– جامبىل وبلىسىندا 439 بايقاۋشى جۇمىس جاساۋدا, – دەيدى بىزبەن اڭگىمەسىندە سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ جامبىل وبلىسى بويىنشا وڭىرلىك ورتالىعىنىڭ ءتورايىمى پاريدا مامەدوۆا. وڭىردە 465 سايلاۋ ۋچاسكەسى بار. تۇسكە دەيىن ءوز باسىم وبلىس ورتالىعىنداعى 23 ۋچاسكەگە بارىپ كەلدىم. تاڭعى ساعات 10-00-گە دەيىن سايلاۋشىلاردىڭ 22 پايىزى داۋىس بەرىپ ۇلگەردى. ال تۇسكە دەيىن 43 پايىزى داۋىس بەردى. جامبىل وبلىسىنداعى سايلاۋشىلاردىڭ سانى 525 مىڭنىڭ ۇستىندە. وسى ۋاقىتقا دەيىن ءتارتىپ بۇزۋشىلىق تىركەلگەن جوق. ويتكەنى, ءبىز باقىلاۋشىلارمەن تەلەفون ارقىلى بايلانىسقا شىعىپ, بارلىق جاعدايدى تۇراقتى باقىلاپ وتىردىق. ءتىپتى, وبلىس ورتالىعىنان شالعاي جاتقان ەلدىمەكەندەردەگى سايلاۋ ۋچاسكەلەرىنە دە تەلەفوندار قويىلعان. سالىستىرمالى ءتۇردە ايتاتىن بولساق, ءوتكەن جىلعى سايلاۋدا قورداي ءجانە مويىنقۇم اۋداندارىنداعى كەيبىر شالعاي اۋىلدارىنا تەلەفون بايلانىسى بولماي, كەدەرگىلەر تۋىنداپ ەدى. بيىل ونداي كەدەرگىلەر جوقتىڭ قاسى.
– بايقاۋشىلاردى قالاي جاساقتادىڭىزدار؟
– بىزدەگى سوLL-ورتالىعىندا جاس ەرىكتىلەر جۇمىس جاساۋدا. ال, جالپى ءبىزدىڭ كوميسسيانىڭ قۇرامى جاستار عىلىمي-زەرتتەۋ ورتالىعىنىڭ اياسىندا جاساقتالدى. ونىڭ 4-ەۋى شتاتتىق بىرلىك بويىنشا جۇمىس اتقارسا, قالعاندارى ەرىكتىلەر. سوندىقتان, ۋچاسكەلەردەگى ءارتۇرلى جاستاعى 439 بايقاۋشىنىڭ 70-ءى جاستار. ەرىكتىلەر اقىلى تۇردە جۇمىس جاساۋدا. جۇمىس سايلاۋعا دەيىن جۇرگىزىلدى, قيىندىقتار دا بولدى. قۇجاتتاردى جيناۋ, اقپاراتتىق-ناسيحاتتىق جۇمىستار دەگەندەي. دايدجەست بويىنشا اقپاراتتاردىڭ زاڭدىلىعى, دۇرىستىعى رەتتەلىپ وتىردى.
بايقاعانىم, جىل سايىن ازاماتتاردىڭ ساياسي ساۋاتى مەن ءمادەنيەتى كوتەرىلىپ كەلەدى. مۇنىڭ قاتارىندا بىرقاتار زەرتتەۋلەر دە جۇرگىزدىك. سوڭعى ەكى جىلدىڭ ىشىندە جۇرگىزگەن ساۋالنامالارىمىزدا نەگىزىنەن سايلاۋعا كەلۋشىلەردىڭ 41-43 پايىزى ءوز ەركىمىزبەن, ال 13 پايىزى باسشىلاردىڭ نەمەسە جۇمىستان ماجبۇرلەپ جىبەرەتىندىگىن ايتقان-دى. ال سوڭعى جۇرگىزگەن ساۋالنامادا سوڭعى كورسەتكىش 8 پايىزعا دەيىن تومەندەگەن. بۇل دەگەنىڭىز سايلاۋشىلاردىڭ ازاماتتىق پوزيتسيانىڭ ناقتىلىعىن كورسەتەدى. ءوز ەركىمەن كەلىپ داۋىس بەرەتىندەردىڭ كورسەتكىشى 80 پايىزعا دەيىن ارتتى.
– سايلاۋ جۇمىسىن قاداعالاۋ ءۇشىن باسقا مەملەكەتتەردەن قانشا باقىلاۋشى كەلدى؟
– ۇزاق مەرزىمگە كەلگەن حالىقارالىق بايقاۋشىلاردىڭ سانى ەكەۋ. ولار اۆستريا مەن فينليانديا مەملەكەتىنىڭ وكىلدەرى. ال قىسقا مەرزىمگە كەلگەندەر قىرعىزستان مەملەكەتىنەن ەكەۋ, رەسەيدەن ەكەۋ جانە جاپونيا مەملەكەتىنەن ەكەۋ. سونداي-اق, سايلاۋ ۋچاسكەلەرىندە دانيا مەن ۇلىبريتانيا مەملەكەتىنەن كەلگەن بايقاۋشىلار دا ءجۇر. ەقىۇ وكىلدەرى دە بار. وتكەن جىلى پرەزيدەنت سايلاۋىنا گەرمانيا مەن شۆەتسيا مەملەكەتىنەن كەلگەن حالىقارالىق بايقاۋشىلار ءبىزدىڭ كوميسسيانىڭ جۇمىسىنا وتە جوعارى باعا بەرگەن ەدى. شىندىعىندا, كەيبىر شەتەلدىك بايقاۋشىلار قازاقستاندا وسىنداي ۇلكەن قوعامدىق باقىلاۋ كوميسسياسىنىڭ جۇمىس جاسايتىنىن دا بىلمەيتىن بولىپ شىقتى. ال بىزدەگى كوميسسيانىڭ جۇمىس جاساپ جاتقانىنا بيىل ون جىل تولادى. سونىڭ ىشىندە, سوڭعى ەكى جىلدىڭ كولەمىندە سايلاۋ ۋچاسكەلەرىندە قوعامدىق بايقاۋشىلاردى اقىلى تۇردە تارتىپ, 100 پايىز جۇمىس جۇرگىزىلىپ كەلەدى.
– اڭگىمەڭىزگە راحمەت.
اڭگىمەلەسكەن
ورالحان ءداۋىت,
«ەگەمەن قازاقستان».
جامبىل وبلىسى.