وليمپياداعا 10 جولداما الدى
بوكستان قازاقستاننىڭ ەرلەر قۇراماسى بيىلعى تامىز ايىندا ريو-دە جانەيرودا وتەتىن جازعى وليمپيالىق ويىنداردا تولىق قۇرامىمەن ونەر كورسەتەتىن مۇمكىندىككە قول جەتكىزدى. بۇل قىتايدىڭ تسزيانان قالاسىندا بۇگىن مارەگە جەتەتىن ازيالىق وليمپيالىق كۆاليفيكاتسيالىق ءتۋرنيردىڭ بارىسىندا بەلگىلى بولدى. وندا بۇرناعى كۇنى وينالعان جارتىلاي فينالدىق شايقاستارىنىڭ قورىتىندىسىمەن – بەس, ال كەشە ءۇشىنشى ورىن ءۇشىن بولعان قوسىمشا شايقاستاردىڭ ناتيجەسى بويىنشا تاعى ەكى بوكسشىمىزدىڭ ريو-دە-جانەيرودا تامىز ايىندا وتەتىن وليمپيالىق ويىندارعا جولداما الدى.
وليمپياداعا قىزدارىمىز اراسىنان ءبىر عانا بوكسشى جولداماعا جەتتى. ول – 75 كيلوعا دەيىنگى سالماقتاعى داريعا شاكىموۆا تۋرنيردە كورەيالىق كيم شين-حيەونگتەن, موڭعول ەردەنەتۋيا ەنكحبااتاردان, كحدر سپورتشىسى جانگ ۋن-حيۋدەن 3:0 دەگەن ەسەپپەن اسىپ, فينالعا شىقتى. ال اقتىق ايقاستا قىتايلىق لي كيانمەن قولعاپ تۇيىستىرەدى.
جىگىتتەرىمىزدىڭ اراسىنان 75 كيلوعا دەيىنگى سالماقتاعى جانىبەك ءالىمحان ۇلى كەشە ءبىرىنشى بولىپ ءتۋرنيردىڭ التىن مەدالىن موينىنا ورادى. ول كەشە فينالدىق جەكپە-جەگىندە الاڭ يەسى – قىتايلىق بوكسشى جاو مينگگانگتى ايقىن باسىمدىقپەن جەڭدى.
ەرەسەكتەر دوداسىنا ەندى عانا قوسىلعان ابىلايحان ءجۇسىپوۆ تە جاتتىقتىرۋشىلار سەنىمىن اقتادى. 64 كيلوعا دەيىنگى سالماقتا سىنعا تۇسكەن ول قىتاي جەرىندە ءۇندىنىڭ مىقتى سايىسكەرى مانوج كۋماردى (3:0), كورەيالىق ليم حيۋن-ءچۋلدى (3:0), اۆستراليالىق داۆيد بيددەنى (3:0) جانە قىتايلىق حۋ كيانسكۋندى (3:0) تىزە بۇكتىردى. ەندى اقتىق سىندا موڭعول باتتارسۋح چينزوريگپەن شايقاسادى. بۇدان كەيىن ادىلبەك نيازىمبەتوۆ (81 كگ) پەن يۆان دىچكو (+91 كگ) وسى جولدان ءوتتى. وسى ساپاردا ادىلبەك كورەيالىق يانگ حي-گۋەندى (3:0), سيريالىق الا الديح چوسسوۋندى (3:0) جانە تۇرىكمەن ازيزبەك اچيلوۆتى (3:0) جولدان تايدىرسا, يۆان جاڭا زەلانديا وكىلى پاتريك مايلاتانى 1-راۋندتا نوكاۋتقا ءتۇسىرىپ, يوردانيالىق حۋسسەين ەشايش ءياشايشتى 3:0 ەتىپ تىزە بۇكتىردى.
بۇرناعى كۇنى جارتىلاي فينالدا قارسىلاستارىنا ەسە جىبەرىپ قويعان تاعى ەكى بوكسشىمىز – ولجاس ساتتىباەۆ (52 كگ) پەن قايرات ەراليەۆ (56 كگ) كەشە وليمپيا ليتسەنزياسىن بەرەتىن ءۇشىنشى ورىن ءۇشىن ايقاستا جەڭىسكە جەتتى.
ال ءۇش سالماق بويىنشا كۇش سىناساتىن قىزدار قۇراماسىندا ازىرگە جالعىز جولداما بولسا, قالعان ەكەۋىن بيىلعى 16-28 مامىر ارالىعىندا استانادا وتەتىن الەم چەمپيوناتىندا تولتىرادى دەگەن ۇمىتتەمىز.
رۋسلان يگىلىك.