الماتى قالاسىندا اپەللياتسيالىق سوت القاسى 2019 جىلعى جەلتوقساندا بولعان Bek Air اۋە كومپانياسى ۇشاعىنىڭ اپاتىنا قاتىستى ءىس بويىنشا شاعىمدى قارادى, دەپ حابارلايدى Egemen.kz.
الماتى قالالىق سوتى ءباسپاسوز قىزمەتىنىڭ مالىمەتىنشە, اپەللياتسيالىق ينستانتسيا ءبىرىنشى ساتىداعى سوت ۇكىمىن وزگەرىسسىز قالدىردى.
«الماتى قالالىق سوتىندا ءىس بويىنشا اپەللياتسيالىق شاعىم قارالدى. قىلمىستىق ىستەر جونىندەگى سوت القاسى ۇكىمدى وزگەرتۋگە نەگىز تاپپادى. ءبىرىنشى ساتىداعى سوتتىڭ شەشىمى كۇشىندە قالدى», دەپ حابارلادى سوتتا.
قاۋلى جاريالانعان ساتتەن باستاپ زاڭدى كۇشىنە ەنەدى. ونى كاسساتسيالىق تارتىپپەن ءبىر جىل ىشىندە شاعىمدانۋعا نەمەسە نارازىلىق بىلدىرۋگە بولادى.
ەسكە سالساق, 2025 جىلعى قاراشادا الماتى قالاسىنىڭ تۇركسىب اۋداندىق سوتى Bek Air اۋە كومپانياسى ۇشاعىنىڭ اپاتىنا قاتىستى ءىس بويىنشا ۇكىم شىعارعان. ءىس بويىنشا ايىپتالۋشىلار رەتىندە اۋە كەمەسىنىڭ ۇشقىشتارى – مارات مۇراتاەۆ پەن ميرجان مۇلداقۇلوۆ تانىلدى. ەكەۋى دە اۋە اپاتىندا قازا تاپقان.
ولارعا قازاقستان رەسپۋبليكاسى قىلمىستىق كودەكسىنىڭ 344-بابى 3-بولىگى («اۋە كولىگىن پايدالانۋ نەمەسە قوزعالىس قاۋىپسىزدىگى قاعيدالارىن بۇزۋ, ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ارەكەت») بويىنشا ايىپ تاعىلعان. سوت ۇشقىشتاردى كىنالى دەپ تانىدى, الايدا ولاردىڭ قايتىس بولۋىنا بايلانىستى قىلمىستىق جازا تاعايىندالمادى.
2019 جىلى اۋە اپاتىنان قازا تاپقان Bek Air ۇشقىشتارىنا سوت ۇكىمى شىقتى
2019 جىلعى 27 جەلتوقساندا الماتى – استانا باعىتى بويىنشا ۇشقان «Bek Air» اۋە كومپانياسىنىڭ ۇشاعى ۇشىپ كوتەرىلۋ كەزىندە بيىكتىگىن جوعالتىپ, بەتون قورشاۋدى بۇزىپ وتكەن, كەيىن ەكى قاباتتى عيماراتپەن سوقتىعىسقان. اپات سالدارىنان 12 ادام قازا تاۋىپ, 69 ادام جاراقات الدى.
Bek Air اۆياكومپانياسىنىڭ پايدالانۋشى جانە ۇشۋ جارامدىلىعى سەرتيفيكاتتارى توقتاتىلدى