆتىڭ سول قاپتالدان ايىپ الاڭىنا اسىرعان دوبىنا وزگەلەردەن بۇرىن جەتكەن سەربيالىق لەگيونەر نەمانيا ماكسيموۆيچ باسىمەن ناتيجەلى سوققى جاسادى. بۇل ماكسيموۆيچتىڭ وسى ماۋسىمداعى العاشقى گولى ەكەنىن اتاپ وتكەن ءجون.
گولدان قاناتتانعان استانالىقتار ۇزىلىسكە دەيىن ەسەپتى ەسەلەيتىن بىرنەشە مۇمكىندىككە يە بولدى. سونداي ساتتەردىڭ بىرىندە, ياعني 28-مينۋتتا كوماندا كاپيتانى تاڭات نوسەرباەۆتىڭ تەپكەن دوبى قاقپا ماڭدايشاسىنان كەيىن سەرپىلدى.
ءوز كەزەگىندە «قايرات» ويىنشىلارى تارازى باسىن تەڭەستىرۋ ءۇشىن كۇش جۇمسادى. دەگەنمەن, باۋىرجان يسلامحان باستاعان الماتىلىقتار قارسىلاستارىنىڭ وسال تۇسىن تابا المادى.
ەكىنشى تايمدا دا وسى ويىن ورنەگى قايتالانىپ, ناتيجەسىندە, «استانا» ويىنشىلارى ماۋسىم بارىسىنداعى 7-جەڭىستەرىنە قول جەتكىزدى. ال «قايرات» جاڭا ماۋسىمدا وسىمەن ءتورتىنشى رەت جەڭىلىسكە ۇشىراپ وتىر. وسى رەتتە بۇل ماتچقا «قايراتتىڭ» بىلتىرعى ماۋسىمداعى سۇرمەرگەنى جەرار گوۋدىڭ قاتىسپاعانىن ايتا كەتەيىك.
تۋر بارىسىندا تاعى 3 ويىندا 1:0 ەسەبى تىركەلدى. اتاپ ايتقاندا, شىمكەنتتە جەرگىلىكتى «ورداباسى» ورالدىڭ «اقجايىعىن» وسىنداي ەسەپپەن تىزە بۇكتىرسە, ءوز الاڭىندا «تارازدى» قابىلداعان قوستانايدىڭ «توبىلى» فرانتسيالىق لەگيونەر اللاسسانە نديايەنىڭ كومەگىمەن سوڭعى مينۋتتاردا جەڭىس گولىن سوعىپ كەتتى. ودان بولەك, «اقتوبە» ءوز الاڭىندا كوكشەتاۋدىڭ «وقجەتپەسىنەن» 1:0 ەسەبىمەن باسىم ءتۇستى.
تۋرداعى ەڭ ءىرى ەسەپ تالدىقورعاندا وتكەن جەرگىلىكتى «جەتىسۋ» مەن پاۆلوداردىڭ «ەرتىسى» اراسىنداعى كەزدەسۋدە تىركەلدى. بۇل ويىندا الاڭ يەلەرىنىڭ قاقپاسىنا جاۋاپسىز ءۇش گول سوققان پاۆلودارلىقتار ماۋسىمداعى 6-جەڭىستەرىنە قول جەتكىزىپ, تۋرنير كەستەسىندەگى 2-ورىندارىن ساقتاپ قالدى.
ال قاراعاندىنىڭ «شاحتەرى» مەن «اتىراۋ» اراسىنداعى كەزدەسۋدە ەسەپ اشىلعان جوق.
8-تۋر ويىندارىنىڭ ناتيجەلەرى:
«استانا» (استانا) – «قايرات» (الماتى) 1:0
گول: نەمانيا ماكسيموۆيچ 8.
«ورداباسى» (شىمكەنت) – «اقجايىق» (ورال) 1:0
گول: داۋرەنبەك تاجىمبەتوۆ 72.
«توبىل» (قوستاناي) – «تاراز» (تاراز) 1:0
گول: الاسسانە نديايە 90+4.
«جەتىسۋ» (تالدىقورعان) – «ەرتىس» (پاۆلودار) 0:3
گولدار: رومان مۇرتازاەۆ 40, 41, يگناسيو فەرناندەس 90+4.
«شاحتەر» (قاراعاندى) – «اتىراۋ» (اتىراۋ) 0:0
«اقتوبە» (اقتوبە) – «وقجەتپەس» (كوكشەتاۋ) 1:0
گول: سامات سماقوۆ 72 (پەنالتي).
8-تۋر ويىندارىنىڭ قورىتىندىسى بويىنشا تۋرنير كەستەسى
ۇزدىك مەرگەندەر:
رومان مۇرتازاەۆ («ەرتىس») – 5 گول;
گوگيتا گوگۋا («ەرتىس») – 3 گول;
ازات نۇرعاليەۆ («ورداباسى») – 3 گول.
9-تۋر ويىندارى 5 مامىر كۇنى وينالادى. اتالعان تۋرداعى قارسىلاستار رەتى تومەندەگىدەي:
«اقجايىق» – «اقتوبە»
«اتىراۋ» – «ورداباسى»
«ەرتىس» – «توبىل»
«وقجەتپەس» – «استانا»
«تاراز» – «شاحتەر»
«قايرات» – «جەتىسۋ».
ەلامان قوڭىر.
دەرەك: egemen.kz.
سۋرەت: vk.com.