استانا. 19 ناۋرىز. ناۋرىز مەرەكەسى قارساڭىندا قازاقستاننىڭ حالىق جازۋشىسى, دراماتۋرگ قالتاي مۇحامەدجانوۆتىڭ تۋعان اۋىلى سىرداريا اۋدانىنا قاراستى شىركەيلىدە ەسكەرتكىش ءبيۋستى اشىلدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
شاراعا وبلىس اكىمى قىرىمبەك كوشەرباەۆ قاتىسىپ, سىرداريالىقتاردى ناۋرىز مەرەكەسىمەن قۇتتىقتادى.
«ناۋرىز مەرەكەسىن ەلدىك ماڭىزى زور, تاربيەلىك ءمانى بار شارادان باستاپ وتىرمىز. الاشتىڭ اناسى اتانعان سىر ەلى ۇلت تاريحى مەن رۋحانياتىمىزدا ەرەكشە ورنى بار, تالاي قايراتكەرلەر مەن زيالىلاردى تۋعىزعان قاسيەتتى توپىراق. سىردا تۋىپ, قازاقتىڭ قالتايى اتانعان اتاقتى دراماتۋرگقا قويىلعان ەسكەرتكىش اۋىل كوركىنە كورىك قوسىپ, جاستاردىڭ بويىندا پاتريوتتىق سەزىم قالىپتاستىراتىنى انىق. وسى قۋانىشتارىڭىز قۇتتى بولسىن! جىل باسى وتباسىلارىڭىزعا اماندىق, باق-بەرەكە تىلەيمىن», – دەدى وبلىس اكىمى قىرىمبەك كوشەرباەۆ.
ايتا كەتەيىك, مەرەكەگە وراي ورتالىق الاڭدا كۇرەس, گىر تاسىن كوتەرۋ سياقتى سپورت تۇرلەرىنەن جارىستار ۇيىمداستىرىلدى. اۋىل تۇرعىندارى ءۇشىن ونەرپازدار كونتسەرت قويىپ, كەلگەن قوناقتار كيىز ۇيلەردەن ءدام تاتتى.
تالعات رايىمبەك.
دەرەك, سۋرەت: egemen.kz.