بىلتىرعى جىلى «قازترانسگاز ايماق» اق-تىڭ ىشكى نارىققا ساتىلعان گازدان شەككەن شىعىنى 124 ملرد. تەڭگەنى قۇراپتى. بۇل جونىندە ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا كومپانيانىڭ باس ديرەكتورى يبۋللا سەرديەۆ ايتتى. شاراعا ەنەرگەتيكا مينيسترلىگى گاز ونەركاسىبىن دامىتۋ دەپارتامەنتىنىڭ باسشىسى عالىم نۇرعازيەۆ تا قاتىسىپ, ەلىمىزدەگى گاز ءوندىرىسى تۋرالى اڭگىمەلەدى.
بىلتىرعى جىلى ەلىمىزدە 45,3 ملرد. تەكشە مەتر گاز وندىرىلگەنىن ايتقان دەپارتامەنت باسشىسى, كوگىلدىر وتىندى تۇتىنۋشىلار سانى دا ارتىپ كەلە جاتقانىن جەتكىزدى. «قازاقستان تاۋەلسىزدىك العان كەزدەن بەرى گاز ءوندىرۋدى 5,5 ەسەگە ارتتىردى. 2015 جىلى قازاقستان 45,3 ملرد. تەكشە مەتر گاز ءوندىردى. بۇل 2014 جىلمەن سالىستىرعاندا 5 پايىزعا كوپ. سونىمەن بىرگە, گاز ەكسپورتىنىڭ دا كولەمى ارتقان. بىلتىر قازاقستان 12,7 ملرد. تەكشە مەتر گاز ەكسپورتتادى. بۇل 2014 جىلمەن سالىستىرعاندا 15 پايىزعا, 2000 جىلعا قاراعاندا 3,5 ەسە جوعارى. ول كەزدە تەك 3,4 ملرد. تەكشە مەتر گاز شەتەلگە ساتىلعان بولاتىن», دەگەن ول, ەكونوميكانىڭ وسۋىنە جانە ۇكىمەتتىڭ ەلدى گازبەن قامتاماسىز ەتۋ باعدارلاماسىنىڭ ارقاسىندا گازدىڭ ىشكى تۇتىنۋ كولەمى ەداۋىر ارتىپ وتىرعانىن ايتتى. بۇل 2000 جىلمەن سالىستىرعاندا 2,2 ەسەگە كوپ كورىنەدى.
ال ەلىمىزدەگى گازداندىرۋ جانە كوگىلدىر وتىنمەن جابدىقتاۋ سالاسىندا وتكەن جىلى اتقارىلعان جۇمىستارمەن تانىستىرعان «قازترانسگاز» كومپانياسىنىڭ باس ديرەكتورى رەسپۋبليكانىڭ 10 ايماعىندا 7 ميلليوننان استام تۇرعىندى جانە 30 مىڭنان استام كاسىپورىندى گازبەن ۇزدىكسىز قامتاماسىز ەتىپ وتىرعاندارىن ايتتى. «مەملەكەت باسشىسى ۇلتتىق وپەراتورعا ەلىمىزدىڭ بارلىق اۋىل-ايماعىن گازبەن قامتۋ قاجەتتىگى تۋرالى ناقتى تاپسىرمالار بەردى. بۇل تاپسىرمالاردى ورىنداۋ ءۇشىن اۋقىمدى جۇمىستار اتقارىلدى. قازىر كورىپ وتىرعانىمىزداي, ەلىمىزدىڭ گاز جۇيەسىن جاڭعىرتۋ مەن گازداندىرۋعا قاتىستى جوسپارلانعان بارلىق ينۆەستيتسيالىق جوبالار ىسكە اسىرىلدى», – دەدى ي.سەرديەۆ.
كومپانيانىڭ قول جەتكىزگەن تابىستارى جونىندە اڭگىمەلەگەن باس ديرەكتور سالادا ورىن الىپ وتىرعان قيىندىقتاردى دا جاسىرىپ قالمادى. «نازارلارىڭىزدى مىنا ءبىر مالىمەتكە اۋدارعىم كەلەدى. ءبىزدىڭ كومپانيا ىشكى نارىققا كوگىلدىر وتىن ساتۋدان قىرۋار شىعىن كورىپ كەلەدى. ويتكەنى, بۇگىندە گازدىڭ كوتەرمە باعاسى ونىڭ وزىندىك قۇنىنان ايتارلىقتاي تومەن دەڭگەيدە بەكىتىلگەن. سونىڭ سالدارىنان ۇلتتىق وپەراتورعا وتكەن 2015 جىلى ىشكى نارىققا ساتىلعان گازدان كەلگەن شىعىن 124 ملرد. تەڭگەنى قۇرادى. وسى قارجىلىق شىعىنداردىڭ ورنىن كومپانيا گاز تاسىمالداۋ جانە ترانزيتتىك تاسىمالداۋ مەن ەكسپورتتىق وپەراتسيالار ەسەبىنەن جاۋىپ وتىر», – دەدى باس ديرەكتور.
شارا بارىسىندا استانانى گازداندىرۋ جوباسى دا نازاردان تىس قالمادى. ع.نۇرعازيەۆ ەلورداعا گاز تارتۋ جونىندەگى ماسەلە بەلگىسىز مەرزىمگە توقتاتىلعانىن ايتتى. «بۇگىنگى تاڭدا استاناعا گاز قۇبىرىن تارتۋدىڭ ەكى جوباسى بار. ولار – قوستاناي وبلىسىنان تارتىلاتىن «قارتالى – توبىل – كوكشەتاۋ – استانا» ماگيسترالى مەن «بەينەۋ – بوزوي – شىمكەنت» قۇبىرىنا «قىزىلوردا – جەزقازعان – تەمىرتاۋ – قاراعاندى – استانا» ماگيسترالىن جالعاۋ ارقىلى ەلورداعا گاز جەتكىزۋ. ءبىرىنشى جوبا بويىنشا جۇمىستار اتقارىلدى, جوبالىق-سمەتالىق قۇجاتتاماسى دا بار. ەكىنشى ماگيسترال بويىنشا ازداعان تەxنيكالىق-ەكونوميكالىق ەسەپتەۋلەر جاسالدى. قازىرگى ۋاقىتتا ەكى جوبانى دا توقتاتا تۇرۋ تۋرالى شەشىم شىعارىلدى. ازىرگە بەلگىسىز مەرزىمگە», – دەدى دەپارتامەنت ديرەكتورى.
نۇرباي ەلمۇراتوۆ,
«ەگەمەن قازاقستان».