سەيسەنبى كۇنى تبيليسي قالاسىندا فۋتبولدان گرۋزيا مەن قازاقستان ۇلتتىق قۇراما كوماندالارىنىڭ اراسىندا جولداستىق كەزدەسۋ ءوتتى. ماتچ 1:1 ەسەبىمەن تەڭ اياقتالدى.
ەكى ەلدىڭ قۇراما كوماندالارى وسىمەن ءتورتىنشى رەت كەزدەستى. ولاردىڭ الماتىدا وتكەن 2006 جىلعى الەم چەمپيوناتىنىڭ ىرىكتەۋ ويىنىندا الاڭ يەلەرى قارسىلاسىنان 1:2 بولىپ ۇتىلسا, تبيليسيدە وتكەن قارىمتا ماتچتا كوماندالار تەڭ وينادى. 2013 جىلى وتكەن تاعى ءبىر كەزدەسۋدە قازاقستان قۇراماسى 1:0 ەسەبىمەن ۇتتى. ەندى, مىنە, قوس ەلدىڭ ۇلتتىق قۇرامالارى كەزەكتى رەت كوكمايسا الاڭدا كەزدەسىپ, شەبەرلىكتەرىن سىناپ كوردى.
ەسەپتى كەزدەسۋدى ءبىرىنشى بولىپ قوناقتار اشتى. ماتچتىڭ 35-مينۋتىندا ازات نۇرعاليەۆ سەرىكجان مۇجىقوۆتىڭ وڭ قاپتالدان بەرگەن ادەمى پاسىن ۇتىمدى پايدالانىپ, تەڭبىل دوپتى قارسىلاستار قاقپاسىنا ءدال ءتۇسىردى. بىراق ۇلتتىق قۇرامانىڭ قۋانىشى ۇزاققا بارمادى. ارادا 3 مينۋت وتكەندە گرۋزيا ويىنشىلارى ەسەپتى تەڭەستىرىپ كەتتى. بۇل دوپتى الاڭ يەلەرىنىڭ جارتىلاي قورعاۋشىسى تورنيكە وكرياشۆيلي سوقتى.
وسىدان كەيىن ويىن ودان سايىن قىزا ءتۇستى. كوماندالار ماتچقا جاقسى دايىندالعاندارىن كورسەتىپ, بىرىنەن سوڭ ءبىرى قاۋىپتى جاعدايلار جاساپ وتىردى. كەزدەسۋدە كوماندالاردىڭ ءبىر ەمەس, بىرنەشە گول سوعۋعا ءمۇمكىندىكتەرى بولدى. الايدا, الاڭ يەلەرىنە دە وتانداستارىمىزعا دا تەڭبىل دوپتى تورعا توعىتۋ بۇيىرمادى. ماتچ وسىلاي تەڭ ەسەپپەن اياقتالدى.
ءسويتىپ, 26 ناۋرىز كۇنى انتاليادا ازەربايجان قۇراماسىن جولداستىق كەزدەسۋدە 1:0 ەسەبىمەن ۇتىپ قايتقان جەرلەستەرىمىز كەلەسى ويىنىن دا جوعارى دەڭگەيدە ءوتكىزدى. كوماندانى ەكى كەزدەسۋدە دە باس جاتتىقتىرۋشىنىڭ ءمىندەتىن اتقارۋشى تالعات بايسۋفينوۆ الاڭعا باستاپ شىقتى.
داستان كەنجالين,
«ەگەمەن قازاقستان».