ناۋرىز – ۇلتتاردى بىرلىككە ۇيىستىراتىن ءتول مەرەكەمىز

قۇرمەتتى باۋىرلار, وتانداستار! بارشالارىڭىزدى كۇن مەن ءتۇننىڭ تەڭەسكەن, شىعىس حالىقتارىنىڭ مەرەكەسى بولعان, ەجەلگى زاماننان قالىپتاسقان جىلباسى – ناۋرىز مەيرامىمەن قۇتتىقتايمىن! بۇل كۇنى حالقىمىز داستارقان جايىپ, قوناق كۇتىپ, قاريالارىمىز باتا بەرەدى. « ۇلىس وڭ بولسىن, اق مول بولسىن!» – دەگەن تىلەك-دۇعالار ايتىلاتىن ناۋرىز – بىرلىكتىڭ, ىنتىماقتىڭ, بەرەكە مەن تاتۋلىقتىڭ مەرەكەسى. بۇل كۇنى ارازداسقاندار – ادامگەرشىلىك, رەنجىسكەندەر – راقىمدىلىق جولىن ۇستانادى. وسىناۋ ىزگىلىك مەرەكەسىندە ادامدار كەشىرىمدىلىككە, تاتۋلىققا ۇيىسادى. ۇلىستىڭ ۇلى كۇنى ءبىزدىڭ ەلىمىز ءۇشىن ارقاشان كيەلى سانالعان. حالقىمىز ناۋرىز مەيرامىن اتا-بابامىزدان جالعاسىن تاۋىپ كەلە جاتقان ۇلتتىق مەرەكە, سالت-ءداستۇرىمىزدىڭ جالعاسى دەپ تويلايدى. وتباسىلارىڭىزعا اماندىق, دەندەرىڭىزگە ساۋلىق, جۇمىستارىڭىزعا بەرەكە تىلەيمىن. اللا تاعالا ريزىق-نەسىبەمىزدى مولايتىپ, بىرلىك-بەرەكەمىزدى ارتتىرعاي. ناۋرىز مەرەكەسى قۇتتى بولسىن! جاراتۋشى يەمىز تاۋەلسىزدىگىمىزدى باياندى ەتىپ, حالقىمىزدىڭ تىلەگىن قابىل ەتكەي! ءامين! ەرجان قاجى مالعاجى ۇلى, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي.