ۆەتنامنىڭ جوعارى بيلىگىندە – تۇڭعىش ايەل

الەم-جالەم الەم ۆەتنامنىڭ تاريحىندا ەلدىڭ جوعارعى بيلىگىنە ەڭ العاشقى ايەل كوتەرىلدى. ۇلتتىق جينالىس (پارلامەنت) ءتورايىمى بولىپ نگۋەن تحي كيم نگان سايلاندى. كونستيتۋتسيا بويىنشا ەلدىڭ ەڭ جوعارى بيلىگى بولىپ تابىلاتىن پارلامەنت سپيكەرى لاۋازىمى ءۇشىن تالاسقا تۇسكەن 62 جاستاعى نگۋەن جينالىس مۇشەلەرىنىڭ 95,5 پايىزدىق داۋىسىنا يە بولدى. بۇدان بۇرىن ول قارجى مينيسترلىگىندە ىستەگەن ەكەن. فين پرەمەرى ءۇيىن بوسقىندارعا ساتىپ جىبەردى فينليانديا پرەمەر-ءمينيسترى يۋحا سيپيليا بۇرىن ۋادە بەرگەنىندەي, بوسقىنداردى ورنالاستىرۋ ءۇشىن ءۇيىن كەمپەل قاۋىمداستىعىنا ساتتى. سيپيليانىڭ ايتۋىنا قاراعاندا, ول ايەلى ەكەۋى ءۇشىن بۇدان گورى شاعىنداۋ ءۇي ساتىپ العان. ال وتكەن جىلعى قىركۇيەكتە پرەمەر ءىس جۇزىندە پايدالانىلماي وتىرعان كەمپەلدەگى ءۇيىن ميگرانتتارعا بەرۋگە ءازىر ەكەنىن بىلدىرگەن. بىراق ول كەزدە ءۇيدىڭ ساتىلىپ بەرىلەتىنى تۋرالى ءبىر اۋىز ءسوز ايتىلعان جوق ەدى. زەينەتتەگى سپورتشىلاردىڭ ەڭ بايى – مايكل دجوردان 2003 جىلى سپورتتىق مانسابىن اياقتاعان باسكەتبولشى مايكل دجوردان وتكەن جىلعىداي بيىل دا زەينەتتەگى سپورتشىلار اراسىندا Forbes ءتىزىمىنىڭ كوشىن باستاپ تۇر. قازىر بيزنەسمەن جانە «شارلوتت حورنەتس» كلۋبىنىڭ قوجاسى رەتىندە تانىمال بولىپ وتىرعان «چيكاگو بۋللزدىڭ» بۇرىنعى اتاقتى ويىنشىسى 110 ميلليون دوللار تابىس تاۋىپ ۇلگەردى. مۇنىسى – ەكىنشى ورىنداعى ەكس-فۋتبولشى دەۆيد بەكحەمنىڭ تابىسىنان 45 ميلليون دوللار كوپ. جىلدان جىل ۇزاعان سايىن دجورداننىڭ تانىمالدىلىعى تومەندەپ وتىرعان جوق. بۇعان قوسا, 2016 جىلى ونىڭ قازىر ويناپ جۇرگەن كەز كەلگەن ويىنشىدان كەمىندە 30 ميلليون دوللاردى ارتىق تاباتىنى ايتىلىپ جاتىر. ادامنىڭ ەسىمى عۇمىرىنىڭ ۇزاقتىعىنا اسەر ەتەدى امەريكا عالىمدارى ادامنىڭ ەسىمى ونىڭ عۇمىرىنىڭ قانشالىقتى ۇزاق جانە قىسقا بولاتىنىنا اسەر ەتەدى دەگەن ۇيعارىمعا كەلىپ وتىر. وقىمىستىلار سابيگە دۇنيە ەسىگىن اتتاعان كەزىندە قويىلعان اتتىڭ ونىڭ ءومىربايانىنا تكەلەي ىقپالى بولاتىنىن دالەلدەپ شىعىپتى. زەرتتەۋ ءۇشىن الاباما, ميسسۋري, يللينويس جانە سولتۇستىك كارولينا شتاتتارىندا 1802-1970 جىلدارى تۇرعان 3 ميلليوننان استام افروامەريكالىقتاردىڭ ءومىر جولدارى قاراستىرىلعان. سوندا ماماندار ەجەلگى ءتاۋراتتان الىنعان اتى بار ادامداردىڭ باسقالارعا قاراعاندا, ورتا ەسەپپەن ەكى جىل ارتىق ءومىر سۇرەتىنىن بايقاعان. قالاداعى قۇستار دا اقىلدىراق بولىپ شىقتى كانادانىڭ ماكگيلل ۋنيۆەرسيتەتىنىڭ عالىمدارى دالاداعى قۇستارعا قاراعاندا, قالانى مەكەن ەتەتىن قاناتتىلاردىڭ اقىلدىراق بولىپ كەلەتىنىنە, ولاردىڭ يممۋنيتەتتەرى دە كۇشتىرەك ەكەنىنە كوز جەتكىزگەن. زەرتتەۋشىلەر دالادا ەركىن وسكەن جانە قالا تىرشىلىگىن كورىپ جۇرگەن قۇستاردىڭ باستى ايىرماشىلىعىن العا قويىلعان ماقساتتارى مەن جۇقپالى اۋرۋعا قارسىلىعى دەڭگەيىنەن كورىپ وتىر. تەكسەرۋ كەزىندە قالالىق قۇستار تەستىدەن ساتتىرەك ءوتىپ, جاڭا رەس­ۋرستاردى يگەرۋدە ءبىراز ارتىقتىق تانىتقان. تاجىريبەگە باربادوس ارالىنىڭ ءار قيىرىنان ۇستالعان 53 سۋىقتورعاي تارتىلعان. كحدر بيلىگى حالىقتى اشتىققا دايىن بولۋعا شاقىردى سولتۇستىك كورەيانىڭ ۇكىمەتى ەل ازاماتتارىنا الدا كەلە جاتقان ەكونوميكالىق سالاداعى كۇردەلى ۋاقىت سىنىنا دايىن بولۋ كەرەكتىگىن ەسكەرتتى. «رەۆوليۋتسيا جولى – ۇزاق تا قيىن. بالكىم, بىزگە تاعى دا وسىمدىكتەردىڭ تامىرىن تالعاجاۋ ەتۋگە تۋرا كەلەتىن شىعار», – دەلىنگەن مەملەكەتتىڭ پارتيالىق گازەتى «نودون سينمۋندا» جاريالانعان حابارلامادا. وسى ورايدا ساراپشىلار ەلدىڭ 1994 جىلدىڭ باسىندا وسىنداي اشارشىلىقتى باستان كەشكەنىن ايتادى. ءتورت جىلعا سوزىلعان سول كەزەڭدە 22 ميلليون حالىقتىڭ جارتى ميلليوننان استامى وپات بولعان ەكەن. اقپارات اگەنتتىكتەرىنىڭ ماتەريالدارى نەگىزىندە دايىندالدى.