ءازىل - وسپاق, سىن - سىقاق
* بىردە...
ول جاققا اسىقپاعان ءجون
استانادا قازاقتىڭ كورنەكتى اقىنى قايتىس بولىپ, ونىڭ دەنەسى قاراكەرەي قابانباي كەسەنەسى قاسىندا اشىلعان جاڭا پانتەونعا قويىلدى. ول استانادان جيىرما شاقتى شاقىرىم قاشىقتىقتا ورنالاسقان. استاناداعى سول جاعالاۋداعى «كورمە» ۇيىندە ءوتكەن شىعارىپ سالۋعا ارنالعان قارالى جيىننان سوڭ جازۋشىلار ساۋىتبەك ابدراحمانوۆ, ءالىبەك اسقاروۆ پەن پاريجدەن كەلىپ جەتكەن اقىن ولجاس سۇلەيمەنوۆ ۇشەۋى ءبىر ماشينامەن پانتەونداعى زيراتقا قاراي توپىراق سالۋعا كەتىپ بارا جاتىپ الىبەك جۇرگىزۋشىسىنە:
– ءبىزدىڭ ماشينادا ولجەكەڭ وتىر, قورىقپاي الداعى ماشينالاردى باسىپ وزا بەر, – دەيدى قالجىڭداپ.
سوندا ولجەكەڭ:
– ول جاققا اسىقپاعان ءجون... – دەگەن ەكەن.
مەنەن باسقالاردىڭ ءبارى حالال ەكەن...
جازۋشى قاليحان ىسقاقتىڭ 80 جىلدىق مەرەيتويى مەن قاراتاي باتىردىڭ ەسكەرتكىشىن اشۋ راسىمىنە قاتونقاراعايعا استانا مەن الماتىدان جازۋشىلار كامەل جۇنىستەگى, الىبەك اسقاروۆ, بەكسۇلتان نۇرجەكە, كادىربەك سەگىزباي, قۋانىشباي قۇرمانعاليمەن بىرگە اقىن ءادىلعازى قايىربەكوۆ تا كەلەدى. الىستان كەلگەن قوناقتاردى قاتونقاراعاي اۋىلىنداعى «بايان» قوناقۇيىنە اكەلىپ ورنالاستىرادى.
سوندا ادىلعازى قايىربەكوۆ, كامەل جۇنىستەگى, تاريحشى احمەت توقتاباي تورتەۋمىز ءبىر بولمەگە جايعاستىق. سۇراستىرا كەلسەك, مەن دە, كامەل دە, احمەت تە اراق-شاراپ ىشپەيتىندەر بولىپ شىقتىق. سوندا ادىلعازى:
– مەنەن باسقالاردىڭ ءبارى حالال ەكەن عوي, – دەگەنى.
تاعى دا بۇرىنعى ايەلىمە ۇيلەندىم
بىردە جازۋشى الىبەك اسقاروۆتىڭ جۇبايى زايگۇلدىڭ 60 جاسقا, الىبەك پەن زايگۇلدىڭ تۇرمىس قۇرعانىنا 40 جىل تولۋىن اتاپ ءوتتى. مەرەيتوي بارىسىندا بالالارى الىبەك پەن زايگۇلدىڭ قولىنا التىن جۇزىك كيگىزىپ, «قىرىق جىلدان سوڭ نەكەلەرىڭ جاڭادان قيىلدى» دەپ تويعا كەلۋشىلەر ەكەۋىن جاپپاي قۇتتىقتادى.
سوندا الەكەڭ: – تاعى دا بۇرىنعى ايەلىمە ۇيلەندىم بە؟ – دەگەنى.
قولدا بىردەڭە بولعانعا نە جەتسىن
«فوليانت» باسپاسىنىڭ ءۇش قاباتتى جاڭا ۇيىندە وتىرعانىمىزدا ەكىنشى قاباتتىڭ ورتاسىنا ەسىك ورناتىپ, ق ۇلىپتاپ قويدى. ادامدار ءارى-بەرى ساپىرىلىسىپ جۇرە بەرمەسىن دەگەنى عوي. ەندى ءتۇس كەزىندە ەكىنشى قاباتتىڭ ءبىر شەتىندەگى اسحاناعا بارۋ ءۇشىن ءبىرىنشى قاباتقا ءتۇسىپ, اينالىپ وتىرىپ قايتادان ەكىنشى قاباتقا شىعاتىن بولدىق. بايقاسام, ءبىزدىڭ ەكىنشى قاباتتا وتىراتىن «الەم ادەبيەتى» جۋرنالىنىڭ باس رەداكتورى دۋمان رامازاندا ورتاداعى ەسىكتىڭ كىلتى بار ەكەن. ءوزى اشىپ, ءوزى جاۋىپ ءجۇر. ءبىر جولى ول مەنى سول ەسىكتەن كىرگىزىپ, قايتاردا قايتا شىعارىپ جاۋىپ بولدى دا, قولىنداعى كىلتىن جوعارى كوتەرىپ:
– قولدا بىردەڭە بولعانعا نە جەتسىن؟!. – دەگەنى بار.
قايىردى نازىرباەۆ
استانا
ساۋ ادام جىندى بولادى
ءبىر دەمالىپ قايتايىن دەپ,
تاتتىمەن قوسا ءتاتتى اڭگىمە ايتايىن دەپ,
مەيرامحاناعا كەلىپ ەدىك,
كوڭىلگە جاستىق جەلىك ەنىپ,
بىراق قايدان كەلدىك دەپ «ەڭىرەدىك».
سەبەبى, شەتەلدىك ايقاي مۋزىكا
جەر دۇنيەنى جاڭعىرتتى,
باسىمىزدى قاڭعىرتتى.
ىلعي ءبىر جالاڭاش-جالپى ادامدار,
رەتى جوق الاڭدار,
«جايلات» دەپ ەدىك بىزگە كەلىپ
ۇرىستى,
قاباقتارىنان قار جاۋىپ تىرىستى:
«پوحورون» ەمەس بۇل ورىن» –
دەپ الدى دا قۇتىرىپ كەتتى.
تالاي جۇرت تىسقا سىتىلىپ كەتتى.
ءيا, كەيبىر مەيرامحانا,
كوڭىلدى كىرلەتىپ, مۇڭدى قىلادى,
ساۋ ادامدى جىندى قىلادى.
«پريۆەت..!»
مەن «شوپىر» دەگەن اداممىن,
رۋلگە عانا الاڭمىن.
اتاقتى بايدىڭ قاتىنى,
اسىپ توگىلگەن «اقىلى»
مەنى باستاپ جۇرەدى,
«قاتتى ايدا» دەپ قاقساپ جۇرەدى.
«سۋپەرماركەتتى» كورگەندە,
ءدال الدىنا كەلگەندە:
«مىنا جەر بالشىق ەكەن,
شاشىراندى شالشىق ەكەن,
تروتۋارعا» شىعىپ توقتا» – دەدى,
«نارۋشەنيە عوي» دەپ ەدىم,
«قايداعىنى سوقپا» دەدى.
سوسىن, «امال كوتورىي», توقتادىم,
سول كەزدە ىزدەگەنگە سۇراعان,
جول پوليتسياسى ءبىر ادام,
ىسقىرىپ كەلىپ سەس بەردى.
و, قۇدانىڭ قۇدىرەتى-اي,
قاتىندى كورىپ ابدىراپ,
تۇمسىق سۋى سالبىراپ –
«پريۆەت !» دەپ «چەست» بەردى...
«سۋفيت» قىلدى
اڭدى قويىپ, ورىستەگى مالدى اتقان,
كوزدەرىنە كوك مۇز بولىپ قان قاتقان.
كوپكە مومىن, ءىس-قيمىلى جاۋىزدىق,
بار ەدى ءبىر قۇداي ۇرىپ, انت اتقان.
سول سۇر جىلان قالدى ءبىر كەز ۇستالىپ,
زاڭ-زاكۇننىڭ ۋىسىنا ءتۇستى انىق.
ۇرىمتالىن تابا قويدى ۇرىمىز,
كوتەرىلگەن ءىس قاعازى «قىسقارىپ».
ءمانىسى بوپ ماسەلە دە شەشىلدى,
ءبىر جىلقىعا ءبىر ميلليون كەسىلدى.
مال يەسى «كوك قاعازعا» كومىلىپ,
«قۇرسىنشى» دەپ ۇرىمىزدى كەشىردى.
زاڭ دا جۇمساق بولادى ەكەن مۇندايدا,
قىلىعى بار باتاتۇعىن شىمبايعا.
تەرگەۋشىنىڭ ماڭداي جاعى تەرشيدى,
كوزىن قىسىپ, كەلە قالدى ىڭعايعا.
ايلار ءوتتى, تىستەدى ۇرى بارماعىن,
ارتقا سالىپ جۇرگەن ەدى سالماعىن.
ءبىر ميلليون الىپ كەتكەن «باتىردىڭ»
قوراداعى «سۋفيت» قىلدى بار مالىن.
ءازىربايجان قونارباەۆ
ماڭعىستاۋ وبلىسى
سۇراق-جاۋاپ
جۋرناليست ءبىر توپ اۋىل تۇرعىندارىنا ساۋال قويىپ تۇر:
– اۋىل اكىمدەرىنىڭ سايلاۋىنان نە كۇتەسىز؟
– ءبىر قاپ ۇن, ءبىر قاپ كۇرىش پەن ءبىر قوراپ ماكارون, ەكى ليتر پىستە ماي...
***
– اللو, سالەمەتسىز بە, بۇل اكىمنىڭ قابىلداۋ بولمەسى مە؟
– ءيا.
– مەن كەلەسى اكىمنىڭ قابىلداۋىنا جازىلىپ قويايىن دەپ ەدىم.
– نەگە؟
– وسى جولعىسى دا ۇزاق وتىرمايتىن سياقتى عوي...
***
باي ادام تاڭعى التىدا تۇرىپ جۇگiرiپ جۇرسە كەرەك. وعان كەدەي ادام قارسى ۇشىراسىپتى:
– بايەكە, نەگە جۇگiرiپ ءجۇرسiز؟
– تۇك تابەتiم جوق. تاڭعى اسقا تابەتiم اشىلسىن دەپ جۇگiرiپ ءجۇرمiن. ءوزiڭ نەگە جۇگiرiپ ءجۇرسiڭ؟
– مەن ءوزiمنiڭ تابەتiمە تاڭعى اس iزدەپ جۇگiرiپ ءجۇرمiن.
***
بەلگىلى سۋرەتشىگە قويىلعان سۇراق:
– سۋرەتشى ءۇشىن عاجاپ جاڭالىق – ونىڭ العاشقى سۋرەت كورمەسى شىعار؟
– ول ءۇشىن عاجاپ جاڭالىق – العاش رەت ونىڭ ايتەۋىر ءبىر سۋرەتىنىڭ ۇرلانۋى...
تايراڭداعان «تاراقان»
«تاراقان» فيرماسىنىڭ توراعاسى تاراقباي قاراۋىنداعىلاردى جيناپ, ورىندىعىن سىقىرلاتا تارعىل داۋسىمەن جينالىستى باستاپ كەتتى.
– جاراندار, بۇگىنگى جينالىسىمىز بۇرىنعىدان وزگەشەلەۋ بولعالى تۇر. ءوتىپ كەتكەن قوي جىلى فيرمامىز ءۇشىن جاماندىق اكەلە قويمادى. سەبەبى, ءار فيرما قۇپياسى بولادى, سونى جوسپارلى جۇرگىزە بىلدىك. ءبىز شىعاراتىن «تاراقانعا ءولىم!» ءدارىسىن تەك ءوزىمىزدىڭ ەلىمىز پايدالانىپ قويعان جوق, مىنا كورشىلەس ەل دە ساتىپ الدى. ال باسقالار دا ساتىپ العاندا تابىس ءتىپتى كوبەيەتىن ەدى. بىردەمەمىزدى سەزىپ قويدى ما, ساتىپ الۋدان باس تارتتى عوي. سول «بىردەمەنى» سەزىپ وتىرعان بولارسىزدار, شىعاراتىن ءدارىمىزدىڭ اتى «تاراقانعا ءولىم!» دەپ اتالعانمەن دە, ولاردى ءتۇپ-تۇقيانىمەن جويىپ جىبەرمەيمىز. ەگەر بۇل بايعۇستاردى جويىپ جىبەرسەك, بولاشاقتا اتى دارداي فيرمامىزدىڭ جابىلىپ, ساندالىپ قالاتىنىمىز انىق. سوندىقتان, ىشتەرىڭ ءبىلىپ وتىر, ءدارىمىزدىڭ دوزاسى قىرىقاياقتى بايعۇستاردى تۇگەل ءولتىرىپ تاستامايدى, تەك بىرەر كۇنگە ۇيىقتاتادى. ال, ارىق-تۇرىقتارى ولەتىنى بەلگىلى. ءبىزدىڭ ءونىمىمىزدى پايدالانۋشىلار ۇيىندەگى ءورىپ جۇرگەن سول ارىق-تۇراقتارىنىڭ ولگەنىنە ءماز.
وسىلاي بولمايىنشا نارىق كوشىنە تاعى ىلەسە المايمىز. قاي ەل ەدى, «كۇنشۋاق» دەي مە, «كۇنشىعىس» دەي مە, سولاردىڭ دۇنيەلەرىندە دە «سروك» بار عوي, – دەپ تاراقباي اينالاسىنداعىلارعا ءبىر قاراپ قويىپ, تارعىل داۋسىمەن جينالىستى ءارى قاراي جالعاستىردى.
– وزدەرىڭ بىلەسىڭدەر, ازدى-كوپتى ەڭبەگىمىز ورىندى باعالانىپ تا جاتىر. كەشەگى جيىندا باسشىلىق العىس ايتىپ يىعىما شاپان جاپسا, الاڭدا ءبىزدىڭ فيرمانىڭ ەل الدىنداعى سىڭىرگەن ەڭبەگى ءۇشىن شۋلاعان بوزبالالارعا تاراقان سۋرەتى سالىنعان فۋتبولكالاردى كيگىزىپ, سەكەكتەتكەنى تاعى بار. ولار «تاراقانعا ءولىم!» دەپ ۇرانداتقاندا, كوزىمە جاس كەلگەنىن دە بايقاماي قالدىم. ال «ناسەكوم» دەپ اتالاتىن ۇيىمنان مەنىڭ اتىما «جىلتىر قاعاز» العىس حات كەلگەنىنە تاعى وزدەرىڭىز كۋاسىزدەر. تاك شتو, العىستان, ماراپاتتان قۇرالاقان ەمەسپىز.
ەندى اڭگىمەمنىڭ نەگىزگى يدەياسىنا كوشەيىك. ءبىز جاڭاشا ءومىر سۇرمەسەك, ءوزىمىزدى-ءوزىمىز قامشىلايتىن بىردەڭە تاپپاساق باسەكەلەستەرىمىزدەن قالىپ قويۋمىز مۇمكىن. ويتكەنى, ەستىپ جاتىرمىن, وسى قالانىڭ شەت جاعىنان «كوك شىبىن» دەگەن فيرما اشىلعالى جاتىر دەيدى. ال, «كوك شىبىنعا ءولىم!», «كوك شىبىن جويىلسىن, قۇرىسىن!» دەگەن ەكى ءدارى شىعارسا دا كوك شىبىن جويىلمايتىنىن جاقسى بىلەسىڭدەر. سەبەبى, اۋىلداعىلار شيەتتەي بالالارى ءۇشىن قورا-قوراسىمەن ماڭىراما, موڭىرەمەلەردى بازارعا اكەلىپ قان ساسىتۋدا... قان بار جەردە كوك شىبىن بولادى. مىنە, پايدا كوك شىبىندا بولىپ تۇر عوي.
سوندىقتان, مەنىڭ ايتايىن دەپ وتىرعان يدەيام – فيرمانىڭ جانىنان «بۇرگەدەن تازارايىق!» دەگەن قوسالقى شارۋاشىلىق اشۋدى ويلاپ وتىرمىن. مەن تاراقاننان الدەقايدا كىشكەنتاي, ءتىپتى, كوزگە كورىنبەيتىن بۇل قۇرعىردى نەگە ايتىپ وتىرمىن؟ ويتكەنى, بيىل مەشىن جىلى ەكەنىن ەستەرىڭە سالامىن. كۇنى بويى تاراقاندارمەن «كۇرەسىپ» ۇيگە شارشاپ بارعاندا تەز قالعىپ كەتۋىڭ ءۇشىن گازەت, تىلەبيزور قارايتىنىم بار. سوندا تىلەبيزوردان ءۇستى-باسىن قاسىنىپ وتىراتىن, دارۆين ايتقان «اتالارىمىزدى» كورەمىن. ال, ءار جىل ءوز يەسىنە ۇقساستاۋ كەلەدى عوي. ياعني, مەشىنمەن بىرگە بۇرگە دە كەلەدى. مايەكەڭ, تو ەست مەشىن جىل بويى «كرەسلودا» وتىرعاندا قاسىنىپ وتىرماي جايباراقات وتىرسىن دەگەن ويمەن ىسكە كىرىسەلىك. تاعى ءبىر ايتارىم بار, ول بۇرگەدەن تازارتاتىن «بۇرگەتاراق» جاساۋ. سونى فيرمامىزدا شىعارىپ, مايەكەڭدى عانا تاراپ قويماي, وعان قالىڭ جۇرتشىلىقتى تارتساق, فيرمامىزدىڭ تاسى ورگە دومالارى ءسوزسىز.
سوندا الگى بىزبەن باسەكەگە ءتۇسپەكشى بولىپ جۇرگەن «كوك شىبىن» فيرماسى كوزدەرىنە كوك شىبىن ۇيمەلەپ, وزىنەن ءوزى قۇرىپ كەتەتىنى ايدان انىق, – دەپ تاراقباي سونى يدەياسىن اياقتادى.
عاجايىپ يدەيانى تىڭداپ وتىرعاندار: – عاجاپ! عاجاپ, تاراقا, ءسىز بولماساڭىز ءبىز كۇن كورە الماي تاراقان تەرىپ كەتەمىز عوي, – دەپ شۋلاپ قويا بەردى.
– ولاي بولسا, – دەدى تاراقباي ءسوزىن قايتادان جالعاستىرىپ, – ماسابەك, سەن بوسقا ىزىڭداماي, دۇنيەجۇزىلىك «ناسەكوم» ۇيىمىمەن حابارلاسىپ, ءتيىستى پاتەنتىن الۋمەن شۇعىلدان. ال, قوڭىزباي, سەن قوسالقى فيرمانىڭ شىعىس-كىرىستەرىن, بيزنەس-پلانىن ازىرلە. شەگىرتبەك, سەن «بۇرگەدەن تازارايىق!» ءدارىسىن جاساۋدى قولعا ال. بىراق بۇرگە بايعۇستاردىڭ ءۇرىم-بۇتاعىمەن جويىلىپ كەتپەۋ جاعىن مۇقيات ويلاستىر... ەندى قالعاندارىڭ تاراقانشىلاماي, شىبىنشىلاماي ءوز جۇمىستارىڭا كىرىسىڭدەر, – دەپ ءزىلدى تاپسىرمانى بەرىپ تاستادى.
ءسويتىپ, جاڭا دا عاجاپ يدەيامەن قارۋلانعان «تاراقان» فيرماسى قىزۋ ىسكە كىرىسىپ جاتتى...
سەرىك جۇماعاليەۆ
باتىس قازاقستان وبلىسى
* ال كەرەك بولسا!
اڭداماي سويلەپ...
وسى جىلدىڭ 28 ناۋرىزىندا كەشكىلىك تەلەديداردان « ۇلى دالانىڭ قۇپيالارى» اتتى حاباردان جىلقى جونىندە ءجونى ءتۇزۋ كورسەتىلىمدى تاماشالاپ وتىرىپ, مىنا ءبىر «ايتا سالدىمدى» تىڭداپ: «ويپىر-اي, بۇلاي دەگەنى نەسى ەكەن!؟» دەپ تاڭعالدىم! سونداعىسى مىناۋ:
– جىلقىنىڭ ەتىن جەپ, قىمىزىن ىشكەن ادام باتىر كەلەدى, باسقا ەلدى جاۋلاپ الا بەرەدى. ءبىر اياق استىڭ ەكى اياق جەلىگى بار, ەۋروپاعا دەيىن بارعىزدى... – دەيدى...
وسى پىكىردەن كەيىن مەن بىلاي دەپ وي ءتۇيدىم:
«الەمدەگى بارلىق دامىعان مەملەكەتتەر, بارلىق ءبىلىمدى حالىقتار ءوز قۇپيالارىن ءوزدەرى اشىپ بەرىپ, ۇشپاققا ءتۇگەل جەتىپ بولىپ ەڭ سوڭىندا قالعان ءبىز عانا ما؟.. سوندا بۇل نە؟ اقتالۋ ما, ماقتانۋ ما؟ «ماقتانشاقتىڭ ارتى اشىق», – دەيتىن, «اڭداماي سويلەپ, اۋىرماي ولمەيىك», اعايىن!
زەكەباي سولتانباەۆ
پاۆلودار وبلىسى
* اۋىلدىڭ ايتقىشتارى
مولدا مەن اسابا
– كەشەگى كەڭەستىك زاماندا جيىن, جينالىس, كەڭەستەردە پارتورگ, كومسورگ, ۇگىتشى, حاتشى, ديرەكتورلار اياقتىعا جول, اۋىزدىعا ءسوز بەرمەۋشى ەدى. بۇگىندەرى تىزگىن كىمدەردىڭ قولىنا كوشتى؟
– قازىر ادامداردىڭ باسى كوبىنە تورقالى تويدا, قارالى جيىندا عانا قوسىلادى عوي. ولىمدە – مولدانىڭ, تويدا – اسابانىڭ عانا اۋزىنا قارايمىز.
قۇلاعى – لوكاتور, اۋىزى – دزوت
– كەلىنشەك-اۋ, ءبىر اۋىلدا تۇرىپ بىلە بەرمەيمىز. زامان وزگەردى عوي... كەلىن ءتۇسىرىپسىڭ, قايىرلى بولسىن! كەلىنىڭ قالاي؟! قۇلاعىنىڭ تەسىگى بار ما, بىلاي؟! مەنىڭ كەلىنىمنىڭ ءبىر قۇلاعىنان كىرگەن ءسوز, ەكىنشى قۇلاعىنان شىعىپ كەتەدى.
– سەنىڭ كەلىنىڭ شۇكىر ەكەن وندا. ءبىزدىڭ «قاراعىمنىڭ» قۇلاعىنان كىرگەن ءسوز تاباندا اۋزىنان وزگەرىپ شىعىپ جاتادى. تۇرلەندىرىپ ايتقاندا قۇلاعى – لوكاتور, اۋىزى – دزوت.
«ءۇش مەزگىل تاماعىن بەرىپ...»
– قيقىم ەردىڭ جاسى ەلۋگە كەلىپ, قالانىڭ قاق ورتاسىنداعى مەيرامحانادا دۇرىلدەتىپ تويىن وتكىزىپ جاتتى. كەزەگىمەن ءسوز العان كۇرداسى سيقىم «...دەپ, دەپ,» كەلىپ, توي يەسىنىڭ ايەلىنە:
– سىلقىمبيكە-اۋ, قيقىمدى يتتەي ۇستا, – دەمەسى بار ما؟! تىڭداپ وتىرعان بالەن قۇلاق تىم-تىرىس. تاماق ءىشىپ-جەپ وتىرعاندار تاماعى نە ءارى, نە بەرى جۇرمەي كەپتەلدى دە قالدى. ويىن-كۇلكى دە سۋ سەپكەندەي تىيىلدى. سول تىنىشتىقتى بۇزىپ, تاماعىن كەنەپ, سيقىم تاعى دا:
– ءيا, يتتەي ۇستا. تاڭەرتەڭ الدىنا تاماعىن, تۇستە تۇستىگىن, كەشكە اسىن بەر دە ارتىنان تاماعىن باسىپ, بويىن جازۋعا سەرۋەنگە جىبەرىپ وتىر, – دەپ ەدى, جۇرت دۋ كۇلدى. ايتسا ايتقانداي-اۋ.
ساپار ابىلكاكىمتەگى
قوستاناي
بالا ءتىلى – بال...
ماي قىزمەتكەرىنىڭ كىشكەنتاي بالاسى اكەسىنە:
– ءسىز جۇرگىزۋشىلەردەن قورىقپايسىز با؟
– جوق, بالام, قورىقپايمىن!
– وندا نەگە ىلعي جول بويىندا تىعىلىپ تۇراسىز؟
* * *
بالاسى ءۇيدىڭ توبەسىن بوياپ جاتقان اكەسىنىڭ قيمىلىنا قىزىعا قاراپ تۇرادى.
شەشەسى:
– بالام, دۇرىستاپ ۇيرەنىپ ال, كەيىن وسكەندە كومەكتەسەسىڭ.
– نە, اكەم وعان دەيىن بوياپ بىتىرە الماي ما؟
* * *
ەكى بالا اڭگىمەلەسىپ تۇر:
– سەنىڭ ءىنىڭ نەشەدە؟
– ءبىر جاستا.
– قىزىق, مەنىڭ كۇشىگىم ءبىر جاستا بولسا دا جۇگىرىپ جۇرەدى.
– ەندى ونىڭ ءتورت اياعى بار عوي.
* * *
فۋتبولدان قازاقستان قۇراماسى نەمىستەردەن ويسىراي ۇتىلىپ جاتىر.
وسىنى تەلەديداردان باقىلاپ وتىرعان ارداگەر قارت:
– باياعىدا ءبىز نەمىستەردى جەڭىپ ەدىك...
نەمەرەسى:
– اتا, وندا سىزدەردىڭ جاتتىقتىرۋشىلارىڭىز مىقتى بولعان شىعار...
ء*ازىلىڭ جاراسسا...
«ۆوكرۋگ سمەحا جۋرنالىنان الىندى.
ءمۇيىستى جۇرگىزەتىن
بەرىك سادىر