وسى كوكتەمدە استانا حالىقارالىق اۋەجايىندا ۇشۋ-قونۋ جولاعىنا كەزەكتى جوندەۋ جۇمىستارى جۇرگىزىلەدى. بۇل تۋرالى اۋە ايلاعىنىڭ ءباسپاسوز قىزمەتى حابارلادى, دەپ جازادى Egemen.kz.
جوندەۋ جۇمىستارى 15 ءساۋىر مەن 31 مامىر ارالىعىندا وتەدى.
«كورسەتىلگەن كەزەڭدە ۇشۋ-قونۋ جولاعى كۇن سايىن جەرگىلىكتى ۋاقىت بويىنشا ساعات 10:00-دەن 18:00-گە دەيىن ۋاقىتشا جابىلادى. جۇمىستار جۇرگىزىلەتىن ۋاقىت ارالىعىندا ورىندالاتىن بارلىق تۇراقتى حالىقارالىق جانە ىشكى رەيستەر تاۋلىكتىڭ ەرتەرەك نەمەسە كەشىرەك ۋاقىتىنا اۋىستىرىلدى», دەپ مالىمدەدى ەلوردا اۋەجايى.
حابارلامادا بۇل جوندەۋ جوسپارلى تۇردە جۇرگىزىلەتىنى, ونىڭ ماقساتى اەرودروم ينفراقۇرىلىمى مەن جارىق-سيگنالدىق جابدىقتاردى پايدالانۋ جاعدايىندا ۇستاپ تۇرۋ, سونداي-اق ۇشۋ قاۋىپسىزدىگى مەن سەنىمدىلىگىن ارتتىرۋ ەكەنى ايتىلعان.
اۋەجاي وكىلدەرى كەستەدەگى وزگەرىستەر اۋە كومپانيالارىمەن جانە مەملەكەتتىك ورگاندارمەن كەلىسىلگەنىن اتاپ ءوتتى. شەكتەۋلەردەن تىس ۋاقىتتا اۋەجاي شتاتتىق رەجيمدە جۇمىسىن جالعاستىرادى.
«استانا حالىقارالىق اۋەجايى جولاۋشىلارعا رەيستەردىڭ وزەكتى كەستەسىن اۋە كومپانيالارىنان ناقتىلاپ الۋدى ۇسىنادى جانە تۇسىنىستىك تانىتقاندارى ءۇشىن العىس بىلدىرەدى», دەلىنگەن ءباسپاسوز قىزمەتى تاراتقان اقپاراتتا.
«جارىلعىش زات بار»: اتىراۋ اۋەجايىندا جولاۋشىلار ەۆاكۋاتسيالاندى
ەسكە سالا كەتەيىك, استانا اۋەجايىنىڭ ۇشۋ-قونۋ جولاعىنا سوڭعى جوندەۋ جۇمىستارى 2025 جىلدىڭ كۇزىندە جۇرگىزىلگەن. ول كەزدە دە ەكى ايعا جۋىق ۋاقىت بويى كۇندىزگى ۋاقىتتا ۇشاقتاردى قابىلداۋ جانە جونەلتۋ شەكتەلگەن بولاتىن.
تۇركىستان اۋەجايىنا 14,3 ملن تەڭگە ايىپپۇل سالىندى