پارلامەنت سەناتى توراعاسىنىڭ ورىنباسارى اسقار بەيسەنباەۆ تۇركىتىلدەس مەملەكەتتەر پارلامەنتتىك اسسامبلەياسىنىڭ بايقاۋشىلار ميسسياسى وكىلدەرىمەن كەزدەستى, دەپ حابارلادى سەناتتىڭ ءباسپاسوز قىزمەتى.
توراعا ورىنباسارى تۇركپا باس حاتشىسى جاندوس اسانوۆ, ءتۇركياداعى ۇلى ۇلتتىق جينالىسىنىڭ دەپۋتاتى حاليۋك يپەك, ەركان ايدىن, ازەربايجان ميللي مەدجيليسىنىڭ دەپۋتاتى نيزامي جافاروۆ, قىرعىزستان جوگوركۋ كەنەشىنىڭ دەپۋتاتى ابىلكايىر ۇزاقباەۆ جانە تاعى دا باسقا ميسسيا وكىلدەرىمەن كەزدەسۋدە 20 ناۋرىزدا وتەتىن كەزەكتەن تىس سايلاۋدىڭ قازاقستان حالقى ءۇشىن ماڭىزى زور, ەرەكشە ساياسي شارا ەكەنىن اتاپ ءوتتى.
«قازاقستان قازىر جاڭعىرۋ كەزەڭگە اياق باستى. ءبىز الەمدەگى كۇردەلى احۋال جاعدايىندا جاڭا رەفورما وتكىزۋ ارقىلى ەلىمىزدەگى بىرلىكتى, تۇراقتىلىقتى ساقتاۋعا الدىن الا قادام جاساۋدامىز», – دەدى ا.بەيسەنباەۆ.
«مەملەكەتىمىزدىڭ الدىندا تۇرعان جوعارى ماقسات-مىندەتتەردى ورىنداۋدا, ەڭ الدىمەن, ساپالى زاڭ شىعارۋ قىزمەتىن اتقارا الاتىن بىلىكتى ءارى تاجىريبەلى ەل قالاۋلىلارىنا ۇلكەن ءۇمىت ارتىلاتىنىن» ايتقان ا.بەيسەنباەۆ: «ءبىز سايلاۋدى اشىق جانە دەموكراتيالىق سايلاۋدىڭ جالپىعا تانىمال حالىقارالىق قاعيداتتارىنا ساي وتكىزۋگە ۇمتىلامىز. سوندىقتان دا, ءبىز سايلاۋعا حالىقارالىق بايقاۋشىلاردىڭ بارىنشا كەڭىنەن جانە بەلسەندى قاتىسۋلارىن قۇپتايمىز. بايقاۋشىلاردىڭ جۇمىسىنا قولايلى جاعداي جاسالاتىن بولادى. الداعى سايلاۋعا باعا بەرۋدە سىزدەردىڭ كاسىبي بىلىكتىلىكتەرىڭىز بەن ءادىل ءارى بەيتاراپتىلىقتارىڭىزعا سەنىم ارتامىز», – دەدى.