«نۇر وتان» پارتياسى باتىس قازاقستان وبلىستىق فيليالىنىڭ كەزەكتەن تىس XIX كونفەرەنتسياسى وتكىزىلدى. كۇن تارتىبىندە ءۇش ماسەلە قارالدى.
ءبىرىنشى ماسەلە بويىنشا «نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ بۇعان دەيىنگى فيليال توراعاسى نۇرلان نوعاەۆتىڭ باسقا جۇمىسقا اۋىسۋىنا بايلانىستى ورنىنا وتكەن اپتادا پرەزيدەنت جارلىعىمەن باتىس قازاقستان وبلىسىنىڭ اكىمى بولىپ تاعايىندالعان التاي كولگىنوۆتى ۇسىندى. اشىق داۋىس بەرۋ ناتيجەسىندە ول «نۇر وتان» پارتياسى باتىس قازاقستان وبلىستىق فيليالىنىڭ ءتوراعاسى بولىپ ءبىراۋىزدان سايلاندى.
ال ەكىنشى ماسەلەگە وراي فيليالدىڭ ساياسي كەڭەسىنىڭ قۇرامىنا كەيبىر وزگەرىستەر ەنگىزىلدى. بۇدان سوڭ جاڭادان سايلانعان فيليال توراعاسى ا.كولگىنوۆ ءسوز الىپ وزىنە كورسەتىلگەن سەنىم ءۇشىن كونفەرەنتسياعا قاتىسۋشىلارعا العىسىن ءبىلدىردى. جەتەكشى ساياسي كۇشكە اينالىپ كەلە جاتقان «نۇر وتان» پارتياسىنىڭ فيليالىنا جەتەكشىلىك جاساۋ – ۇلكەن جاۋاپكەرشىلىك. ونىڭ باستاماسىمەن ىرگەلى ىستەر تىندىرىلۋدا. الەۋمەتتىك-ەكونوميكالىق دامۋ تۇرعىسىنان دا شەشىمىن تاپقان ىستەر بارشىلىق, دەي كەلىپ, التاي سەيدىر ۇلى جاۋاپكەرشىلىك پەن سەنىم ۇدەسىنەن شىعۋعا بار كۇش-جىگەرىن جۇمسايتىنىن جەتكىزدى.
كۇن تارتىبىندەگى ءۇشىنشى ماسەلە بويىنشا پرەزيدەنت, پارتيا ءتوراعاسى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى جولداۋىن ىسكە اسىرۋ جانە ۇلت جوسپارىن ورىنداۋ ءجونىندەگى وبلىستىق فيليالدىڭ جۇمىسى تۋرالى فيليال توراعاسىنىڭ ءبىرىنشى ورىنباسارى سەرىك سۇلەيمەن بايانداپ بەردى. مۇنىڭ ىشىندە ول بەس ينستيتۋتتىق رەفورمانى ءجۇزەگە اسىرۋ جونىندەگى «100 ناقتى قادامعا» بايلانىستى اتقارىلىپ وتىرعان ءىس-شارالارعا جان-جاقتى توقتالدى.
جارىسسوزگە شىققان فيليال
ساياسي كەڭەسىنىڭ مۇشەسى, باتىس قازاقستان وبلىستىق ءماسليحاتىنىڭ حاتشىسى مالىك قۇلشار اۋداندىق, قالالىق جانە وبلىستىق ماسليحاتتارعا «نۇر وتان» پارتياسى اتىنان ۇسىنىلعان 195 ءۇمىتكەر تۇگەلدەي دەپۋتات بولىپ سايلانعانىن ايتتى. ال ءبورلى اۋداندىق «كوندەنسات» اق-تىڭ مەنەدجەرى ناتاليا پانكراتوۆا ءوز ۇجىمىنداعى نۇروتاندىقتار ينۆەستيتسيالىق جوبالاردى جۇزەگە اسىرۋعا جانە قوسىمشا جۇمىس ورىندارىن اشۋعا باستاماشى بولىپ وتىرعاندىعىن ايتتى. مۇنىڭ ىشىندە مۇناي ونىمدەرىن وڭدەۋ باعدارلاماسىنىڭ ورنى بولەك. بۇل جۇيەدەگى «نۇر وتان» پارتياسى مۇشەلەرىنە سەرگەكتىك پەن سەنىمدىلىك, يكەمدىلىك, كاسىبي شەبەرلىك پەن توزىمدىلىك ءتان دەدى ول. «نۇر وتان» پارتياسى اقجايىق اۋداندىق فيليالى «جاس وتان» جاستار قاناتىنىڭ توراعاسى ءبىرجان كۋحاەۆ ماڭگىلىك ەل يدەياسى مەن ۇلى دالا ەلى جوباسىن ۇلىقتاۋ «100 ناقتى قادامنىڭ» ىشىندەگى ءمانى مەن ماڭىزى زور ءىس ەكەنىن جەتكىزدى.
كونفەرەنتسيانى ا.مىرزاحمەتوۆ قورىتىندىلاپ, وتكەن ءماجىلىس جانە ءماسليحاتتار سايلاۋلارىنداعى نۇروتاندىقتاردىڭ جەڭىسى تاريحي جەڭىس بولعانى ءجونىندە وي ساباقتادى. بۇل – بارشا سايلاۋشىلار ەلدىكتىڭ كورىنىسىن كورسەتە بىلگەننىڭ ناتيجەسى. بارشا قازاقستاندىقتار ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ ماڭىنا تىعىز توپتاسا باستاعاندىعىنىڭ بەلگىسى. بۇل جەتىستىكتى الەمدىك قوعامداستىق تا مويىنداپ وتىر. ەندىگى ءمىندەت سايلاۋ الدىندا بەلگىلەنگەن باعدارلامانى ناقتى ىسكە اسىرۋ بولماق, دەدى اسقار يسابەك ۇلى. ول, سونىمەن بىرگە, ا.كولگىنوۆتىڭ دە وزىنە جۇكتەلگەن مىندەتتى ويداعىداي اتقارىپ كەتەتىنىنە سەنىم ءبىلدىردى.
كونفەرەنتسياعا قاتىسۋشىلار تالقىلانعان ماسەلەلەر بويىنشا ءتيىستى قاۋلى قابىلدادى.
تەمىر قۇسايىن,
«ەگەمەن قازاقستان».
باتىس قازاقستان وبلىسى.