استانادا ءۇشىنشى جىل قاتارىنان ۇيىمداستىرىلىپ كەلە جاتقان Next Generation Youth Forum 2026 – جاس لوگيستەر فورۋمى ءوتتى. ءداستۇرلى شارا بيىل زاماناۋي حالىقارالىق جوعارى وقۋ ورنى – Coventry University Kazakhstan الاڭىندا ۇيىمداستىرىلىپ, قازاقستاننىڭ ءار وڭىرىنەن جانە ورتالىق ازيا ەلدەرىنەن كەلگەن قاتىسۋشىلاردى بىرىكتىردى, دەپ حابارلايدى Egemen.kz.
فورۋمدى CILT Central Asia – لوگيستيكا جانە كولىك سالاسىنداعى كورولدىك ينستيتۋتتىڭ ورتالىق ازياداعى وكىلدىگى ۇيىمداستىردى. بۇل ۇيىم الەم بويىنشا 35 مىڭنان استام ماماندى بىرىكتىرىپ, سالانىڭ دامۋىنا حالىقارالىق ءبىلىم بەرۋ, تاجىريبە الماسۋ جانە ۇزدىك تاجىريبەلەردى ەنگىزۋ ارقىلى ۇلەس قوسىپ كەلەدى.
ءىس-شاراعا 100-دەن استام ۇزدىك ستۋدەنت پەن سالا ماماندارى قاتىسىپ, ءوزارا تاجىريبە الماسىپ, وزەكتى ترەندتەردى تالقىلادى. فورۋم اياسىندا ستۋدەنتتەر اراسىنداعى بايقاۋلار, ستارتاپ جوبالار تانىستىرىلىمى جانە ساراپشىلارمەن پانەلدىك سەسسيالار ۇيىمداستىرىلدى.
فورۋمنىڭ اشىلۋىندا سالا كوشباسشىلارى ءسوز سويلەپ, لوگيستيكانىڭ ماڭىزى مەن جاس مامانداردى قولداۋ ماسەلەسىنە توقتالدى. ولاردىڭ قاتارىندا كولىك ۆيتسە-ءمينيسترى ماقسات قالياقپاروۆ, پرەزيدەنت اكىمشىلىگىنىڭ اۆياتسيا باعىتىنىڭ جەتەكشىسى اراي بەيسەينبايقىزى, CILT Central Asia پرەزيدەنتى نۇرلان يگەمباەۆ جانە Coventry University اكادەميالىق ديرەكتورى سايمون ەتەرتون بار.
فورۋمنىڭ ماڭىزدى بولىگى – پانەلدىك سەسسيا بولدى. وندا قاتىسۋشىلار ساراپشىلارمەن تىكەلەي پىكىر الماسىپ, پراكتيكالىق كەڭەستەر الدى. سەسسيانى «NurZhol Company» باقىلاۋ كەڭەسىنىڭ توراعاسى قانات قوبەسوۆ جۇرگىزدى. سپيكەرلەر قاتارىندا MultiCode كومپانياسىنىڭ تەڭ قۇرىلتايشىسى انۋار سارسەمبينوۆ, Alstom جوبالىق مەنەدجەرى بەيبىت يبراەۆ جانە «لوگسوفت» كومپانياسى ديرەكتورىنىڭ ورىنباسارى اسەت توقاتوۆ بولدى.
نەگىزگى بولىمدە قاتىسۋشىلار «جاسىل لوگيستيكا جانە تسيفرلاندىرۋ» تاقىرىبىندا جوبالارىن ۇسىنىپ, قازىلار القاسىنىڭ باعاسىنا يە بولدى. ساراپشىلار ولاردىڭ جۇمىستارىنا كاسىبي باعا بەرىپ, ۇسىنىستارىن ايتتى.
ەكى كەزەڭ قورىتىندىسى بويىنشا:I ورىندى – Maqsut Narikbayev University;II ورىندى – قازاق-نەمىس ۋنيۆەرسيتەتى;III ورىندى – قىرعىز مەملەكەتتىك تەحنيكالىق ۋنيۆەرسيتەتى (راززاكوۆ اتىنداعى) يەمدەندى.
Next Generation Youth Forum – لوگيستيكا سالاسىنىڭ بولاشاق ماماندارى ءۇشىن تاجىريبە جيناپ, كاسىبي بايلانىس ورناتۋعا مۇمكىندىك بەرەتىن ماڭىزدى الاڭ. بۇل فورۋم جاس مامانداردىڭ جاڭا يدەيالارىن قولداپ, قازاقستان مەن ورتالىق ازياداعى لوگيستيكا سالاسىنىڭ دامۋىنا سەرپىن بەرەدى.